Kalıfornııa shtatynyń Sý resýrstary departamenti qar ólshemi týraly sońǵy qorytyndysyn jarııalady. Taý shyńdaryndaǵy qar qalyńdyǵy únemi baqylanady. Qar, jaýyn - osy shtattaǵy sý rezervýarlaryn toltyratyn resýrs. Al sáýirdegi ólshem - aldaǵy maýsymǵa qamdaný úshin óte mańyzdy málimet bolyp sanalady eken. Sıerra jáne Trınıtı taýlaryndaǵy qar qalyńdyǵyn baqylaý (zertteý, taldaý,esepteý) nátıjesinde, osy sáýirde Kalıfornııa shtatynyń sýmen qamtý deńgeıi C deńgeıinen, A+ deńgeıine jetilgen. Sý jaǵdaıyn ótken aılardaǵy jaýyn-shashyn jaqsartty ( Miracle March , Ǵajaıyp naýryz dep atapty sınoptıkter). Tipti, qurǵap jatatyn ózender tabanymen sál de bolsa, aǵyn júrdi. Soǵan, jergilikti jurt máz.
Sý resýrstaryn esepteý jáne boljaý nege mańyzdy? Ol aýyz sý tutynysyn josparlaýǵa ǵana emes, aýyl sharýashylyǵyna, óndiriske jáne tabıǵatqa jumsalatyn nárdi esepke alý, óndiris qýatyn soǵan sáıkestendirý úshin kerek!
Osy jerge deıin oqysańyz, jáne onsyz da belgili nárseni nege táptishtep otyr degen narazy oıyńyz bolsa, keshirim. Tek, sheteldik tájirıbe jaıynda oqyǵan derekti bólisken túrim. Qazaqstanda bolǵan qarǵyn sý tasqyny, árıne, apat. Mol sý - kúsh. Ári nesibe! Kózi ashyq, eline, jerine janashyr azamattar basqa elderdiń sý qadirin qalaı asyryp jatqanyn bilse eken degen nıet.
Saken Qaiyrbergenuly
