مۇعالىمدەردى تىم قاتتى شەكتەپ تاستاعان - ۇستاز ادىلەت يسابەكوۆ

3116
Adyrna.kz Telegram

كوز الدىڭىزعا قازىرگىنىڭ مۇعالىمىن قالاي ەلەستەتەسىز؟ ول قانداي بولۋى قاجەت؟ البەتتە، بۇل تۇرعىدا اركىمنىڭ قيالى ءارتۇرلى شارىقتايدى.

ءبىرى العاشقى سىنىپ جەتەكشىسىن كوز الدىنا ەلەستەتىپ جاتقان بولار، ەندى بىرىنە ستۋدەنت كەزدەگى مۇعالىمدەرىنىڭ بەينەسى كولبەڭدەپ كەلگەن شىعار. راسىمەن دە، «ۇستازى جاقسىنىڭ ۇستامى جاقسى» دەگەندەي، كوكجيەگىڭدى كەڭەيتەتىن، ماقساتى ايقىن، ءبىلىمى مەن بىلىكتىلىگى ۇشتاسقان مۇعالىم كەز كەلگەن وقۋشىعا ۇلگى. ال ەگەر ول، سونىمەن قاتار، جاس، ەڭبەكقور، زيالى بولىپ جاتسا، تىپتەن كەرەمەت.

سونداي مۇعالىمدەردىڭ ءبىرى – قاراعاندى قالاسىنداعى مەكتەپتەردىڭ بىرىندە اعىلشىن پانىنەن ساباق بەرەتىن ادىلەت يسابەكوۆ.

پەداگوگيكا عىلىمدارىنىڭ كانديداتىمەن وتاندىق ءبىلىم بەرۋ جۇيەسى تۋرالى سۇحباتتاسىپ، بالالارعا قانداي كەڭەس بەرەتىنىن سۇراعان ەدىك.

بولاشاق ماماندىعىن قاراعاندىلىق جاس مۇعالىم اقش-تا وقىپ جۇرگەنىندە-اق تاڭداعان. ول كەزدە 23 جاسار ادىلەت ماقساتىنا جەتىپ، الىس امەريكاعا ماگيستراتۋراعا تۇسكەن. الايدا تروپيكالىق كۇنگە كۇيىپ جاتا بەرمەي، الدىنا جاڭا ماقسات قويىپ، تەز ارادا شەشىم قابىلداۋ قاجەت بولعان.

كانتري-كلابتاعى جالاقىسى مول جۇمىس، رەستوراندىق بيزنەس مەنەدجمەنتىندەگى تابىستى قىزمەت… البەتتە، ادىلەت ۇزاق ويلاندى. ونىڭ ۇستىنە، كەلىسىمشارتتى ۇزارتۋ تۋرالى دا ۇسىنىس ءتۇسىپ، اقش-تاعى كارەراسى العا باسىپ تۇرعان ەدى. الايدا، وتانعا دەگەن سۇيىسپەنشىلىك ادىلەتتى ەلگە جەتەلەپ تۇردى. بۇگىندە ونىڭ 4 جوعارى ءبىلىمى بار.

«وقۋدى بىتىرگەن سوڭ مۇعالىم بولام دەپ شەشتىم. سوندىقتان، ەلگە ورالعان سوڭ بىردەن ماگيستراتۋراعا ءتۇسىپ، اعىلشىن ءپانىنىڭ مۇعالىمى دەگەن ديپلومدى يەمدەندىم. وقىپ ءجۇرىپ، قاراعاندىداعى قازاق-تۇرىك ليتسەيىندە ۇستازدىق ەتتىم»، – دەيدى بۇل تۋرالى ادىلەتتىڭ ءوزى.

بۇگىندە ادىلەتتىڭ جاسى 26-دا. وقۋشىلارعا ساباق بەرىپ، بىلىمدەرىن تولىقتىرىپ ءجۇر. بالا دا ادام تاڭداي بىلەدى عوي، وقۋشىلار دا مۇعالىمىنە ابدەن ءۇيىر بولىپ العان.

«بالانى ساباققا باۋلۋ قيىن ەمەس. ەڭ باستىسى، ءتىلىن تابا ءبىلۋ قاجەت. ايتپەسە، قابىلەتسىز بالا بولمايدى. ارقايسىسى ءوز الدىنا دارىندى، ءوز الدىنا زەيىندى. مەنىڭ باستى مەتوديكام – بالالاردى تىڭداۋ، سولاردىڭ تىلىندە سويلەسۋ.

ۇستازداردىڭ جۇمىسىنداعى جالعىز قيىندىق – قازاقستاندىق ءبىلىم بەرۋ جۇيەسىندە، ءبىزدىڭ عانا ەمەس، بۇكىل الەمدە مۇعالىمدەردى تىم قاتتى شەكتەپ تاستاعان. ال مەن كرەاتيۆتى جاقسى كورەمىن، تىڭ دۇنيەلەردى ويلاپ تاۋىپ، سولاردى وقۋ جۇيەسىنە قوسقاندى ۇناتامىن. بىراق، كەيدە شەكتەۋلەردىڭ كەسىرىنەن كرەاتيۆ پەن وقۋ جۇيەسىن بايلانىستىرۋ وتە قيىن. ال بالالار ءۇشىن وقۋدى قىزىقتى ەتۋدىڭ جولدارى كوپ", - دەيدى ادىلەت.

ادىلەتتىڭ ايتۋىنشا، ءححى عاسىردىڭ مۇعالىمى ءبىرىنشى كەزەكتە بالالاردى بىلىمگە قىزىقتىرا ءبىلۋ كەرەك، ال قالعانىن وقۋشىلاردىڭ وزدەرى قاجەتىنە قاراي ۇيرەنىپ الادى.

«ءار ساباققا جوسپار قۇرعاندا ءبىرىنشى كەزەكتە اتموسفەرانى جوعارى قالىپتا ۇستاۋعا تىرىسامىن. ساباقتىڭ قارقىنىن تۇسىرمەۋ قاجەت، قىزىقتى ەتىپ، ءار ساعاتتى ءبىر-بىرىنە ۇقسامايتىنداي ەرەكشە ەتۋ كەرەك. سوندا بالانىڭ بىلىمگە دەگەن قىزىعۋشىلىعى جوعالمايدى. جالپى، ءححى عاسىردىڭ مۇعالىمىنە قويىلار باستى تالاپ – بالانى ساباققا قىزىقتىرا ءبىلۋ. ال قالعانىن وقۋشىنىڭ ءوزى ۇيرەنىپ الادى. ويتكەنى، قازىرگى بالالار وتە زەيىندى ءارى قابىلەتتى. تەز ۇيرەنەدى. ەڭ باستىسى، جالىقتىرىپ الماۋ كەرەك. ءتىل ۇيرەتىپ، ادەبيەتكە باۋلي وتىرا ولاردىڭ بويىنا مەيىرباندىقتى، ادالدىقتى، راقىمدىلىقتى سىڭىرگىم كەلەدى. ادامنىڭ بويىنداعى بۇل قاسيەتتەر اكادەميالىق كورسەتكىشتەردەن دە الدەقايدا قۇندى. سونىمەن قاتار، بالالاردى كىتاپ وقۋعا باۋلۋ قاجەت. بارلىق وقۋشىلارىم كلاسسيكالىق كىتاپتار وقيدى. كلاسسيكالىق كىتاپتار وقۋشىنىڭ دامۋىنا جاقسى اسەر ەتەدى»، - دەيدى ول.

بۇدان بولەك، ادىلەت يسابەكوۆ بۇگىندە PROF ME UP دەپ اتالاتىن ونلاين-كۋرستىڭ اۆتورى.

«بۇل كۋرستا ماماندىقتى قالاي تاڭداۋ قاجەت، قالاي ىزدەگەن دۇرىس نەمەسە ۇناعان ىسىڭمەن اينالىسۋ ءۇشىن نە ىستەۋ كەرەك دەگەن سىندى ابدەن جاۋىر بولعان ماسەلەلەردى ايتپايمىز. مۇندا ماماندىقتى تاڭداۋعا دەگەن جاڭا كوزقاراستار تۋرالى وي قوزعايمىز. ياعني، «ا» نۇكتەسىن اداسپاي تاۋىپ، «ۆ» نۇكتەسىنە جاڭىلماي بارۋدىڭ بارلىق جولدارىن قاراستىراتىن ناۆيگاتورىڭىز بولماق».

اۆتوردىڭ ايتۋىنشا، كۋرس مەكتەپتىڭ جوعارعى سىنىپ وقۋشىلارىنا عانا ەمەس، ستۋدەنتتەرگە دە پايدالى بولماق.

«جالپى، بولاشاعىن قاي سالامەن بايلانىستىرۋدى بىلمەي جۇرگەندەرگە، ماماندىق تاڭداۋدا قاتەلەسۋدەن قورقاتىندارعا، ىشكى دۇنيەسىن دامىتقىسى كەلگەنىمەن نەدەن باستارىن بىلمەي جۇرگەندەرگە ارنالادى»، – دەيدى ادىلەت.

امبيتسياسى جوعارى ادىلەتتىڭ الداعى جوسپارلارى دا وراسان. ونىسىن جاسىرمايدى دا.

«جوسپارىم وتە كوپ. قازىر جاڭا ءبىلىم بەرۋ جۇيەسى جونىندە جوبا دايىنداپ جاتىرمىن. الداعى ۋاقىتتا ءبىلىم جانە عىلىم مينيسترلىگىندە ءساتتى قورعايمىن دەپ ويلايمىن. جالپى، قازاقستاندىق مەكتەپتەردىڭ الەۋەتى زور. مەن سول الەۋەتىن اشقىم كەلەدى»، – دەپ سۇحباتتى اياقتادى ادىلەت يسابەكوۆ.

پىكىرلەر