قازاقستاندا رەپەتيتورلىق ورتالىقتاردىڭ قىزمەتىن زاڭمەن رەتتەۋ جوسپارلانىپ وتىر، دەپ حابارلايدى "ادىرنا" ۇلتتىق پورتالى.
بۇل تۋرالى وقۋ-اعارتۋ مينيسترلىگى مالىمدەدى.
مينيستر جۇلدىز سۇلەيمەنوۆانىڭ ايتۋىنشا، جاڭا زاڭنامالىق وزگەرىستەر اياسىندا رەپەتيتورلىق ورتالىقتاردىڭ جۇمىسى، سالىق تولەۋى جانە اتا-انالار مەن وقۋشىلار الدىنداعى جاۋاپكەرشىلىگى قاراستىرىلادى. سونىمەن قاتار مەكتەپ مۇعالىمدەرىنىڭ ءوز وقۋشىلارىنا اقىلى تۇردە قوسىمشا ساباق وتكىزۋىنە تىيىم سالۋ ۇسىنىلىپ وتىر.
«مۇعالىم ءوزىنىڭ ساباق بەرەتىن وقۋشىسىنان قوسىمشا قارجى الا المايدى»، – دەدى جۇلدىز سۇلەيمەنوۆا.
مينيسترلىك ۇبت-دان جوعارى ناتيجە كورسەتكەن تالاپكەرلەرگە كولىك پەن قىمبات سىيلىق ۇسىنىپ جۇرگەن دايىندىق ورتالىقتارىنىڭ ارەكەتىنە دە نازار اۋداردى. ءمينيستردىڭ ايتۋىنشا، بۇل ازىرگە ورتالىقتاردىڭ جارنامالىق ءتاسىلى رەتىندە قاراستىرىلىپ وتىر. الايدا الداعى ۋاقىتتا زاڭناماعا وزگەرىستەر ەنگىزىلگەننەن كەيىن بۇل ماسەلە قايتا قارالۋى مۇمكىن.
ءوز كەزەگىندە ساياسات نۇربەك كەيبىر ءبىلىم بەرۋ ورتالىقتارىنىڭ «شەكتەن شىعىپ كەتكەنىن» ايتتى.
«بۇل – ماركەتينگ. ياعني ء“بىزدىڭ ورتالىققا كەلسەڭىز، بالاڭىز ەڭ جوعارى بالل جينايدى” دەگەن جارناما ءتاسىلى. بىراق كەيبىر ورتالىقتار وسى ماسەلەنىڭ اينالاسىندا شامادان تىس اجيوتاج قالىپتاستىرىپ وتىر»، – دەدى مينيستر.
