جەگەندى جەلكەدەن شىعارۋدىڭ ءتۇرلى ءتاسىلى

6329
Adyrna.kz Telegram

 

    بالەنشەنىڭ جەگەنى جەلكەسىنەن شىعىپتى. ونى ۇستاپ بەرگەن تۇگەنشە ەكەن. ءاي، بىراق، وزىنە دە سول كەرەك! دانىگىپ قويسا جارار ەدى-اۋ، قۇنىعىپ كەتتى عوي، پاقىر. ەندى نە ىستەيدى ەكەن؟ سوتتالادى عوي! مەرزىمى بىتكەنشە شارتتى تۇردە دە بوساپ شىعا المايدى دەيدى...

     ءيا! جوعارىداعىعا ۇقساس اڭگىمەلەرگە قۇلاعىمىز ۇيرەنىپ قالدى عوي ابدەن. قاتتى تاڭعالا قويمايمىز. كوبىسىنە «ااا»، «ەەە» دەپ وتىرا بەرەتىن حالگە جەتتىك. بىلتىرعى جىلمەن سالىستىرعاندا بيەنى بۇگىمەن،  تۇيەنى تۇگىمەن قاربىتا سالاتىندار 11 پايىزعا ارتىپتى ەل ىشىندە. جاقسىلىقتىڭ نىشانى ەمەس، ارينە! قاۋىپتى ءارى قورقىنىشتى. وسى ماسەلە ەل پرەزيدەنتىن دە ويلانتسا كەرەك. جاڭا زاڭعا قول قويدى. ەندى جەمقور اتاۋلى مەرزىمىنەن بۇرىن بوساپ شىقپايدى. ءاي، بىراق بۇل زاڭدى ولار پىسقىرا قويار ما ەكەن؟  زاڭ دەمەكشى الەمدىك تاجىريبەدە وسى ماسەلە قالاي ءوزى؟ جەمقوردى جازالاۋدىڭ قانداي تۇرلەرى بار؟ «قور»-لىقپەن وزگە ەلدەر قالاي كۇرەسەدى؟ ءۇڭىلىپ كورەيىكشى...

ۇرلاعانىڭدى ءۇش ەسە قايتارۋ جانە 15 جىل «بونۋس»

جەمقورلاردى تۇقىرتۋدا قاتال زاڭنىڭ ءبىرى اقش-تا قولدانىلادى. اتالعان ەلدىڭ زاڭناماسى بويىنشا پاراقورلىق ءپاسسيۆتى جانە اكتيۆتى دەپ قاراستىرىلادى. سايكەسىنشە، جازالانۋى ءتيىس قىلمىسكەر اقشانى ءۇش ەسە ۇستەمەمەن قايتارادى جانە 15جىلعا دەيىن باس بوستاندىعىنان ايىرىلادى.

ۇيەڭكى جاپىراقتى ەلدەگى جازالاۋ ءتۇرى

كانادا دا سىبايلاس جەمقورلىقپەن ۇستالعانداردى تۇرمە كۇتەدى. اتالمىش ەلدىڭ سوتىندا نەمەسە زاڭ شىعارۋشى ورگانىندا جۇمىس ىستەيتىن مەملەكەتتىك قىزمەتكەر قانداي دا ءبىر جەمقورلىق ارەكەتكە جول بەرسە، 14 جىلعا دەيىن تەمىر تورعا توعىتىلادى.

قىزمەتىنەن شەتتەتۋ

فينليانديانىڭ قىلمىستىق كودەكسىندە قانداي دا ءبىر لاۋازىمدى تۇلعا سىبايلاس جەمقورلىقپەن اينالىسسا، وعان ءارتۇرلى جازالار قاراستىرىلعان. ايىپپۇل سالۋ نەمەسە 2 جىلعا دەيىن باس بوستاندىعىنان ايىرۋ. سونىمەن قاتار، 2 اي مەن 4 جىل شاماسىندا جۇمىسىنان شەتتەتۋ، بەلگىلى ءبىر قىزمەتپەن اينالىسۋعا تيىم سالۋ سىندى جازالار جۇزەگە اسادى.

پاراقورلاردى ونلاين باقىلاۋ

        ازياعا اۋىسساق. بۇل قۇرلىقتا پاراقورلارمەن كۇرەستە وزگەشە ءادىس قولدانا بىلگەن ەلدىڭ ءبىرى - وڭتۇستىك كورەيا. كورەيادا 1999 جىلدان باستاپ OPEN باعدارلاماسى ىسكە قوسىلعان. باعدارلاما ارقىلى تۇرعىندار قاندايدا ءبىر سىبايلاس جەمقورلىققا قاتىستى ءىس-ارەكەتتىڭ كۋاسى بولعان جاعدايدا ءتيىستى ورىندارعا ءوز شاعىمدارىن تۇسىرە الادى.

راديكالدى جازالاۋ

پاراقورلاردى جازالاۋدا قاتاڭ ءتارتىپ ۇستاناتىن ەل – يران. سەبەبى، مۇندا جەمقوردىڭ جازاسى كوپ جاعدايدا – ءولىم. يراندا پارا كولەمىنىڭ از نەمەسە كوپ بولۋى ماڭىزدى ەمەس. بىلىققا قاتىسىڭ بولسا بولعانى جاعدايىڭ مۇشكىل دەگەن ءسوز. سونىمەن قاتار، جازانىڭ «جەڭىلدەۋ» ءتۇرى قاراستىرىلعان. ول – قىلمىسكەردىڭ ساۋساعىن شابۋ.

ميلليارد حالقى بار قىتايدا جەمقور قالاي جازالانادى؟

راديكالدى جازالاۋدى قولداناتىن ساناۋلى ەلدەردىڭ ساناتىندا – كورشىلەس قىتاي حالىق رەسپۋبليكاسى.  سەبەبى، اتالعان مەملەكەتتە 1980 جىلداردان بەرى قىلمىسكەرلەرگە قاتىستى اتۋ جازاسى كوپشىلىك الدىندا تۇراقتى تۇردە ورىندالىپ كەلەدى.

اعىن ايدىن، «ادىرنا» ۇلتتىق پورتالى

پىكىرلەر