بۇگىن كەشكىلىك بىشكەكتىڭ جۇزدەگەن تۇرعىنى الا-توو الاڭىنا نارازىلىققا شىقتى. ايتۋلارىنشا، سايلاۋ ناتيجەسى بۇرمالانعان. كەيبىر ادامدار جوعارعى كەڭەش (جوگوركۋ كەنەش – رەد.) عيماراتى مەن پرەزيدەنت اكىمشىلىگى عيماراتىنىڭ قورشاۋىن بۇزىپ كىرمەك بولعان. قورشاۋ ىشىنە بوتەلكە مەن تاس اتقىلاعان.
پوليتسيا وكىلدەرى الا-توو الاڭىنا نارازىلىققا شىعۋشىلارعا رەزەڭكە وق پەن كوزگە جاس اعىزاتىن گاز قولدانىپ، كۇشپەن تاراتىپ جىبەردى. قىرعىز اقپارات كوزدەرى كوشەلەردە نارازىلىققا شىعۋشىلاردىڭ سوڭىنا ءتۇسىپ، ولاردى ۇستاپ جاتقانىن جازۋدا.
قىرعىزستان دەنساۋلىق ساقتاۋ مينيسترلىگىنىڭ ءباسپاسوز حاتشىسى جىلدىز ايگەرچينوۆانىڭ ايتۋىنشا، الا-توو الاڭىندا ميتينگىگە شىققانداردى تاراتۋ كەزىندە كۇش قۇرىلىمدارىنىڭ ەكى قىزمەتكەرى جارالانعان، ەكەۋىنىڭ دە ميى شايقالعان. ولاردى "جەدەل جاردەم" قىزمەتى اۋرۋحاناعا الىپ كەتتى. سونداي-اق ميتينگكە شىققان 16 ادام اۋرۋحاناعا جەتكىزىلگەن.
كەشەلى بەرى قىرعىزستاننىڭ بەلسەندىلەرى سايلاۋ ناتيجەسى بۇرمالاندى دەپ بيلىگىن سىناپ، حالىقتى الاڭعا شىعۋعا ۇگىتتەگەن.
ايتا كەتەيىك، 4 قازاندا قىرعىز ەلىندە پارلامەنت سايلاۋى ءوتتى. قازىر جوعارعى كەڭەشتىڭ 120 ورىندىق مانداتىنا 7 پايىزدان كوپ داۋىس جيناعان ءتورت پارتيا ءوتىپ تۇر:
1) "بيريمديك" (بىرلىك) – 24,5 پايىز;
2)"مەكەنيم كىرگىزستان" (مەكەنىم – قىرعىزستان) - 23,88 پايىز;
3)"كىرگىزستان" – 8,76 پايىز;
ء4)"بۇتۇن كىرگىزستان" ء("بىرتۇتاس قىرعىزستان") – 7,13 پايىز داۋىس العان.
وسى ءتورت پارتيانىڭ ىشىندە ء"بىرتۇتاس قىرعىزستان" عانا وپپوزيتسيالىق باعىت ۇستانادى.
"ادىرنا" ۇلتتىق پورتالى
