ءبىلىم سالاسىنداعى جەمقورلىق، مۇعالىمنىڭ جۇمىسقا تۇرۋ ءۇشىن پارا ۇسىنۋى دەگەن پروبلەما ەلىمىزدە ءالى كۇنگە شەشىمىن تاپپاي كەلەدى. قانشا جەردەن جاسىرىپ، جاپسا دا، قازىرگى كەزدە مەكتەپكە ەشبىر تيىن بەرمەي، مۇعالىم بولىپ ورنالاسۋ قيامەت-قايىمعا اينالعانى راس.
وسى ماسەلەگە بايلانىستى Facebook الەۋمەتتىك جەلىسىندە ءجيى تالقىلاۋ جۇرەدى. ماسەلەن، وسى تاقىرىپقا قاتىستى تۇركىستان وبلىسىنىڭ مۇعالىمى سۆەتا الپامىسوۆا «مۇعالىم پارا الۋشى ەمەس، پارا بەرۋشى» ەكەنىن تارقاتىپ جازدى.
«ويلاپ قاراڭىزدارشى.... مۇعالىم پارانى قاي قۇندىلىعىنا الادى؟ پارانى قولىندا قۇزىرەتى بار ادام الادى ەمەس پە؟
دەمەك، بۇل مىندەتتەمەنى جاريالى تۇردە جازۋدى ءار مەكەمەنىڭ باسشىسىنان تالاپ ەتۋلەرىڭىز كەرەك! پارانىڭ «پاتالوگىن» دا مۇعالىم بەرمەيدى. سەبەبى، مۇعالىمنىڭ تالاپ تىلەگىنىڭ قۇنى بەس ءجۇز مىڭنان اسپايدى.... «پاتالوگ» دەپ ەسەپتەلەتىن ميلليونداردى جاڭادان جۇمىسقا ورنالاسۋشى بەرەدى. ياعني، جۇمىسسىز حالىق.
سوسىن، مۇعالىم جازاتىن مىندەتتەمەنىڭ ماعىناسى وزگەرۋى ءتيىس.
باسشىلىقتىڭ ايتقانىنا كونىپ، ايداۋىنا ءجۇرىپ، اسىلاتىن ءجىبى سومكەسىندە جۇرەتىن مۇعالىم تولتىراتىن قاعازدارى مازمۇنى "باستىعىم پارا سۇراسا، توبەسىنەن تاس جاۋسىن" دەگەندەي ماعىنادا شىعۋى كەرەك. ولاي، دەۋىمنىڭ سەبەبى، جەمقورلىقپەن كۇرەسەتىن، ونى اشكەرەلەيتىن مۇعالىم ۇجىمنان شەتتەتىلەدى. باسشىلىق ول مۇعالىمنىڭ سوڭىنان تاس بوران ۇيىرەتىنىن دە ەسكەرۋلەرىڭىز كەرەك. سوندىقتان باسشىلىقپەن كۇرەسەتىن مۇعالىمدە باسشىلىققا قارسى تۇرا الاتىن تاباندىلىق قالىپتاسۋعا ءتيىس....ايتايىن دەگەنىم...
توقسان اۋىز ءسوزدىڭ توبىقتاي ءتۇيىنى.
قوعامدى مۇعالىم تاربيەلەيدى دەسەك، ول مۇعالىمگە باعىت باعدار بەرىپ باعدارلامامەن جۇمىس ىستەتەتىن باسشىلىق ەكەنىن ەستەن شىعارماعانىمىز ءجون!
قانداي انت بولسا دا باسشىلىق وزىنەن باستاپ ار مەن نامىستىڭ شەڭبەرىنەن شىقپاسا قوعام تۇزەلەدى!» دەپ جازادى سۆەتا الپامىسوۆا.
راسىمەن دە، جۇمىسقا تۇرۋ ءۇشىن ميلليونداپ اقشا بەرۋ مۇعالىمگە وڭاي تيمەيتىنىن ەسكەرسەك، «مۇعالىمدى پارا الادى» دەپ ايىپتاۋ قيسىنعا كەلمەيدى. ارينە، بۇل رەتتە جوعارى وقۋ ورىندارىنىڭ مۇعالىمدەرى تۋرالى بولەك اڭگىمە ايتىلادى. ال قاراپايىم مەكتەپ مۇعالىمى كىمنەن پارا سۇراماق؟ الدە مەكتەپتە دە قاتارداعى مۇعالىم «اقشا سۇرايتىن» جاعدايلار بار ما؟
مۇقاش مۇراتۇلى،
«ادىرنا» ۇلتتىق پورتالى.
