جەتىسۋدا سىبايلاس جەمقورلىق ازايعان

465

الماتى وبلىسىندا ۇستىمىزدەگى جىلدىڭ ءبىرىنشى توقسانىندا سىبايلاس جەمقورلىق ەداۋىر تومەندەگەن. وتكەن جىلى 33 قىلمىس تىركەلسە، بيىل – 21 سىبايلاس جەمقورلىق سيپاتى بار ءىس تىركەلگەن. ناتيجەسىندە اتاۋلى قىلمىس ءتۇرى 36,4 پايىزعا كەمىگەن. وسى سىندى وڭ كورسەتكىش الماتى وبلىسىنىڭ اكىمى اماندىق باتالوۆتىڭ توراعالىعىمەن وتكەن وبلىستىق سىبايلاس جەمقورلىققا قارسى ءىس-قيمىل جونىندەگى ۆەدومستۆوارالىق كوميسسيانىڭ كەزەكتى وتىرىسىندا ءسوز بولدى.

كوميسسيا مۇشەلەرى، اۋدان، قالا اكىمدەرى، قۇقىق قورعاۋ ورگاندارىنىڭ، دەپارتامەنت، باسقارما باسشىلارى قاتىسقان سەلەكتورلىق رەجيمدەگى جيىندا ماڭىزدى ماسەلەلەر قارالدى. وتىرىستا قازاقستان رەسپۋبليكاسىنىڭ 2015-2025 جىلدارعا ارنالعان سىبايلاس جەمقورلىققا قارسى ستراتەگياسى، جۇمىسپەن قامتۋدىڭ 2020-2021 جىلدارعا ارنالعان جول كارتاسىن ىسكە اسىرۋ جايى، «جەتىسۋ – ادالدىق الاڭى» جوبالىق كەڭسەسىنىڭ اتقارعان جۇمىسى، مەملەكەتتىك تۇرعىن ءۇي قورىنان باسپانا ءبولۋ جونىندەگى تۇرعىن ءۇي كوميسسيالارىنىڭ قىزمەتىندە اشىقتىق قاعيداتتارىن قامتاماسىز ەتۋ بويىنشا قابىلدانىپ جاتقان شارالار جان-جاقتى تالقىلاندى.

قر سىبايلاس جەمقورلىققا قارسى ءىس-قيمىل اگەنتتىگىنىڭ وبلىس بويىنشا دەپارتامەنت باسشىسى ەرنار ماقاجانوۆ وڭىردە سىبايلاس جەمقورلىققا قارسى ءىس-قيمىل بويىنشا اتقارىلىپ جاتقان شارالارعا توقتالىپ، زاڭنامالىق نورمالارعا ەنگىزىلگەن وزگەرىستەردى ءتۇسىندىردى.

– اعىمداعى جىلدىڭ 5 ساۋىرىندە مەملەكەت باسشىسى قاسىم-جومارت توقاەۆ قول قويعان زاڭعا سىبايلاس جەمقورلىق سيپاتىنداعى بەلگىلەرى بار 15 اكىمشىلىك باپ بەرىلگەن. مىسالى، سىياقىلار، سىيلىقتار نەمەسە جەڭىلدىكتەر بەرگەنى ءۇشىن جەكە تۇلعالار 676-بابى بويىنشا 200 اەك كولەمىندە ايىپپۇل تولەيدى، بۇل شامامەن 600 مىڭ تەڭگە. ال ەگەر مۇنداي سىياقى نەمەسە سىيلىق زاڭدى تۇلعا تاراپىنان شىعاتىن بولسا، وندا مۇنداي ارەكەت 678-بابى بويىنشا سارالانادى جانە مۇندا ايىپپۇل 700 اەك-كە دەيىن وسەدى، بۇل 2 ملن. تەڭگەدەن جوعارى، - دەدى دەپارتامەنت باسشىسى.

كەلەسى كەزەكتە قر سىبايلاس جەمقورلىققا قارسى ءىس-قيمىل اگەنتتىگىنىڭ وبلىس بويىنشا دەپارتامەنتى جانىنداعى ارنايى مونيتورينگ توبىنىڭ جەتەكشىسى ۆيكتور تەن حالىقتىڭ قۇقىقتىق ساۋاتىنىڭ تومەندىگىن ءسوز ەتتى. اسىرەسە اۋىلدى جەردە تۇراتىن ازاماتتارعا ارنالعان الەۋمەتتىك ماڭىزى بار جوبالاردى جانداندىرۋدى ۇسىندى. ال «جەتىسۋ – ادالدىق الاڭى» جوبالىق كەڭسەسىنىڭ جۇمىسىمەن تانىستىرعان وبلىس اكىمىنىڭ ورىنباسارى رۋستام ءالي تۇرمىستىق سىبايلاس جەمقورلىقتى جويۋ ساياساتىن قالىپتاستىرىپ، حالىققا قولايلى جاعداي جاساۋ مەن مەملەكەتتىك مەكەمەلەردىڭ اشىقتىعىن قامتاماسىز ەتۋ ماقساتىندا اتقارىلعان شارالار جايىن تارازىلادى.

– جىل باسىنان بەرى جوبالىق كەڭسە تاراپىنان 116 مونيتورينگ جۇرگىزىلدى. دارىحانالارعا، ءدارىحانا قويمالارىنا ءدارى-دارمەكتەردىڭ شەكتى باعالارى بويىنشا 38 تەكسەرىس جۇرگىزىلدى. سونىمەن قاتار، ءارتۇرلى سالا ماماندارىمەن 30-دان استام كەزدەسۋ ءوتتى. «ءموبيلدى اۋىل»،  «ادال كومەك» جانە «Antikor.live» جوبالارى جۇيەلى تۇردە ىسكە اسىپ كەلەدى. وبلىس كولەمىندە الەۋمەتتىك جەلىلەر ارقىلى  100-دەن استام تىكەلەي ەفير ءوتىپ، وندا جەرگىلىكتى اتقارۋشى ورگانداردىڭ، باسقارما، دەپارتامەنت باسشىلارى، مەكتەپ ديرەكتورلارى ءسوز سويلەپ، حالىقتى قىزىقتىرعان سۇراقتارعا جاۋاپ بەردى، – دەدى وبلىس اكىمىنىڭ ورىنباسارى.

جۇمىسپەن قامتۋدىڭ 2020-2021 جىلدارعا ارنالعان جول كارتاسى اياسىندا اتقارىلعان جۇمىسپەن وبلىستىق قۇرىلىس باسقارماسىنىڭ باسشىسى داۋرەن جولجانوۆ تانىستىردى. ونىڭ سوزىنشە، وبلىس بويىنشا 14,2 ملرد. تەڭگە ءبولىنىپ، قارجى 100 پايىزعا يگەرىلگەن. ناتيجەسىندە 29 نىساننىڭ قۇرىلىسى جوسپارلانىپ، بىلتىر 11 نىسان پايدالانۋعا بەرىلگەن. قالعان 18-ءى 2021 جىلعا اۋىسقان. جۇمىسپەن قامتۋ ورتالىقتارى ارقىلى 468 ادام جۇمىسقا ورنالاستىرىلدى. اعىمداعى جىلى 6 مەكتەپتىڭ جانە ءبىر قالا سىرتىنداعى لاگەردىڭ قۇرىلىسى ءۇشىن 30,8 ملرد.تەڭگە ءبولۋ جوسپارلانعان. جىل سوڭىنا دەيىن بارلىق نىساندى پايدالانۋعا بەرۋ جوسپارلانىپ وتىر.

تۇرعىن ءۇي كوميسسيالارىنىڭ قىزمەتى جايلى تالدىقورعان قالاسىنىڭ اكىمى ەرجان جاسىباەۆ پەن ىلە اۋدانىنىڭ اكىمى باعدات قاراساەۆ بايانداما جاسادى. جىل سايىن وبلىس ورتالىعى مەن ىلە اۋدانىندا تۇرعىنداردىڭ سانى ارتىپ، تۇرعىن ءۇي كەزەگىنە تۇرۋشىلار كوبەيگەن. ايتالىق تالدىقورعان قالاسىندا حالىق سانى 176,2 مىڭ ادامدى قۇرايدى. مەملەكەتتىك تۇرعىن ءۇي قورىنان تۇرعىن ءۇي الۋعا كەزەكتە تۇرعان ازاماتتاردىڭ سانى – 14 567 ادام. ىلە اۋدانىندا بۇگىندە 4 253 ادام كەزەكتە تۇر. ايماق باسشىسى اماندىق عابباسۇلى «نۇرلى جەر»، «7-20-25» سىندى مەملەكەتتىك باعدارلامالار مەن «وتباسى بانكى» تۇرعىن ءۇي قۇرىلىس جيناق بانكى ارقىلى حالىقتى باسپانامەن قامتۋ، جاڭادان ۇيلەر سالۋ جونىندە ناقتى تاپسىرمالار بەردى.

وتىرىستى قورىتىندىلاعان وبلىس اكىمى اماندىق باتالوۆ پاندەميا كەزىندە سىبايلاس جەمقورلىققا قارسى كۇرەستى كۇشەيتۋ، بولىنگەن قارجىنى ءتيىمدى يگەرۋ، سەرۆيستىك اكىمدىكتەردى كوبەيتۋ، مەملەكەتتىك قىزمەتتىڭ ساپاسىن ارتتىرۋ تۋرالى ويىن ايتىپ، مەملەكەتتىك ورگانداردىڭ اشىقتىعىن قامتاماسىز ەتۋدى نىق نازاردا ۇستاۋدى تاپسىردى.

پىكىرلەر
رەداكتسيا تاڭداۋى