شىمكەنت قالالىق №1 كلينيكالىق اۋرۋحاناسىندا ەكى ناۋقاسقا بۇيرەك ترانسپلانتاتسياسى جاسالدى. دارىگەرلەر قوس انانىڭ بۇيرەگىن ناۋقاس بالالارىنا حيرۋرگيالىق جولمەن سالىپ بەردى.
بەيبىت سيدازيموۆ 2 جىلدان بەرى بۇيرەك جەتىسپەۋشىلىگى دەرتىمەن ەسەپتە تۇرادى. ناۋقاس بۇعان دەيىن توسەككە تاڭىلىپ، گەمودياليز اپپاراتىنا قوسىلعان. بۇيرەگىندە اقاۋى بار 33 جاستاعى ازاماتقا تۋعان اناسى دونور بولدى. دارىگەرلەر 1965 جىلعى ازاماتشانىڭ ءبىر بۇيرەگىن حيرۋرگيالىق جولمەن الىپ، تۋعان ۇلىنا ءساتتى قوندىرعان.
سونىمەن قاتار، ۇزاق جىلداردان بەرى اۋرۋدىڭ ازابىن تارتقان تۇيمەباي اسىلبەككە اناسى بيجانوۆا اققىز ءبىر بۇيرەگىن بەردى. تۋىستىق ترانسپلانتالوگيانى دارىگەرلەر 10 قىركۇيەك كۇنى جاساعان. ەكى ساعاتقا سوزىلعان بۇيرەك اۋىستىرۋ وتاسى ءساتتى اياقتالدى.
ايتا كەتەيىك، شىمكەنت قالالىق كلينيكالىق اۋرۋحاناسىندا ترانسپلانتاتسيالىق قىزمەت قارقىندى دامىپ كەلەدى. مۇندا 2013 جىلدان بەرى 160 بۇيرەك پەن 21 باۋىر الماستىرۋ وپەراتسياسى جاسالدى.
اۋرۋحانا ماتەريالدىق-تەحنيكالىق تۇرعىدان تولىق جابدىقتالعان. مۇندا اعزاداعى ورگانداردى اۋىستىرۋ جاعىنان تاجىريبەسى مول ماماندار جۇمىس ىستەيدى. اۋرۋحاناداعى گەمادياليز ورتالىعىندا بۇيرەك الماستىرۋ وتاسىن قاجەت ەتەتىن 400-گە جۋىق ناۋقاس ەسەپتە تۇر. دونور تابىلعان جاعدايدا بىلىكتى ماماندار ناۋقاستارعا ترانسپلانتاتسيا جاساۋعا دايىن.
شىمكەنت قالاسى اكىمىنىڭ ءباسپاسوز قىزمەتى
