ەلىمىزدە بالالاردا عانا كەزدەسەتىن قاۋىپتى سيندروم پايدا بولدى

7372

ەلىمىزدە كوروناۆيرۋس جۇقتىرعان بالالار كاۆاساكي سيندرومىنا شالدىعۋدا. بۇعان دەيىن سيندروم كوروناۆيرۋس پاندەمياسى ءورشىپ تۇرعان ەلدەردە كەزدەسكەن ەدى.

كاۆاساكي سيندرومى - سيرەك كەزدەسەتىن اۋرۋ. ونى العاش رەت 1967 جىلى جاپون دارىگەرى انىقتاعان بولاتىن. سيندروم قان تامىرلارىنىڭ قابىنۋىمەن، اياق-قولدا بورتپەلەردىڭ پايدا بولۋىمەن، بەزدەردىڭ ىسىنۋىمەن جانە  ەرىننىڭ قۇرعاۋىمەن سيپاتتالادى. اۋرۋدىڭ بەلگىلەرى تەك بالالاردا كەزدەسەدى.

كوروناۆيرۋستىق پاندەميا باستالماستان بۇرىن كاۆاساكي سيندرومىنا قاتىستى الەمدىك ستاتيستيكا سالىستىرمالى تۇردە تومەن بولدى. اقش ۇلتتىق دەنساۋلىق ساقتاۋ ينستيتۋتىنىڭ مالىمەتى بويىنشا، سيندروم ازيا ەلدەرىندە ءجيى كەزدەسەدى، مىسالى، جاپونيادا جىلىنا 26 مىڭ بالا وسى اۋرۋمەن اۋىرادى. ال وتكەن جىلى اقش-تا بۇل سيندروم 4200 بالاعا اسەر ەتكەن.

الايدا، كوروناۆيرۋستىڭ ءورشۋى كاۆاساكي سيندرومىنىڭ ويانۋىنا الىپ كەلدى.  «The Lancet» مەديتسينالىق جۋرنالىنىڭ مالىمەتىنشە، سيندروم ەۋروپا ەلدەرىندە پاندەمياعا دەيىن ءار 20 000-شى بالادا انىقتالسا، قازىر بۇل سان ءدال 20 ەسە وسكەن. قازىرگى تاڭدا اۋرۋ ءار 1000-شى نارەستەگە اسەر ەتۋدە.

دارىگەرلەردىڭ ايتۋىنشا، كاۆاساكي سيندرومىنا شالدىققان بالا مىندەتتى تۇردە اۋرۋحانالىق ەمدەۋدى قابىلداۋى ءتيىس. ستاتيستيكاعا سايكەس، قاجەتتى ەم الماعان بالالاردىڭ 25% -ىندا سيندروم بەلگىلەرى جۇرەككە اسەر ەتكەن. وكىنىشكە وراي، بەس پايىز جاعدايدا مۇنداي اسقىنۋلار ەمدەۋ كەزىندە دە پايدا بولۋى مۇمكىن.

دەنساۋلىق ساقتاۋ مينيسترلىگىنىڭ سوڭعى مالىمەتى بويىنشا, ەلىمىزدە كاۆاساكي سيندرومىنا شالدىققان ءۇش بالا تىركەلگەن.

 

«ادىرنا» ۇلتتىق پورتالى

پىكىرلەر
رەداكتسيا تاڭداۋى