قازاقستاندا جىل باسىنان بەرى 133 مىڭ ميگرانت ءوز ەركىمەن ەلدەن كەتتى. بۇل تۋرالى "ادىرنا" ۇلتتىق پورتالى Polisia.kz سايتىنا سىلتەمە جاساپ حابارلايدى.
"پاندەميا كەزىندە قازاقستان اۋماعىندا بولعان مىڭداعان شەتەل ازاماتى ەلدەن شىعا الماي قالدى. ءىىم كوشى-قون قىزمەتىنىڭ، شەت مەملەكەتتەر وكىلدىكتەرىنىڭ جانە كوشى-قون جونىندەگى حالىقارالىق ۇيىمنىڭ ىقپالىمەن بۇل ادامداردىڭ قۇجاتتارىن رەسىمدەۋگە كومەك كورسەتىلدى. جىل باسىنان بەرى پوليتسيا قىزمەتكەرلەرى 133 مىڭ زاڭسىز ميگرانتتىڭ ەلدەن ءوز ەركىمەن كەتۋىنە كومەكتەستى. تولقۇجاتتارىنىڭ جارامدىلىق مەرزىمى وتكەن 675 شەتەلدىككە قايتۋ تۋرالى ارنايى كۋالىك بەرىلدى", – دەپ اتاپ ءوتتى ءىىم باسشىسى ەرلان تۇرعىمباەۆ.
وسى جىلدىڭ اقپان ايىندا ىشكى ىستەر مينيسترلىگى "ميگرانت" جەدەل الدىن الۋ شاراسىنىڭ ەكى كەزەڭىن وتكىزدى.
ءىىم مالىمەتى بويىنشا، كوشى-قون زاڭناماسىن ورەسكەل بۇزۋ فاكتىلەرى انىقتالعان.
جەدەل الدىن الۋ شاراسى بارىسىندا شەتەلدىك جۇمىس كۇشىن رۇقساتسىز پايدالانعانى ءۇشىن 582 جۇمىس بەرۋشى جاۋاپكەرشىلىككە تارتىلدى. زاڭسىز كوشى-قون ۇيىمداستىرۋ فاكتىلەرى بويىنشا 28 قىلمىستىق ءىس تىركەلدى.
الماتى وبلىسىندا قىتايلارمەن توبەلەسكە نە سەبەپ بولعانى ايتىلدى
وسىلايشا، شىمكەنت قالاسىندا وزبەكستاننىڭ 70 ازاماتى مەن 62 قىتايدى جۇمىسقا زاڭسىز قابىلداعان بىرقاتار زاڭدى تۇلعالار انىقتالدى. قازىرگى ۋاقىتتا زاڭسىز كوشى-قوندى ۇيىمداستىرۋ فاكتىسى بويىنشا سوتقا دەيىنگى تەرگەۋ باستالدى.
سونىمەن قاتار، جەدەل الدىن الۋ شاراسى كەزىندە ىزدەۋ جاريالانعان 140 قىلمىسكەر ۇستالدى. ولاردىڭ ىشىندە 129 قازاقستاندىق، تمد ەلدەرىنىڭ 10 ازاماتى، سونداي-اق، سەكسۋالدىق سيپاتتاعى زورلىق-زومبىلىق ارەكەتتەرى جانە بوپسالاۋ فاكتىسى بويىنشا حالىقارالىق ىزدەۋدە جۇرگەن تۇركيا ازاماتى بار.
ءىىم كوشى-قون قىزمەتى كوميتەتىنىڭ مالىمەتى بويىنشا، كوشى-قون زاڭناماسىن قاساقانا بۇزعاندارعا قاتىستى زاڭسىز يمميگرانتتاردى ەل اۋماعىنان شىعارۋ تۋرالى 969 سوت شەشىمى شىعارىلعان.
