«باس رەداكتورلار كلۋبى» قوعامدىق بىرلەستىگى 200-دەن اسا رەسپۋبليكالىق جانە ايماقتىق بۇقارالىق اقپارات قۇرالدارى باسشىلارىنىڭ باسىن بىرىكتىرەدى.
«وقۋلىق» رەسپۋبليكالىق عىلىمي-پراكتيكالىق ورتالىعىنىڭ ديرەكتورى عاني بەيسەمباەۆ پەن «باس رەداكتورلار كلۋبى» قوعامدىق بىرلەستىگىنىڭ پرەزيدەنتى بيبىگۇل جەكسەنباي وزارا ىنتىماقتاستىق تۋرالى مەموراندۋمعا قول قويدى. قول قويۋ راسىمىنە باس رەداكتورلار كلۋبىنىڭ مۇشەلەرى جانە ايماقتىق باق باسشىلارى قاتىسىپ، ءوزارا پىكىرالماسۋ ونلاين رەجيمىندە ءوتتى، دەپ حابارلايدى Almaty.tv.
تاراپتار ءبىرىنشى كەزەكتە وقۋلىق مازمۇنىنىڭ ساپاسىن ارتتىرۋ مەن ساراپتامالىق قوعامداستىقپەن ىنتىماقتاستىق بويىنشا اقپاراتتىق ماسەلەلەردى دامىتۋ جانە قازىرگى تاڭدا كۇن تارتىبىندە وتكىر تۇرعان كىتاپ وقۋ ساۋاتتىلىعىن كوتەرۋ باعىتتارى بويىنشا ۋاعدالاستى.
شارا بارىسىندا ع.بەيسەمباەۆ مەملەكەت باسشىسىنىڭ ۇلتتىق قوعامدىق سەنىم كەڭەسىندە ايتقان بۇقارا حالىقتى كىتاپ وقيتىن ۇلتقا اينالدىرۋ جانە ەل ازاماتتارىن كىتاپ مادەنيەتىنە باۋلۋعا قاتىستى تاپسىرمالارىن ورىنداۋ بويىنشا مەديا الىپتارىمەن تىزە قوسا، بىرلەسىپ جۇمىس جاسايتىن كەزدىڭ كەلگەنىن اتاپ ءوتتى. سونىمەن قاتار ول وسى ىنتىماقتاستىق اياسىندا اقپاراتتىق سۇيەمەلدەۋگە يەك ارتىپ، وسكەلەڭ ۇرپاقتىڭ وقۋعا دەگەن سۇيىسپەنشىلىگىن ارتتىرۋعا باعىتتالعان جالپىحالىقتىق فلەشموب وتكىزۋ تۋرالى ۇسىنىس جاسادى.
«بالانىڭ وقۋعا دەگەن قىزىعۋشىلىعى، قورشاعان ورتانى كىتاپ ارقىلى تانۋى – بۇقارالىق اقپارات قۇرالدارىنىڭ دا باستى نازارىندا بولۋعا ءتيىس. ويتكەنى بۇل ءتىل مەن ءدىلدى، ەكونوميكانى دا قاتار قامتيدى. ەگەر وسى باعىتتا ءسىز بەن ءبىز بولىپ، ناتيجەگە دەن قويا ىنتىماقتاسا قوزعالساق، وندا الداعى بەس جىلدىڭ كولەمىندە قازاق باق-نىڭ دامۋىنا دا داڭعىل جول اشىلار ەدى»، –دەدى ع.بەيسەمباەۆ.
«ءبىزدىڭ ۇيىمدار اراسىندا جاسالعان مەموراندۋمنىڭ جوعارى قۇندىلىعى مەن مازمۇنىن اتاپ وتكىم كەلەدى. باس رەداكتورلار كلۋبىنىڭ بارلىق مۇشەلەرىنىڭ اتىنان «وقۋلىق» ورتالىعىنا الەۋمەتتىك ماڭىزدى قىزمەتىندە ۇلكەن تابىس تىلەيمىن جانە جەمىستى ىنتىماقتاستىق پەن بىرلەسكەن جوبالاردى جۇزەگە اسىرۋعا نيەتتىمىز»، – دەدى ب.جەكسەنباي.
ەستەرىڭىزگە سالا كەتەيىك، «باس رەداكتورلار كلۋبى» قوعامدىق بىرلەستىگى 200-دەن اسا رەسپۋبليكالىق جانە ايماقتىق بۇقارالىق اقپارات قۇرالدارى باسشىلارىنىڭ باسىن بىرىكتىرەدى.
«وقۋلىق» رعپو ءبىلىمنىڭ مازمۇنىن باعالاۋ، وقۋلىقتار مەن وقۋ-ادىستەمەلىك كەشەندەردى ساراپتاۋ ارقىلى ءبىلىمنىڭ ساپاسىن قامتاماسىز ەتۋگە اتسالىسادى. ورتالىق ءوزىنىڭ قۇزىرەتى شەگىندە قر ءبىلىم جانە عىلىم مينيسترلىگىنىڭ مىندەتتەمەلەرىن ورىنداپ، وقۋلىقتاردىڭ ساپاسىن ارتتىرۋ، سونداي-اق وسكەلەڭ ۇرپاقتىڭ بىلىمىن جەتىلدىرۋ باعىتىندا جۇمىس ىستەيدى.
