ەنەرگەتيكا مينيسترلىگى سۇيىتىلعان مۇناي گازى، پروپان جانە بۋتاندى ەل اۋماعىنان التى اي مەرزىمگە اكەتۋگە تىيىم سالۋ تۋرالى بۇيرىق جوباسىن ازىرلەدى. شەكتەۋدى 14 قاراشادان باستاپ ەنگىزۋ ۇسىنىلىپ وتىر، دەپ حابارلايدى «ادىرنا» ءتىلشىسى.
قۇجات «اشىق نقا» پورتالىندا جاريالانعان. جوباعا سايكەس، تىيىم اتالعان ونىمدەردى اۆتوموبيل جانە تەمىرجول كولىگىمەن اكەتۋگە قاتىستى بولادى.
مينيسترلىك بۇل شارانى شەكتەۋ كەزەڭىندە قازاقستاننىڭ ىشكى نارىعىن سۇيىتىلعان مۇناي گازىمەن قامتاماسىز ەتۋ قاجەتتىلىگىمەن ءتۇسىندىردى.
ۆەدومستۆونىڭ مالىمەتىنشە، جوبا بۇعان دەيىن ۆەدومستۆوارالىق كوميسسيا ماقۇلداعان تىيىمنىڭ قولدانىلۋىن جالعاستىرۋدى كوزدەيدى.
قۇجاتقا سايكەس، ازىرلەۋشىنىڭ باعالاۋىنشا، بۇيرىقتى قابىلداۋ الەۋمەتتىك-ەكونوميكالىق، قۇقىقتىق جانە وزگە دە تەرىس سالدارعا اكەلمەيدى. سونداي-اق ۇلتتىق قاۋىپسىزدىكتى قامتاماسىز ەتۋگە كەرى اسەرىن تيگىزبەيدى.
ۇسىنىلىپ وتىرعان شەكتەۋلەر ەنگىزىلگەن كۇننەن باستاپ التى اي بويى قولدانىلادى.
