اۋدان اكىمىنىڭ ايلىعى – 680 مىڭ تەڭگە

2842
Adyrna.kz Telegram

شىمكەنت قالاسىنداعى مەملەكەتتىك ورگان باسشىلارى مەگاپوليس تۇرعىندارىن ايلىق جالاقىلارىمەن تانىستىرۋدا. اتالعان اكتسيا «شىمكەنت-ادالدىق الاڭى» جوبالىق كەڭسەسىنىڭ باستاماسىمەن قولعا الىنىپ، «جەمقورلىق بىزگە جات» دەپ اتالدى. بۇل تۋرالى شىمكەنت قالالىق سىبايلاس جەمقورلىققا قارسى دەپارتامەنتتىڭ ءباسپاسوز قىزمەتىنە سىلتەمە جاساپ  no-comment.kz حابارلادى.

اتالعان شارانىڭ نەگىزگى ماقساتى - مەملەكەتتىك ورگانداردىڭ باسشىلارىن پاراساتتىلىق جانە اشىقتىق قاعيداتتارىن ۇستانۋعا شاقىرۋ بولىپ تابىلادى.

«اكتسيانى مەملەكەتتىك ورگان باسشىلارىمەن قاتار، سپورت، دەنساۋلىق ساقتاۋ، ءبىلىم سالاسىنىڭ جەتەكشىلەرى قولداپ، جالاقىلارىمەن قاتار جەمقورلىقتىڭ الدىن الۋ ماقساتىندا اتقارىلعان جۇمىستاردان دا حاباردار ەتۋدە. اكتسيا قورىتىندىسىمەن مەملەكەتتىك ورگاندار باسشىلارىنىڭ اشىقتىعىنا باعا بەرىلەتىن بولادى» - دەيدى «شىمكەنت-ادالدىق الاڭى» جوبالىق كەڭسەسىنىڭ باسشىسى جاني قامبار.

«جەمقورلىق بىزگە جات» اكتسياسى اياسىندا العاش بولىپ جالاقىلارىنان حاباردار ەتكەن اباي اۋدانىنىڭ اكىمى بۇحارباي پارمانوۆ 680 مىڭ تەڭگە الاتىنىن حابارلاسا، ءال-فارابي اۋدانىنىڭ اكىمى عابيت ماۋلەنقۇلوۆ 550 مىڭ تەڭگەنى قۇرايتىنىن جەتكىزدى.

ال،قالالىق توتەنشە جاعدايلار دەپارتامەنتىنىڭ باسشىسى نۇربولات دەربىسوۆ 546 مىڭ، ەڭبەك،الەۋمەتتىك قورعاۋ جانە كوشى-قون دەپارتامەنتى باسشىسىنىڭ م.ا. تورەحان داۋىتوۆ 246 مىڭ، ءال-فارابي اۋدانىنىڭ مەملەكەتتىك كىرىستەر باسقارماسىنىڭ باسشىسى باعداۋلەت اشەنوۆ 153 مىڭ، كوركەم گيمناستيكادان قر ۇلتتىق قۇراماسىنىڭ باس باپكەرى ءاليا ءجۇسىپوۆا 250 مىڭ، دياگنوستيكالىق ورتالىعىنىڭ ديرەكتورى شولپان مىرزاحمەتوۆا 330 مىڭ، №1 قالالىق كلينيكالىق اۋرۋحاناسى باس دارىگەرىنىڭ ورىنباسارى تالعات شاۋەنوۆ 200 مىڭ، «دارىن» ورتالىعىنىڭ ديرەكتورى 210 مىڭ تەڭگە الاتىنىن جاريالادى.

«الداعى ۋاقىتتا باسقا دا مەملەكەتتىك مەكەمەلەردىڭ باسشىلارىنىڭ ايلىق جالاقىلارىمەن قاتار، جەمقورلىقتىڭ الدىن الۋ ماقساتىندا اتقارعان جۇمىستارىمەن تانىستىراتىن بولامىز» - دەيدى ج.قامبار.

فوتو اشىق دەرەككوزدەن الىندى.

پىكىرلەر