جەكپە-جەك الاڭىندا جارتىلاي ورتا سالماقتا اتوي سالعان جەرلەسىمىز، كاسىپقوي بوكسشى باتىر جۇكەمباەۆ (18-0, 14 KO) كەلەسى كەزدەسۋىن ناۋرىزدىڭ 10-ى كۇنى كۇنى اقش-تا وتكىزەدى، دەپ حابارلايدى "ادىرنا" ۇلتتىق پورتالى.
شارشى الاڭدا جەڭىلىپ كورمەگەن جەرلەسىمىز امەريكادا كوننەكتيكۋت شتاتىنداعى انكاسۆيللە قالاسىندا ورنالاسقان Mohegan Sun سپورت كەشەنىندە وتكىزەدى. بۇل كەزدەسۋدى تىكەلەي ەفيردە اقش-تاعى Showtime تەلەارناسى كورسەتۋگە دايىن ەكەنىن مالىمدەدى.
باتىر كاسىپقوي بوكستاعى وسىعان دەيىنگى بارلىق كەزدەسۋلەرىن كانادادا وتكىزگەن بولاتىن. وتانداسىمىز ول جاقتا Eye of the Tiger Management پروموۋتەرلىك كومپانياسىمەن كەلىسىمدە. جاقىندا ول اقش-قا كوشۋىنە بايلانىستى، الداعى كەزدەسۋلەرىن سول جاقتا وتكىزۋدى جوسپارلاپ وتىر.
الدىڭعى جەكپە-جەگىن باتىر وتكەن جىلدىڭ قاڭتار ايىندا مونرەال قالاسىندا وتكىزىپ، مەكسيكالىق بوكسشى ريكاردو لارۋدان (22-8, 10 كو) باسىم تۇسكەن بولاتىن.
باتىر جۇكەمباەۆ - 1991 جىلى 5 ساۋىردە جامبىل وبلىسىنىڭ شۋ قالاسىندا دۇنيەگە كەلگەن. جارتىلاي ورتا سالماق دارەجەسىندە ونەر كورسەتەتىن قازاقستاننىڭ كاسىبي بوكسشىسى IBO ۇيىمىنىڭ نۇسقاسى بويىنشا الەم چەمپيونى. بوكسپەن كاسىبي تۇردە الماتىدا شۇعىلدانا باستادى. باتىر - جاستار اراسىندا قازاقستان چەمپيونى، ستۋدەنتتەر اراسىنداعى قازاقستان چەمپيونى، قازاقستان، ۋكراينا، فينلياندياداعى حالىقارالىق تۋرنيرلەردىڭ جەڭىمپازى. 2019 جىلدىڭ قازان ايىنا قاراي دجۋكەمباەۆ كاسىبي رينگتە 16 جەكپە-جەك وتكىزدى جانە ونىڭ 13-ءى نوكاۋتپەن اياقتالدى.
2017 جىلدىڭ قاڭتارىندا باتىر جۇكەمباەۆ كانادالىق «12 راۋند» جۋرنالىنىڭ نوميناتسياسىندا 2016 جىلدىڭ ەڭ پەرسپەكتيۆتى بوكسشىسى دەپ تانىلدى. جۋرنالدا «25 جاستاعى قازاقستاندىق تالانتتى بوكسشى جەتى جەڭىستى جەكپە-جەگىنىڭ التاۋىن نوكاۋتپەن اياقتادى، ءبىز ونىڭ 2017 جىلى رينگكە ونەر كورسەتۋىن اسىعا كۇتەمىز»، - دەپ جازىلعان بولاتىن.
ۇلاربەك دالەيۇلى
