Bilim salasyndaǵy jemqorlyq, muǵalimniń jumysqa turý úshin para usynýy degen problema elimizde áli kúnge sheshimin tappaı keledi. Qansha jerden jasyryp, japsa da, qazirgi kezde mektepke eshbir tıyn bermeı, muǵalim bolyp ornalasý qııamet-qaıymǵa aınalǵany ras.
Osy máselege baılanysty Facebook áleýmettik jelisinde jıi talqylaý júredi. Máselen, osy taqyrypqa qatysty Túrkistan oblysynyń muǵalimi Sveta Alpamysova «Muǵalim para alýshy emes, para berýshi» ekenin tarqatyp jazdy.
«Oılap qarańyzdarshy.... muǵalim parany qaı qundylyǵyna alady? Parany qolynda quzireti bar adam alady emes pe?
Demek, bul mindettemeni jarııaly túrde jazýdy ár mekemeniń basshysynan talap etýlerińiz kerek! Paranyń «patalogyn» da muǵalim bermeıdi. Sebebi, muǵalimniń talap tileginiń quny bes júz myńnan aspaıdy.... «Patalog» dep esepteletin mıllıondardy jańadan jumysqa ornalasýshy beredi. Iaǵnı, jumyssyz halyq.
Sosyn, muǵalim jazatyn mindettemeniń maǵynasy ózgerýi tıis.
Basshylyqtyń aıtqanyna kónip, aıdaýyna júrip, asylatyn jibi sómkesinde júretin muǵalim toltyratyn qaǵazdary mazmuny "Bastyǵym para surasa, tóbesinen tas jaýsyn" degendeı maǵynada shyǵýy kerek. Olaı, deýimniń sebebi, jemqorlyqpen kúresetin, ony áshkereleıtin muǵalim ujymnan shettetiledi. Basshylyq ol muǵalimniń sońynan tas boran úıiretinin de eskerýlerińiz kerek. Sondyqtan basshylyqpen kúresetin muǵalimde basshylyqqa qarsy tura alatyn tabandylyq qalyptasýǵa tıis....Aıtaıyn degenim...
Toqsan aýyz sózdiń tobyqtaı túıini.
Qoǵamdy muǵalim tárbıeleıdi desek, ol muǵalimge baǵyt baǵdar berip baǵdarlamamen jumys istetetin basshylyq ekenin esten shyǵarmaǵanymyz jón!
Qandaı ant bolsa da basshylyq ózinen bastap ar men namystyń sheńberinen shyqpasa qoǵam túzeledi!» dep jazady Sveta Alpamysova.
Rasymen de, jumysqa turý úshin mıllıondap aqsha berý muǵalimge ońaı tımeıtinin eskersek, «muǵalimdi para alady» dep aıyptaý qısynǵa kelmeıdi. Árıne, bul rette joǵary oqý oryndarynyń muǵalimderi týraly bólek áńgime aıtylady. Al qarapaıym mektep muǵalimi kimnen para suramaq? Álde mektepte de qatardaǵy muǵalim «aqsha suraıtyn» jaǵdaılar bar ma?
Muqash MURATULY,
«Adyrna» ulttyq portaly.
