ماڭعىستاۋ وبلىسىندا قازاقستاندا العاش رەت جاس بالاعا قاتىستى جىنىستىق زورلىق-زومبىلىق جاساعانى ءۇشىن ءومىر بويىنا باس بوستاندىعىنان ايىرۋ جازاسى تاعايىندالدى، دەپ حابارلايدى «ادىرنا» ۇلتتىق پورتالى ماڭعىستاۋ وبلىستىق سوتىنىڭ ءباسپاسوز قىزمەتىنە سىلتەمە جاساپ.
سۋديا ءىستى 25 قاڭتاردا مەملەكەتتىك ايىپتاۋشىنىڭ، جابىرلەنۋشىنىڭ زاڭدى وكىلىنىڭ، سوتتالۋشىنىڭ جانە ونىڭ قورعاۋشىسىنىڭ قاتىسۋىمەن جابىق تارتىپپەن قارادى.
پروكۋرور سوتتان سوتتالۋشىعا ءومىر بويى باس بوستاندىعىنان ايىرۋدى تاعايىنداۋدى سۇرادى، ونىمەن جابىرلەنۋشىنىڭ زاڭدى وكىلدەرى كەلىستى.
- سوت سوتتالۋشى ءوزىنىڭ تانىسىنىڭ پاتەرىنە وتكەن جىلدىڭ 28 مامىرىندا تۇنگى ۋاقىتتا كەلگەنىن انىقتادى. ول ماس كۇيىندە بولعان. جابىرلەنۋشىنىڭ اناسىنىڭ جوقتىعىن پايدالانىپ، بالانىڭ جاس ەكەنىن بىلە وتىرىپ، ول جابىرلەنۋشىنىڭ دارمەنسىز جاعدايىن پايدالاندى. سوتتالۋشى بالانى بەتىنە جانە باسىنا بىرنەشە رەت ۇرىپ، فيزيكالىق زورلىق-زومبىلىق جاسادى. وسىدان كەيىن ول بالاعا قاتىستى زورلاۋ جانە باسقا دا جىنىستىق ارەكەتتەر جاسادى. كىنا سەنىمدى تۇردە انىقتالعاندىقتان، سوت بارلىق ەپيزودتار بويىنشا ۇكىم شىعاردى. قىلمىستىق قۇقىق بۇزۋشىلىقتار جاسالعان كەزدە ماس بولۋ جاعدايى اۋىرلاتاتىن ءمان-جاي دەپ تانىلدى. سۋديا قىلمىستاردىڭ سيپاتى مەن دارەجەسىن ەسكەرە وتىرىپ، سوتتالۋشىعا قازاقستان رەسپۋبليكاسى قىلمىستىق كودەكسىنىڭ 58 - بابىنىڭ 4-بولىگىنە سايكەس ءومىر بويى باس بوستاندىعىنان ايىرۋ تۇرىندەگى جازا تاعايىندادى، - دەپ حابارلادى سوتتىڭ ءباسپاسوز قىزمەتى.
ەگەر قورعاۋشى نارازىلىق بىلدىرمەسە نەمەسە شاعىمدانباسا، ۇكىم زاڭدى كۇشىنە ەنەدى.
