اقش-تا 13 جاسار مەكتەپ وقۋشىسى 66 قۇربى-قۇرداسىنىڭ ءومىرىن ساقتاپ قالدى. بالا باتىر كەنەتتەن كەۋدەسى قىسىلىپ، تالىپ قالعان اۆتوبۋس جۇرگىزۋشىسىنىڭ ورنىن الماستىرعان. قاتەرلى تۇستا تىزگىندى ءوز قولىنا الىپ، جاسىنا قاراماي جانكەشتى ارەكەتكە بارعان، دەپ حابارلايدى "ادىرنا" ۇلتتىق پورتالى Mirror-عا سىلتەمە كورسەتە وتىرىپ.
مەكتەپ اۆتوبۋسىنا مىنگەن وقۋشىلاردىڭ باسىنا تۇسكەن قاتەرگە توسقاۋىل بولىپ، ولاردى امان الىپ قالعان 13 جاسار بالا باتىر جالپاق جۇرتتىڭ العىسىنا بولەندى. ونىڭ ەسىم-cويى - ديللون ريۆز. ميچيگان شتاتىنىڭ تۇرعىنى. ونىڭ اقىلعا سالاپ ارەكەت ەتكەن بەينەسى قۇرىلعى كامەراسىنا تاسپالانىپ قالعان.
ديللون جۇرگىزۋشىنىڭ تالىقسىپ بارا جاتقانىن كورىپ، رۋلگە بىردەن جارماسادى. اۆتوبۋستى توقتاتىپ، اپاتتىڭ الدىن الادى.
وقيعا بارىسىن زەرتتەگەن پوليتسيا ماماندارى ديللوننىڭ ارەكەتىن ەرلىك دەپ ساناپ، مەكتەپ اكىمشىلىگىنە العىس حات جولدادى:
- نەبارى جەتىنشى سىنىپ وقيتىن ويى جۇيرىك، قيمىلى شيراق باتىر قيىن ساتتە اۆتوبۋستىڭ تىزگىنىن ۇستاپ، زالالسىز توقتاۋىنا مۇرىندىق بولدى. جۇدىرىقتاي جۇرەگىمەن ۇلكەن ەرلىككە بارعان مەكتەپ وقۋشىسىنىڭ ارەكەتى بارشامىزعا ۇلگى، ماڭگىلىك ماقتانىش، - دەپ جازىلعان العىس حاتتا.ۆاررەن قالاسىنىڭ پوليتسيا قىزمەتكەرلەرى سالتاناتتى جيىن ۇيىپداستىرىپ، ديلون جانە ونىڭ وتباسىنا العىس ءبىلدىردى. بالا باتىردىڭ ارقاسىنان قاقتى. اۆتوبۋس جۇرگىزۋشىسىنىڭ نەلىكتەن مۇنداي قيىن جاعدايدا قالعانى ازىرگە بەلگىسىز، اشىق ايتىلعان جوق.
"ادىرنا" ۇلتتىق پورتالى
ۇقساس جاڭالىقتار
