Bügın aqparattyq-kommunikasiialyq ortalyǧynda Şymkent qalasy äkımınıŋ bırınşı orynbasary Şyŋǧys Mūqan, Şymkent qalasynyŋ Bas memlekettık sanitariialyq därıgerı Äbdımanap Tölebaev jäne Şymkent qalalyq Densaulyq saqtau basqarmasy basşysynyŋ mındetın atqaruşysy Timirhan Varzilovtyŋ qatysuymen qaladaǧy epidemiologiialyq jaǧdai boiynşa brifing öttı.
Baspasöz mäjılısınde, eŋ aldymen, söz tızgının alǧan Şyŋǧys Jūmabekūly qaladaǧy qalypqa tüse bastaǧan epidemiologiialyq ahualdy tūraqty jaǧdaida ūstau üşın josparlary jönınde söz qozǧady.
– Koronavirus infeksiiasynyŋ keŋ taraluyn aldyn alu maqsatynda qalada adamdar köp şoǧyrlanatyn qoǧamdyq oryndarǧa nasihat bannerlerın ılemız. Iаǧni, halyq sanitarlyq normalardyŋ saqtaluyn jadylarynan şyǧarmauy kerek. Mäselen, bügınde betperde adamnyŋ kietın kiımı sekıldı qajettılıkke ainaldy. Osy qalypty älı de saqtauymyz kerek. Öitkenı ındet ūiytqyp otyryp qaita soǧuy mümkın. Al ol viruspen küres közben körınbeitın jūmys siiaqty. Būl sözımdı medisina mamandarynyŋ eŋbegın nazarǧa alyp aityp otyrmyn. Öz kezegınde bız Şymkent qalasynyŋ äkımdıgı aq halattylar käsıbilıgın sarqyp jūmys ısteuge jaǧdai jasauymyz qajet, – dedı Ş.Mūqan.
Sondai-aq, qala äkımınıŋ bırınşı orynbasary jeke jospar joq, memlekettık maqsat bar ekenın aita kele, «bügıngı jaǧdai qalypqa keldı dep, oǧan nemqūraily qarasaq, üşınşı tolqyn boluy äbden mümkın. Ol – qarapaiym şyndyq. Epidemiologiia keşe paida bolǧan joq, ol – ǧylym, zerttelgen dünie. Iаǧni, saqtanbasaq, ındettı qaita örşıtıp aluymyz mümkın. Degenmen älem ǧalymdary būl virusty auyzdyqtau üşın küresude. Bügınde dünie jüzınde ǧalymdar 160-tan asa vaksinany synaqtan ötkızıp jatyr. Onyŋ ışınde ekı vaksinany elımızdıŋ ǧalymdary synaqtan ötkızude» dep, sözın tüiındedı Ş.Jūmabekūly.
Brifingte Şymkent qalasynyŋ Bas memlekettık sanitariialyq därıgerı käsıpkerlık nysan ielerınen sanitarlyq normalardy saqtauǧa şaqyrdy.
– Maqsatymyz aiyppūl ösımın köbeitu emes, bıraq käsıpkerlık nysan ielerı talapqa sai jūmys ıstemese, şara qoldanamyz. Būl rette epidemiologiialyq ahual kezındegı qalamyzdaǧy därıhanalarǧa jürgızılgen monitoring boiynşa aitsam, 457-ı därıhanaǧa tekseru jürgızıldı. Olardyŋ 87-sınen zaŋ talaptaryn būzu anyqtalyp, aiyppūl salyndy. Jäne olardyŋ 27-sı sotqa joldanyp, bügınde 8-ne tergeu jūmystary jürgızılude, – dedı Ä.Tölebaev.
Äbdımanap Qoşqarūlynyŋ sözıne süiensek, koronavirus infeksiiasyna bailanysty şekteu şaralary kezınde qalada osy jyly özge de infeksiialyq aurular (oba, tyrysqaq, qūtyru, paratif, difteriia, kökjötel, qyzamyq, ış süzegı, poliomielit, salmonellez) tırkelmegen.
Öz kezegınde Timirhan İsabalūlynyŋ aituynşa, Şymkent qalasynda 2020 jylǧy 5 tamyzdaǧy jaǧdai boiynşa 5025 covid-19 jaǧdaiy tırkelgen. Onyŋ ışınde simptomdyq – 2572, simptomsyz – 2453. Al ötken täulıkte 14 adam virus jūqtyrǧan.
Şymkent aqparattyq-kommunikasiialyq ortalyǧy
Foto – S.Qosai
