شىمكەنت – تۋريستەر ءۇشىن تارتىمدى قالا. قالادا تۋريستەر ءۇشىن بىرنەشە اقپاراتتىق كيوسكىلەر ورناتىلىپ، جۇمىسىن باستاعان ەدى. مامىر ايىندا اربات، اباي ساياباعى، جايلاۋكول، تاۋەلسىزدىك جانە ورتالىق ساياباقتاردا، سونىمەن قاتار تەمىرجول ۆوكزالى مەن اۋەجايلاردا ارنايى كەڭەس بەرۋ ورتالىقتار اشىلعان بولاتىن.
بۇگىندە 7 كيوسكىدە ءۇش ءتىلدى مەڭگەرگەن، تاجىريبەلى ماماندار جۇمىس ىستەيدى. قالاعا كەلگەن تۋريستەر ساياباق ماڭىنداعى كيوسكىلەردەن قالانىڭ تۋريستىك كارتاسىمەن تانىسىپ، قانداي ەرەكشە، تاڭداۋلى جەرلەر بار ەكەنىن بىلە الادى. سونداي-اق، كەڭەس بەرۋشى ماماندار شەتەلدەن كەلگەن قوناقتارعا اقىسىز گيد قىزمەتىن كورسەتۋدە.
كارانتيندىك رەجيم كەزىندە ونلاين فورماتتا قىزمەت كورسەتكەن ماماندار بۇگىندە سارسەنبى-جەكسەنبى كۇندەرى تاڭعى 9:00-دەن 19:00-گە دەيىن جۇمىس ىستەيدى. قازىرگى تاڭدا كيوسكىلەردەن كەڭەس الۋشى تۋريستەر اقپاراتتىڭ پايدالى بولعانىن ايتىپ، ءوز ريزاشىلىقتارىن بىلدىرۋدە.
جالپى ستاتيستيكالىق مالىمەتتەر بويىنشا، بۇگىنگە دەيىن تۋريزم باسقارماسىنىڭ اقپاراتتىق كيوسكىلەرىنە 1200-دەن اسا قازاقستاندىق جانە شەتەلدىك تۋريستەر قىزىعۋشىلىق تانىتىپ، كەڭەس العان.
شىمكەنت قالاسىنىڭ اقپاراتتىق-كوممۋنيكاتسيالىق ورتالىعى
