Premer-mınıstrdiń jetinshi orynbasary – Sý tasqynyna qarsy is-sharalardy úılestirý jáne sý tasqyny zardaptaryn joıý jónindegi respýblıkalyq shtab basshysynyń orynbasary Qanat Bozymbaev pen Tótenshe jaǵdaı mınıstri Shyńǵys Árinov sý basqan Aqmola, Qostanaı oblystaryn aralady, dep habarlaıdy "Adyrna" QazAqparatqa siltep.
Premer-mınıstrdiń orynbasary, Tótenshe jaǵdaılar mınıstri jáne oblys ákimi qala mańyndaǵy aýdandardaǵy Nura jáne Esil ózenderi basseınderindegi jaǵdaımen tanysty.
"Sý tasqynynyń ekinshi kezeńiniń bastalýyna baılanysty oblystaǵy jaǵdaı kúrdeli dep baǵalanýda. Nura, Esil, Jabaı, Kolýton ózenderiniń sý deńgeıin baqylaý úshin táýlik boıy jumys isteıtin baqylaý beketteri quryldy. Muz qatparlary paıda bolǵan kezde olardy joıý úshin jarý jumystary júrgiziledi. Oblysqa Astanadan jáne basqa qalalardan arnaıy tehnıkalar jóneltildi. Sondaı-aq QR Tótenshe jaǵdaılar mınıstrligi men Azamattyq qorǵanys akademııasynyń kúshteri jumyldyryldy", delingen habarlamada.
Jibek joly aýylynda sý tasqynyna qarsy is-sharalar belsendi júrgizilýde, onda ınertti materıaldan qap daıyndalyp, 2300 metr tereńdikke deıin qorǵanysh jaǵalaýy nyǵaıtyldy.
Qosshydaǵy Taıtóbe aýylynda uzyndyǵy 2400 metrlik jer qorshaýyn nyǵaıtý jumystary júrgizilýde. elınograd aýdanyndaǵy Qaraótkel, Qarajar jáne Talapker aýyldarynda da sý tasqynyna qarsy sharalar tekserildi.
Shtab basshysynyń orynbasary oblys ákimi men Tótenshe jaǵdaılar departamentiniń basshysyna sý tasqyny kezinde qala mańyndaǵy óńirlerdegi jaǵdaıdy jeke baqylaýǵa alýdy tapsyryp, qaýipti joıý boıynsha birqatar tapsyrmalar berdi.
Aqmola oblysy boıynsha sý tasqynyna qarsy is-sharalarǵa barlyǵy 1500-ge jýyq adam men 350 tehnıka jumyldyrylǵan.
Qanat Bozymbaev pen Shyńǵys Árinov Qostanaı oblysynyń sý tasqynynan zardap shekken turǵyndarymen kezdesken. Mal-múlkinen aırylǵan turǵyndar sheneýnikterge tıisti suraqtaryn qoıǵan. Jıynda sý tasqynnan keltirilgen materıaldyq zararǵa baılanysty daýly jaılar da sóz bolǵan.
Eske sala keteıik, Qanat Bozymbaev memleket basshysynyń jarlyǵymen 31 naýryz kúni Premer-mınıstrdiń jańa orynbasary bolyp taǵaıyndalǵan bolatyn.
