قۋانىش ەدىلحانتەگى: ناۆالنىيدى قولداۋىمىز كەرەك پە؟

3661
Adyrna.kz Telegram

كورىپ وتىرعانىمىزداي، رەسەيدە كەشەگى قارقىن جوق، باسىلىپ قالعان. ۋكرايناداعى مايدان سياقتى تابانداپ تۇرىپ الماسا بۇدان تۇك تە شىقپايدى دەگەنمىن، سول راسقا اينالدى. ەندى ءبىر اپتادان كەيىن جينال نە، جينالما نە - ودان تۇك تە وزگەرمەيدى مەنىڭشە، سەبەبى جاعداي سول حاباروۆسكىدەگىدەي بولادى دا قويادى. حاباروۆسكىدە ادامدار جارتى جىلدان استام كوشەگە شىعىپ ءجۇردى - سوندا نە ءبىتىردى؟ فۋرگالدى ءبارىبىر بوساتقان جوق. بۇكىل ءسىبىر قولداپ شىعادى دەپ ەدى، ودان دا تۇك شىقپادى.

وسى جاعدايدىڭ ءبىز ءۇشىن ۇلكەن پليۋس جاعى بار. ول مىنادا: ەگەر قارسىلىق اكتسياسى جەڭىپ، ايتالىق پۋتين ورنىنان كەتىپ ورنىنا ناۆالنىي كەلدى دەلىك. مۇنداي جاعدايدا ناۆالنىي ءوزىنىڭ باتىس كوشباسشىلارىمەن تانىستىعىن، كەيبىرىمەن دوستىعىن پايدالانىپ رەسەيگە سالىنعان سانكتسيالاردى الدىرىپ تاستاۋى مۇمكىن. مىسالى فرانتسيا، گەرمانيا دەگەندەر تەك اقش-تان "ۇيالعاننان", جالپى تەندەنتسيا سولاي بولعاندىقتان جۇرگەن سياقتى. كەزىندە سانكتسيا سالۋدان باستى سكريپكا ءرولىن اقش پەن كانادا ورىنداپ وتىردى. ترامپ ول سانكتسيالاردى الىپ تاستاۋعا الدەقانداي سەبەپتەرمەن كىدىرىپ قالدى. شاماسى بىردەن ولاي جاساۋعا باتا الماعان بولۋى كەرەك. ەسەسىنە ەشقانداي سانكتسيا سالمادى دا، كونگرەسستىڭ ءار التى اي سايىن سانكتسيا سالىپ وتىرۋ، بۇرىنعىلارىنىڭ ورىندالىسىن قاتاڭ باقىلاپ ەسەپ الىپ وتىرۋ دەگەن زاڭىن دا ورىندامادى. كەلەسى مەرزىمگە قايتا سايلانام، سوندا كىرىسەم دەپ ويلاعان بولۋى كەرەك.

ەگەر ناۆالنىي ەۋروپانىڭ سانكتسياسىنان قۇتىلسا، اقش تا ءوز پوزيتسياسىن جۇمسارتا باستاۋى مۇمكىن ەدى، ويتكەنى ولاردىڭ ءىسى رەسەي حالقىندا ەمەس، پۋتين مەن ونىڭ اينالاسىنداعى وليگارح دوستارىندا. مۇنداي جاعدايدا ولار سانكتسيادان قۇتىلىپ، ەكونوميكالىق جاعدايىن تۇزەپ الۋى مۇمكىن ەدى، ال ول دەگەن - رەسەيدىڭ ىشىندەگى از حالىقتار، سىرتىنداعى بىزدەر سياقتى ەلدەر سول بۇرىنعى قۇلدىق قامىتىندا ءالى بىرنەشە جىلدار وتىرا بەرەر ەدىك دەگەندى عانا بىلدىرەدى. ويتكەنى ناۆالنىي وتە ۇلتشىل (جاقسى ماعىناسىندا ەمەس), يمپەرشىل، بارىپ تۇرعان ءناتسيستىڭ ءوزى. ونىسىن ءوزى ايتىپ تا ءجۇر. مىسالى قىرىم تۋرالى ول ونىڭ رەسەيگە قوسىلعانى وتە دۇرىس بولدى دەپ ەسەپتەيدى، تاعى سول سياقتى ايتقاندارى كوپ.

بىرەۋلەر ەگەر ول ولاي سويلەمەسە رەسەيلىكتەردىڭ قولداۋىنا يە بولا الماس ەدى، سوندىقتان سولاي سويلەۋگە ءماجبۇر دەيدى. ولاي ەمەس. راسىندا ونىڭ پۋتيننەن ەش ايىرماسى جوق، باتىستىق ۇلگىدەگى باسشى ەمەس. ەرتەسىنە-اق قازاقتاردان 1930-31 جىلعى اشارشىلىق ءۇشىن كەشىرىم سۇرايدى دەۋ ۇلكەن ابەستىك.

سوندىقتان ءبىزدىڭ بارلىعىمىز ءۇشىن ازىرگە ءپۋتيننىڭ وتىرا بەرگەنى ءتيىمدى. رەسەيدى ابدەن ىدىراتسىن، ىشىندەگى ەلدەر تاۋەلسىزدىك السىن، تەك سوندا عانا بىزدەر دە شىن تاۋەلسىزدىككە قول جەتكىزىپ قالارمىز. سوندىقتان قازاقتاردىڭ ناۆالنىيدى قولداپ، تىم شالا بۇلىنە بەرمەگەندەرى دۇرىس. ونى تەك ورىس تىلدىلەر مەن ماقتاباستار عانا قولداۋى مۇمكىن دەپ ويلايمىن. ازىرگە كۇتەمىز. ءبىز ءۇشىن ەڭ ماڭىزدىسى ەلدىك مۇددە، شىن تاۋەلسىزدىك!

پىكىرلەر