الماتى وبلىسىندا 26 ۇرلىق جاساپ، جابىرلەنۋشىلەرگە جالپى سوماسى 15 ملن تەڭگەدەن استام شىعىن كەلتىردى دەگەن كۇدىكپەن جەرگىلىكتى تۇرعىن ۇستالدى، – دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
جەدەل ىزدەستىرۋ ءىس-شارالارى بارىسىندا ەسكەلدى اۋدانىنىڭ پوليتسەيلەرى الماتى وبلىسى پد كريمينالدىق پوليتسيا باسقارماسىنىڭ قىزمەتكەرلەرىمەن بىرلەسىپ، ارنايى بولىمشەنىڭ كومەگىمەن وبلىس اۋماعىندا جاسالعان بىرقاتار ۇرلىقتارعا قاتىسى بار دەگەن كۇدىكپەن قارابۇلاق كەنتىنىڭ 36 جاستاعى تۇرعىنىن ۇستادى.
«ۇستالعان ادامدى كريمينالدىق بازالار بويىنشا تەكسەرگەن پوليتسەيلەر ونىڭ الماتى وبلىسىنىڭ اۋماعىندا جاسالعان 26 ۇرلىققا قاتىسى بار ەكەنىن انىقتادى. ول جىمىسقى ارەكەتتەرىن قارابۇلاق، شىمىر، باقتىباي، بالپىق بي، تالدىقورعان جانە ت.ب. ەلدى مەكەندەردە ىسكە اسىرعان. ول قىلمىستارىنىڭ بارلىعىن تاپاتال تۇستە جاساعان، جەكە ۇيلەرگە پلاستيكالىق تەرەزەلەردى سىعىمداپ اشۋ ارقىلى كىرگەن. دالەلدەنگەن ەپيزودتار بويىنشا جابىرلەنۋشىلەرگە كەلتىرىلگەن جالپى ماتەريالدىق شىعىن 15 ميلليون تەڭگەدەن اسادى. ۇستالعان كۇدىكتىنىڭ وسىعان ۇقساس باسقا دا اشىلماعان قىلمىستارعا قاتىسى بار-جوعى تەكسەرىلۋدە»،-دەدى ەسكەلدى اۋدانى پوليتسيا ءبولىمىنىڭ باستىعى قايرات بايمۇحانوۆ.
كۇدىكتى نەگىزىنەن التىن بۇيىمدار مەن ۇيالى تەلەفونداردى الىپ كەتۋمەن اينالىسقان.
«ايعاق زاتتارى از قىلمىستاردى اشۋ بارىسىندا قىلمىسكەرلەردىڭ قول ىزدەرى ارقىلى عانا كىنالىنى انىقتاۋ ساراپشى-كريميناليستەردىڭ اسقان شەبەرلىگىن تالاپ ەتەدى. كريميناليست مامانداردىڭ وقيعا ورنىنان مۇقيات جيناعان دالەلدەرىنىڭ ارقاسىندا ونىڭ بىرقاتار قىلمىستارعا قاتىستىلىعى اشكەرەلەندى. كۇدىكتى ۋاقىتشا ۇستاۋ يزولياتورىنا قاماۋعا الىندى. وزگە اقپارات تەرگەۋ قۇپيالىعىنا بايلانىستى جاريالانبايدى»،- دەپ اتاپ ءوتتى قايرات بايمۇحانوۆ.
«ادىرنا» ۇلتتىق پورتالى
