سوتتىڭ كەسىرىنەن سوتتالا جازدادى

3626
Adyrna.kz Telegram

قازاقستانداعى اسكەري سوتتا العاش رەت كىسى ولىمىنە قاتىستى جالعان جالا جابۋ ءىسى توقتاتىلدى.  

قر ءىىم وڭتۇستىك وڭىرلىك اسكەري-تەرگەۋ باسقارماسىنىڭ اسا ماڭىزدى ىستەر جونىندەگى اعا تەرگەۋشىسى، ادىلەت مويورى گ.بەيسەنبيەۆ قر اسكەري سوتىنىڭ قىلمىستىق ىستەر جونىندەگى سوت القاسىنىڭ شەشىمىن ەسكەرە وتىرىپ، كاپيتان ا.ەلەمەسوۆكە قاتىستى قىلمىستىق ءىستى توقتاتتى.

جاسىراتىنى جوق، ەلىمىزدە جىل سايىن پروكۋرور دارحان شارىقباەۆ پەن سوت توراعاسى ەستاي سەكىلدى قۇزىرەتتى كىسىلەردىڭ كەسىرىنەن ناعىز قىلمىسكەرلەر انىقتالماي، تانىسى، اقشاسى جوقتار جازىقسىز جاپا شەگۋدە.

 

زاڭ عىلىمدارىنىڭ كانديداتى، پروفەسسور ايتمۇحانبەت كەمەلحانوۆ بىلىكتىلىگى مەن تاباندىلىعىنىڭ ارقاسىندا قورعاۋىنداعى جازىقسىز ازاماتتى تولىقتاي اقتاپ شىقتى.

قازاقستانداعى اسكەري قۇقىق سالاسىنىڭ نەگىزىن قالاعان ءبىرىنشى زاڭگەرگە كۇدىككە ىلىنگەن اسىلبەك ەلەمەسوۆتى اقتاۋ وڭاي بولعان جوق. الماتى گورنيزوندىق سوتىندا پروكۋرور دارحان شارىقباەۆ ەلەمەسوۆكە نەگىزسىز ايىپ تاعىپ، 3 جىلعا باس بوستاندىعىنان جانە كاپيتاندىق شەنىنەن ايىرۋدى سۇرادى. كەلەسى سوت وتىرىسىندا سوت توراعاسى ەستاي پروكۋروردىڭ نەگىزسىز ايىپتارىن ەسكەرە كەلە كۇدىكتىگە 2 جىل 6 اي باس بوستاندىعىن شەكتەۋ جازاسىن تاعايىندادى.

سوت توراعاسى ەستاي ۇكىم شىعارۋدا 

كىسى ولىمىنە قاتىستى وقيعاعا

2019 جىلدىڭ 19 شىلدەسىندە قۇرلىق اسكەرلەرىنىڭ اسكەري ينستيتۋتىندا اعا نۇسقاۋشى، مەحانيك-جۇرگىزۋشى ەفرەيتور ن.ايناقۇل مەن سەرجانت ق.يبرايموۆقا تيەسىلى بورتتىق ءنومىرى 007 متلب ماركالى اسكەري تەحنيكانى تازارتۋعا پارمەن بەرىلەدى. تاپسىرما بەرۋشى – وقۋ ۇدەرىستەرىن قامتاماسىز ەتۋ باتالونى، وقۋ-جاتتىعۋ ارتيللەريالىق باتارەياسىنىڭ قارۋ-جاراق جونىندەگى ورىنباسارى كاپيتان ا.ەلەمەسوۆ.

ءدال وسى كۇنى اتالعان باتارەيانىڭ كومانديرى كاپيتان جاقىپبەكوۆ ەڭبەك دەمالىسىندا بولسا، باتالوننىڭ قارۋ-جاراق جونىندەگى ورىنباسارى (اسكەري تەحنيكالارعا جاۋاپ بەرەتىن مامان) مايور ب.سادىروۆ رەسمي تۇردە دالەلدەنبەگەن «وتباسىلىق جاعدايىنا» بايلانىستى جۇمىسقا كەلمەگەن.

ساعات 12.55-تە اسكەري تەحنيكانى قىتايدان اكەلگەن ارنايى اپپاراتپەن (كەشەر) جۋىپ جاتقان ن.ايناقۇلدىڭ قاسىنا كەلگەن مينومەتتىك وقۋ ۆزۆودىنىڭ كەلىسىم-شارت بويىنشا اسكەري قىزمەتكەرى ر.جۇماباەۆ كەلىپ، تۇسكى تاماقتىڭ ۋاقىتى بولعانىن ايتىپ، 200 ۆاتتىق كەشەردى توقتان سۋىرماقشى بولعاندا، ونى توق سوعادى (ۇرادى). جۇماباەۆقا العاشقى مەديتسينالىق كومەك كورسەتىلگەنىمەن، 13.25-تە جەدەل جاردەم اۆتوكولىگىنىڭ ىشىندە كوز جۇمادى.

ءسويتىپ، قىلمىستىق ءىس سوت-مەديتسينالىق ساراپتاما قورىتىندىسى نەگىزىندە ر.جۇماباەۆتىڭ قازاسى «تەحنيكالىق ەلەكتر توعىنىڭ سوعۋىنان بولعان» دەگەن شەشىم شىعارعان. وسى وقيعاعا بايلانىستى اسكەري تەحنيكا قاۋىپسىزدىگىنە جاۋاپ بەرۋى ءتيىس مويور سادىروۆتى ەمەس، باتارەيانىڭ قارۋ-جاراق جونىندەگى ورىنباسارى كاپيتان اسىلبەك ەلەمەسوۆكە ايىپ تاعىپ،  2 جىل 6 ايعا باس بوستاندىعىن شەكتەدى.  

 

سوت ۇكىمىنەن كەيىنگى ارەكەت

ادۆوكات ا.كەمەلحانوۆ سوتتا ادىلەتسىز جەڭىلىس تاپقاننان كەيىن ەكىنشى ساتىلى سوتقا اپپەلياتسيالىق شاعىم ءتۇسىردى.

قر اسكەري  سوتىنىڭ  قىلمىستىق ىستەر جونىندەگى سوت القاسى اپەللياتسيالىق شاعىمدى قاراپ، ادۆوكات كەمەلحانوۆتىڭ پايداسىنا شەشتى.

 «قر قىلمىستىق پروتسەسسۋالدىق كودەكسىنىڭ  431 بابى 1 ءبولىمىنىڭ 8 تارماعىن، 443-ءشى جانە 444-ءشى باپتارىن باسشىلىققا الىپ، الماتى گارنيزونى اسكەري سوتىنىڭ 2020 جىلعى 3 اقپانداعى  "اسىلبەك الماگانبەتوۆيچ ەلەمەسوۆكە قاتىستى ۇكىمنىڭ كۇشى جويىلسىن جانە ءىس قىلمىستىق پروتسەسسۋالدىق كودەكسىنىڭ  323 بابىنا سايكەس پروكۋرورعا جىبەرىلسىن، سوتتالعان ا.ا.ەلەمەسوۆتىڭ جانە ونىڭ قورعاۋشىسى – ادۆوكات ا.ج. كەمەلحانوۆتىڭ اپپەلياتسيالىق شاعىمى ءىشىنارا قاناعاتتاندىرىلسىن", - دەگەن قاۋلىدا.

 

قر ءىىم وڭتۇستىك وڭىرلىك اسكەري-تەرگەۋ باسقارماسى ەكىنشى ساتىلى سوت شەشىمىنەن كەيىن:

1.قر قك 156 بابىنىڭ 3 بولىمىندە كورسەتىلگەن قر قم قااي-نىڭ وقۋ ورتالىعىنىڭ اسكەري قىزمەتشىسى كاپيتان ەلەمەسوۆكە قاتىستى قىلمىستىق قۇقىق                 بۇزۋشىلىق، قر قپك-ءنىڭ 35 بابى 1 ءبولىمى 2 تارماقشاسىنىڭ نەگىزىندە الدىن الا تەرگەۋدى توقتاتۋعا;

2.تەرگەۋ بارىسىندا انىقتالعان ايعاق زاتتار قر قم قااي وقۋ ورتالىعىنىڭ باسشىلىعىنا قايتارىلۋىنا;

3.ەلەمەسوۆكە قولدانعان بۇلتارتپاۋ شاراسى جويىلۋىنا;

4.قابىلدانعان شەشىم مۇددەلى تۇلعالارعا جەتكىزىلۋىنە;

5.قاۋلىنىڭ كوشىرمەسى الماتى گورنيزونى اسكەري پروكۋرورىنا جىبەرىلۋىنە قاۋلى شىعاردى.

 

جەڭىستەن سوڭ

قۇرلىق اسكەرلەرىنىڭ اسكەري ينستيتۋتىنىڭ كاپيتانى اسىلبەك ەلەمەسوۆ قىزمەتىنە قايتا ورالدى. ينستيتۋت ونىڭ جۇمىستان بوساتقاننان قايتا قابىلدانعانعا دەيىنگى ەڭبەكاقىسىن تولىق قايتاردى.

ادۆوكات ايتمۇحانبەت كەمەلحانوۆ پەن زاڭسىز ايىپتالعان اسىلبەك ەلەمەسوۆ الماتى گورنيزونىنىڭ اسكەري سوتىنا ماتەريالدىق جانە مورالدىق زياندى وتەۋگە تالاپ ارىز بەردى. وتەماقى مەملەكەتتىك قازىنانى يەلەنۋشى قارجى مينيسترلىگىنەن سوت شەشىمى ارقىلى وندىرىلەدى.

 

 

جاسۇلان ءناۋرىزالى،

«ادىرنا» ۇلتتىق پورتالى

 

پىكىرلەر