قاڭتاردىڭ قار سۋىرعان تاڭدارىنىڭ بىرىندە سكريپكالى ءبىر كىسى ۆاشينگتون مەتروسىنىڭ قالتارىستاۋ جەرىنە تۇرا قالىپ، اسپابىن قۇيقىلجىتىپ ويناي باستايدى. ول باحتىڭ التى پەساسىن 45 مينۋت بويى توقتاۋسىز ورىنداپ شىقتى. وسى ۋاقىت ارالىعىندا ونىڭ جانىنان 1100 ادام ءارى-بەرى ساپىرىلىسىپ، وتە شىقتى.
مۋزىكا ويناي باستاعان العاشقى ءۇشىنشى مينۋتتا ءوتىپ بارا جاتقان ەگدە كىسى قالت تۇرا قالىپ، مۋزىكانتقا ەداۋىر نازار سالىپ تۇردى. سوسىن، ەسىنە شۇعىل شارۋاسى تۇسكەندەي، اسىعا باسىپ جونىنە كەتتى. ەندى بىرەر مينۋتتان كەيىن جەدەل باسىپ كەتىپ بارا جاتقان ءبىر ايەل توقتاماستان سكريپكاشىنىڭ الدىنا بىرەر دوللاردى تاستاپ ءوتتى. ودان كەيىن ءبىر كىسى قابىرعاعا سۇيەنىپ، مۋزىكا تىڭداعىسى كەلگەندەي كەيىپ تانىتتى دا..، ساعاتىنا قاراعانى سول ەكەن، ول دا جۇگىرە باسىپ جونىنە كەتتى.
سانانى سولقىلداتا ويناعان سكريپكانىڭ سيقىرلى ۇنىنە ۇزاعىراق ايالداعان جاسى ۇشتەر شاماسىنداعى بالاقاي بولدى. الايدا، ونىڭ اناسى سۇيرەلەپ، ول جەردەن تەز ۇزاي بەردى. بۇل ماڭنان وتكەن بالاقايلاردىڭ بارلىعى دەرلىك مۋزىكا ۇنىنە ەلىتىپ، ۇزاعىراق تىڭداعىسى كەلدى. بىراق، بارلىعىنىڭ اتا-اناسى ولاردى سۇيرەلەۋمەن بولدى.
مۋزىكانت مۇدىرمەستەن 45 مينۋت كۇي تارتقاندا، نەبارى 6 ادام عانا كىشكەنە ۇزاعىراق ايالداعان. وتكىنشىلەردىڭ 20 شاقتىسى عانا تيىن-تەبەن تاستاپ، بارلىعى 32 دوللار جيىلعان. اقشا تاستاۋىن تاستاسا دا، بىردە-ءبىر ادام تۇشىنىپ مۋزىكا تىڭداماعان. مۋزىكانت ايگىلى تۋىندىلارىن ناشىنىنە كەلتىرىپ ورىنداپ بولعاننان كەيىن، وعان ەشكىم قول سوعىپ، قوشۋاق تا الماعان. ءتىپتى، ول ساعاتقا جۋىق سكريپكادا جانىن سالىپ ويناماعانداي، ەشبىر جان ەلەڭ دە قىلماپتى...
مىڭنان اسا ادام ءمان بەرمەي وتە شىققانىنا قاراماستان، ايگىلى باحتىڭ تۋىندىلارىنىڭ ەڭ كۇردەلىلەرىن اسقان شەبەرلىكپەن ورىنداپ شىققان الەمدىك دارەجەدەگى داۋلەسكەر سكريپكاشىلاردىڭ ءبىرى دجوشۋا بەلل ەدى. ونىڭ قولىنداعى مۋزىكا اسپابىنىڭ ءوزى 3,5 ميلليون دوللار تۇراتىن. سونىڭ الدىندا عانا بوستون تەاترىندا وتەتىن ونىڭ كونتسەرتىنىڭ بيلەتتەرى پىشاق ۇستىنەن ساتىلىپ كەتكەن بولاتىن. دجوشۋانىڭ كونتسەرتى ءۇشىن بيلەتتەردىڭ ەڭ ارزانى 100 دوللار ەكەنى جانە بار...
Washington Post گازەتى ەڭبەك ادامدارىنىڭ تالعامىن، كەزدەيسوق تاپ بولعان شىنايى ونەر تۋىندىسىن قالاي قابىلدايتىنىن انىقتاماق بوپ "دجوشۋا بەلل مەترودا جارناماسىز كۇي تارتادى" دەپ اتالاتىن الەۋمەتتىك جوبا ۇيىمداستىرعان ەكەن. اتالمىش تاجىريبەدەن كەيىن جوبانىڭ ۇيىمداستىرۋشىلارى "الەمدىك مۋزىكانىڭ حاس شەبەرى ورىنداعان ونەردىڭ وزىق تۋىندىسىنا بىرەر مينۋتىمىزدى ارناي الماساق، ومىردە ءسات سايىن جانىمىزدا بولىپ جاتقان ماڭىزدى وقيعالارعا ءمان بەرۋىمىز نەعايبىل!" دەگەن تۇجىرىمعا كەلىپتى...
قانات ەسكەندىر
