ناۆالنىيدىڭ يۋتۋبتەگى اتىشۋلى ۆيدەوسى 85 ملن كورىلىم جيناپتى جانە ونىڭ توقتايتىن ءتۇرى جوق. نەگىزى ناۆالنىي جىل باستالا سالىسىمەن پۋتينگە توپەلەتىپ اۋىر سوققىلار جاسادى.
جىل باسىندا "سەن قاندىقولىڭمەن ادام ۋلاپ ءولتىرىپ ءجۇرسىڭ، مەنى سەن ولتىرمەك بولدىڭ" دەگەندى دالەلدەپ ءبىر شۋلاتتى.پۋتين بيلىگى ودان نوكداۋن الىپ وزىنە ارەڭ كەلگەن ەدى. ء"ما، تاعى ۇستا" دەپ التىن جالاتقان سارايدى سالدى. ودان كۇللى رەسەي، جالعىز ورىس ەمەس ءبۇتىن الەم شوك الدى. ەندى جۇرت حريستو گروزەۆتىڭ "رەسەيدە ۋلانىپ ولگەن ءپۋتيننىڭ ساياسي قارسىلاستارى" تۋرالى زەرتتەۋىن كۇتىپ وتىر. ول دا وزىنشە اۋىر سوققى بولماق.
سىرتقى ساياساتتا دا پۋتين بىلتىر ەردوعاننان مىقتاپ تاياق جەدى. اقش تا بيلىك باسىنا پۋتينگە جۇلدىزى قارسى بايدەن كەلدى. ول دا پۋتين جۇيەسىنە ءبىر ۇلكەن قاۋىپ. جالپى بايدەن ناعىز امەريكانىڭ پرەزيدەنتى بولادى. وعان مەنىڭ ەشقانداي كۇمانىم جوق. ول دەرەۋ جاھاندى ءوز قولىنا الىپ ەسكى ءتارتىپتى قايتارادى، تەنتەكتى جازالايدى، دوستارىن قاسىنا تارتادى. ونىڭ سىرتقى ساياساتى دا رەسەيگە قاتتى بۇرىلادى، ونى ءبارى سەزىپ وتىر.
ەندى كەشە جەلىنى شولىپ وتىرسام، رەسەي وپپوزيتسيونەرلەرى: "بۇل ءپۋتيننىڭ اقىرى بولماق، ءبىز تاعى ميتينگكە شىعامىز، رەجيمنىڭ كۇنى ءبىتتى" دەپ كىجىنىپ ءبىراز رۋحتانىپ وتىر ەكەن. مەنىڭشە، بۇل اسىرا ايتىلعان ءسوز بولسا كەرەك. رەسەي قىرعىزستان ەمەس، گرۋزيا ەمەس. قالاي دەسە دە ول يادرولىق، اسكەري دەرجاۆا. ءپۋتيننىڭ ءوزى الەمدەگى ديكتاتورلاردىڭ قورعانى جانە ءوزى دە، اينالاسى دا شىرىگەن باي. ولار ءوزىن قورعاپ وتىرعان پوليتسياسىنا تولەيتىن جالاقى تاۋىپ بەرە الماي وتىرعان بەيشارا لۋكاشەنكو ەمەس. ولاردىڭ ەكى - ءۇش سوعىستى قارجىلاندىرۋعا قاراجاتى جەتەدى، كوشەدەگى شۋلاعان جالاڭقول حالىقتى قايتسىن.
پۋتين - اسادتى، مادۋرونى جالپى الەمدەگى ديكتاتور اتاۋلىنى قورعاپ وتىرعان ادام. ءوزىنىڭ بيلىگىن دە ءوزى ازىرشە قورعاي الادى. ول ولىسپەي بەرىسپەيدى. ويتكەنى ونىڭ بۇل پلانەتادا قاشىپ باسقا باراتىن جەرى دە جوق. تاعىنان كەتسە بارىنەن ايىرىلادى. كۇنى قاراڭ بولادى، باراتىن جەرى دە بەلگىلى. ونىڭ ماڭىنداعى توبى دا بۇل تايتالاستا "كەمەدەگىنىڭ جانى ءبىر" دەپ بارىن سالادى. جانە اساد، لۋكاشەنكو، مادۋرو سياقتى دوستارىنا "ولسەڭدەر دە ورنىڭنان كەتپەڭدەر" دەپ ولاردى قولداپ وتىرعان ءپۋتيننىڭ مىنادايدان ۇياتى ويانىپ ءوزى تاعىنان كەتە قويادى دەگەن ءسوز - ول بولمايتىن اڭگىمە. سوندىقتان بۇل جەردە مەندە قانداي دا ءبىر وپتيميزم جوق.
ەگەر.... ەگەر..
رەسەي وپپوزيتسياسى بايدەنمەن ىمىرالاسىپ ودان ءپۋتيننىڭ اينالاسىنا اۋىر سانكتسيالار تالاپ ەتىپ، ونىڭ دوستارىنا قوڭىز تەرگىزىپ جىبەرسە...
بايدەن جاھاندى رەسەي مۇنايىنان باس تارتۋعا ماجبۇرلەسە...
بايدەن رەسەيدى حالىقارالىق تولەمدەر جۇيەسى SWIFT تەن اجىراتىپ تاستاسا، ونىڭ ارتى ەلگە ەكونوميكالىق حاوس اكەلىپ، ودان حالىق نارازىلىعى ءورشىپ ءبىر ءدۇمپۋ بولار ەدى...
مىنە سول كەزدە بيلىك جۇيەسى شاتقاياقتاپ، ونىڭ اينالاسىنداعى دوستارى پۋتيننەن باستارىن الا قاشىپ، ءبىرىن ءبىرى ساتىپ، ونىڭ بيلىگى قاتتى السىرەپ كەتەر ەدى.. تاپ سول كەزدە ورىس وپپوزيتسياسىنا ۇلكەن مۇمكىندىكتىڭ ورايى تۋار ما ەدى..
قازىر بۇنىڭ ءبىرى دە جوق. پۋتين جۇيەسى دە ىشتەي ۇيىمداسىپ شايقاسقا بەكىنىپ وتىر، ولار — كوماندا.
ياعني، رەسەي وپپوزيتسياسىنىڭ باي قۋاتتى، الەۋەتتى رەجيممەن كۇرەسىندە وسىنداي سۇيەنەتىن ءبىر نەگىزى بولۋى كەرەك.
ال بيلىكتى قازىر رەسەيدە كوشەدەگى ميتينگپەن تارتىپ الامىن دەۋ مەنىڭشە بوس اۋرەشىلىك.
سيرياداعى ءپۋتيننىڭ دوسى باشار اساد ءوز بيلىگىن ساقتاپ قالۋى ءۇشىن ەلدىڭ جارتىسىنان كوبىن ۇيىندىگە اينالدىردى.
سەبەبى ول بيلىگىنەن ايىرىلسا ونىڭ باراتىن جەرى تەك قانا اسكەري تريبۋنال.
بۇنداي ستسەناري دە ءپۋتيننىڭ قولىنان كەلەدى.
سوندىقتان رەسەيدە قانداي دا ءبىر سىرتقى الەۋەتتى كۇشتەردىڭ جاردەمىنسىز وزگەرىس بولا قويماس.
ارينە، حالىق ءبىراز دۇبىرلەۋى مۇمكىن، بيىل كۇزدە پارلامەنت سايلاۋى كەلە جاتىر، باسقاسى دا بار دەگەندەي...
بىراق جالاڭقول حالىق مەنىڭشە ميتينگىلەتىپ رەسەيدە قازىر تۇك شەشە المايدى.
ولجاس ءابىل،
Facebook پاراقشاسىنان الىندى.
