2020 جىلدىڭ 14 جەلتوقسانى نۇر-سۇلتان قالاسىندا «اقىندار اۋىلدى جىرلايدى» اتتى ادەبي-پوەتيكالىق كەشى ءوتتى. ءىس-شاراعا «اۋىل» حالىقتىق-دەموكراتيالىق پاتريوتتىق پارتياسىنىڭ توراعاسى ءالي بەكتاەۆ، قازاقستان رەسپۋبليكاسى پارلامەنتى ءماجىلىسىنىڭ دەپۋتاتتىعىنا كانديداتتار داۋلەتكەرەي كاپۇلى مەن زەيىن الىپبەك قاتىستى.
سونىمەن قاتار، رۋحاني كەشكە پارتيانىڭ 2017 جىلدان بەرى جىل سايىن وتكىزىپ كەلە جاتقان «اۋىلىم - التىن تۇعىرىم» ونلاين-بايقاۋىنىڭ جەڭىمپازدارى مەن قاتىسۋشىلارى دا جينالدى. اتالعان بايقاۋدىڭ باستى ماقساتى - ۇلتتىق قۇندىلىقتاردى دارىپتەۋ جانە اۋىلدىڭ رۋحاني ءومىرىن، تىنىس-تىرشىلىگىن، اۋىلدا بولىپ جاتقان الەۋمەتتىك-ەكونوميكالىق پروتسەستەردى سيپاتتاۋ ارقىلى ۇلتتىق قۇندىلىقتاردى ناسيحاتتاۋ.
كونكۋرس 2017-2020 جىلدارى اراسىندا 4 رەت وتكىزىلىپ، مىڭنان استام ەسسە، ولەڭدەر مەن درامالار پارتيا قورجىنىنا تۇسكەن بولاتىن. سولاردىڭ بارلىعى 12 تومدىق جيناققا كىرىپ، كىتاپ بولىپ جارىق كوردى.
كەش بارىسىندا ءسوز العان پارتيا توراعاسى ءالي بەكتاەۆ: «اۋىل تاقىرىبى – ەشقاشان تاۋسىلمايتىن، ەش شەكاراسى جوق، ەشتەڭەمەن شەكتەلمەيتىن كۇردەلى تاقىرىپ ەكەنىنە كوزىمىز جەتە ءتۇستى. اۋىلدىڭ قاسيەتى مەن كيەسىن كورسەتۋدىڭ جاقسى ءبىر جولى – ادەبي كونكۋرستار ارقىلى دارىپتەۋ ەكەنى بەلگىلى. اۋىل تاقىرىبىن ءسوز ەتكەن ەڭ مىقتى شىعارمالارعا ونلاين بايقاۋ جاريالادىق. پوەزيا، پروزا، دراما دانرلارى بويىنشا وتكەن بايقاۋعا ەلگە تانىمال اقىن-جازۋشىلار قازىلىق ەتتى. بۇل يگى باستاما داستۇرگە اينالىپ، جىل سايىن وتكىزىلىپ كەلەدى. سول ارقىلى ەل اراسىنان قانشاما مىقتى جاس تالانتتار جارىققا شىقتى»، - دەپ اتاپ ءوتتى.
اقىن، ادەبيەتتانۋشى داۋلەتكەرەي كاپۇلىنىڭ ايتۋىنشا، ۇلتتىق نەگىز، ۇلتتىق بولمىس حاقىنداعى تولعامنىڭ كورىنىسىن اقىن-جازۋشىلاردىڭ شىعارماسىنان كەرۋگە بولادى. قازاقتىڭ ءسوز ونەرى ىقىلىم زامانداردان قالىپتاسىپ، رۋحاني نەگىزىمىزگە اينالىپ، ۇلت رەتىندەگى تانىم-تۇسىنىكتەن، بولمىس-بىتىمنەن، تۇتاستىقتان ەش ۋاقىتتا اجىراماي كەلدى. جىراۋلاردىڭ تولعاۋلارى، جىرشىلاردىڭ توكپەسى، ءتىپتى كۇيشىلەردىڭ ساۋساعىنان توگىلگەن كۇمبىرلى كۇيدىڭ وزىندە ۇلتتىق ءنار، ۇلتتىق بوياۋ، ۇلتتىق سارىن مەن ۇلتتىق قۇندىلىق اجىراماي، ءبىرتۇتاس، ۇندەسىپ تۇرادى.
ونىڭ ويىنشا، قازاق حالقىنىڭ ءبىر ەرەكشەلىگى ونىڭ ۇلتتىق بولمىسى مەن تۇرمىس-تىرشىلىگى، ۇلت رەتىندەگى سالت-ساناسى، دۇنيەتانىمى، تىپتەن ويلاۋ جۇيەسى، ءىس-ارەكەتى دە ءبىر-بىرىمەن استاسىپ، ساباقتاسىپ جاتقاندىعىندا.
– ءدال قازىر، جوعارى تەحنولوگيالىق زامان ورناپ، ۋربانيزاتسيا شارىقتاپ جاتقاندا وسكەلەڭ ۇرپاققا ۇلتتىق ەرەكشەلىكتەرىمىزدى ۇمىتتىرماۋىمىز كەرەك. وسىعان وراي ۇلت ۇيىتقىسى – اۋىلدا ساقتالعان قازاقى بولمىسىمىزدى قالا جاستارىنا جەتكىزىپ، ولاردىڭ ساناسىنا تەرەڭ ءسىڭدىرۋىمىز كەرەك. تەك سولاي عانا «اۋىل» پارتياسى سايلاۋالدى باعدارلاماسىندا ايتىلعان ۇلتتىق يدەولوگيانى نەگىزگە الىپ، تامىرىمىزدان اجىراماي جاڭا قوعام قۇرۋعا مۇمكىندىك تۋادى، - دەپ تۇيىندەدى داۋلەتكەرەي كاپۇلى.
پوەزيالىق كەش باراسىندا ءا. سەرىكباي، ت. مەرگەنباي، ءا. دۇيسەنباي، ر. قابيدوللين، ا. اقجىگىت. ك. ايتباەۆ قاتارلى اقىندار تاۋەلسىزدىك كۇنىنە ارنالعان جىرلارىن وقىدى.
وزگە دە اقىندار ولەڭدەرىن وقىپ، انشىلەر دومبىرادا انمەن شاشۋ شاشتى.
جاس اقىن-جازۋشىلار پارتيا قاتارىن تولىقتىرىپ، مۇشەلىككە ءوتتى.
قورىتىندى ءسوز العان جازۋشى توكەن الجانتەگى «مەن وسى كۇنگە دەيىن بىردە ءبىر پارتياعا مۇشە بولعان ەمەسپىن. الايدا، «اۋىل» پارتياسىنىڭ اتقارىپ جاتقان ىرگەلى ىستەرىن، ۇلانقايىر شارۋالارىن كورىپ، ءوز ريزاشىلىعىمدى جاسىرا المادىم. ەلدىڭ وزەگى بولعان اۋىلداردىڭ مۇڭ-مۇقتاجىن، قاجەتىن جوعارىعا جەتكىزىپ، قازىرگى ماڭىزدى تاقىرىپتاردىڭ بىرىنە اينالعان اۋىل تاعدىرى ءۇشىن جاساپ جاتقان جۇمىستارىڭىزعا تەك قانا ساتتىلىك تىلەيمىن!»، دەدى.
