پرەمەر-ءمينيستردىڭ جەتىنشى ورىنباسارى – سۋ تاسقىنىنا قارسى ءىس-شارالاردى ۇيلەستىرۋ جانە سۋ تاسقىنى زارداپتارىن جويۋ جونىندەگى رەسپۋبليكالىق شتاب باسشىسىنىڭ ورىنباسارى قانات بوزىمباەۆ پەن توتەنشە جاعداي ءمينيسترى شىڭعىس ءارىنوۆ سۋ باسقان اقمولا، قوستاناي وبلىستارىن ارالادى، دەپ حابارلايدى "ادىرنا" قازاقپاراتقا سىلتەپ.
پرەمەر-ءمينيستردىڭ ورىنباسارى، توتەنشە جاعدايلار ءمينيسترى جانە وبلىس اكىمى قالا ماڭىنداعى اۋداندارداعى نۇرا جانە ەسىل وزەندەرى باسسەيندەرىندەگى جاعدايمەن تانىستى.
"سۋ تاسقىنىنىڭ ەكىنشى كەزەڭىنىڭ باستالۋىنا بايلانىستى وبلىستاعى جاعداي كۇردەلى دەپ باعالانۋدا. نۇرا، ەسىل، جاباي، كولۋتون وزەندەرىنىڭ سۋ دەڭگەيىن باقىلاۋ ءۇشىن تاۋلىك بويى جۇمىس ىستەيتىن باقىلاۋ بەكەتتەرى قۇرىلدى. مۇز قاتپارلارى پايدا بولعان كەزدە ولاردى جويۋ ءۇشىن جارۋ جۇمىستارى جۇرگىزىلەدى. وبلىسقا استانادان جانە باسقا قالالاردان ارنايى تەحنيكالار جونەلتىلدى. سونداي-اق قر توتەنشە جاعدايلار مينيسترلىگى مەن ازاماتتىق قورعانىس اكادەمياسىنىڭ كۇشتەرى جۇمىلدىرىلدى", دەلىنگەن حابارلامادا.
جىبەك جولى اۋىلىندا سۋ تاسقىنىنا قارسى ءىس-شارالار بەلسەندى جۇرگىزىلۋدە، وندا ينەرتتى ماتەريالدان قاپ دايىندالىپ، 2300 مەتر تەرەڭدىككە دەيىن قورعانىش جاعالاۋى نىعايتىلدى.
قوسشىداعى تايتوبە اۋىلىندا ۇزىندىعى 2400 مەترلىك جەر قورشاۋىن نىعايتۋ جۇمىستارى جۇرگىزىلۋدە. تسەلينوگراد اۋدانىنداعى قاراوتكەل، قاراجار جانە تالاپكەر اۋىلدارىندا دا سۋ تاسقىنىنا قارسى شارالار تەكسەرىلدى.
شتاب باسشىسىنىڭ ورىنباسارى وبلىس اكىمى مەن توتەنشە جاعدايلار دەپارتامەنتىنىڭ باسشىسىنا سۋ تاسقىنى كەزىندە قالا ماڭىنداعى وڭىرلەردەگى جاعدايدى جەكە باقىلاۋعا الۋدى تاپسىرىپ، قاۋىپتى جويۋ بويىنشا بىرقاتار تاپسىرمالار بەردى.
اقمولا وبلىسى بويىنشا سۋ تاسقىنىنا قارسى ءىس-شارالارعا بارلىعى 1500-گە جۋىق ادام مەن 350 تەحنيكا جۇمىلدىرىلعان.
قانات بوزىمباەۆ پەن شىڭعىس ءارىنوۆ قوستاناي وبلىسىنىڭ سۋ تاسقىنىنان زارداپ شەككەن تۇرعىندارىمەن كەزدەسكەن. مال-مۇلكىنەن ايرىلعان تۇرعىندار شەنەۋنىكتەرگە ءتيىستى سۇراقتارىن قويعان. جيىندا سۋ تاسقىننان كەلتىرىلگەن ماتەريالدىق زارارعا بايلانىستى داۋلى جايلار دا ءسوز بولعان.
ەسكە سالا كەتەيىك، قانات بوزىمباەۆ مەملەكەت باسشىسىنىڭ جارلىعىمەن 31 ناۋرىز كۇنى پرەمەر-ءمينيستردىڭ جاڭا ورىنباسارى بولىپ تاعايىندالعان بولاتىن.
