قازاقستان پراۆوسلاۆ شىركەۋىنىڭ باسشىسى، استانا جانە قازاقستان ءميتروپوليتى الەكساندر قازاقستاننىڭ تۇڭعىش پرەزيدەنتىنە «العىس» وردەنىن تابىس ەتتى، دەپ حابارلايدى «ادىرنا» ءتىلشىسى تۇڭعىش پرەزيدەنتتىڭ رەسمي سايتىنا سىلتەمە جاساپ.
سونداي-اق، ول نۇرسۇلتان نازارباەۆتىڭ ەلىمىزدەگى دىنارالىق كەلىسىمدى نىعايتۋعا قوسقان ۇلەسىن اتاپ ءوتتى.
«ءسىز قازاقستاننىڭ وركەندەۋى جولىندا كوپ شارۋا اتقاردىڭىز. ەڭ باستىسى – دىنارالىق تاتۋلىق پەن ۇلتارالىق كەلىسىم. بۇل – حالىققا جايلى، بەرەكەلى جانە جاقسى ءومىر سۇرۋگە، مەملەكەتتىڭ دامۋىنا مۇمكىندىك بەرەتىن قوس تىرەگىمىز. قالىڭ كوپشىلىكتىڭ اتىنان سىزگە زور العىس ايتۋعا رۇقسات ەتىڭىز. ءسىز بار عۇمىرىڭىزدى تۋعان جەرگە قىزمەت ەتۋگە ارنادىڭىز»،-دەدى استانا جانە قازاقستان ءميتروپوليتى.
«ادىرنا» ۇلتتىق پورتالى
