سااكاشۆيليدىڭ كەڭسەسىنە ارنايى جاساق باسىپ كىردى

3394
Adyrna.kz Telegram

ميحايل سااكاشۆيليدىڭ وپپوزيتسيالىق پارتياسىنىڭ جەتەكشىسى نيك مەليا گرۋزيا استاناسى تبيليسيدە ۇستالدى، - دەپ حابارلايدى «ادىرنا» ۇلتتىق پورتالى Tengrinews.kz تىلشىسىنە سىلتەمە جاساپ.

سااكاشۆيلي پارتياسى باسشىسىن ۇستاۋ ءۇشىن ارنايى جاساق ونىڭ كەڭسەسىنە باسىپ كىرىپ، كوزدەن جاس اعىزاتىن گاز قولدانعان. ۇستاۋ وپەراتسياسى قوعامدىق تەلەۆيزيادا تىكەلەي ەفيردە كورسەتىلدى.

نيك مەليا گرۋزيانىڭ ەڭ ءىرى وپپوزيتسيالىق پارتياسى - ء"بىرتۇتاس ۇلتتىق قوزعالىسىن" باسقارادى. Newsgeorgia.ge مالىمەتتەرىنە سۇيەنسەك، ساياساتكەردى ۇستاۋ وپەراتسياسى 3 اقپاندا تاڭعى ساعات 7:30-دا باستالعان. عيماراتقا جەدەل جاردەم كولىگى، ساتىسى بار ەكى ارنايى تەحنيكا، سونداي-اق جۇزدەگەن پوليتسيا قىزمەتكەرى كەلگەن. تاڭعى ساعات 9-دا مەليا ۇستالدى.
سااكاشۆيلي پارتياسىنىڭ جاقتاستارى دا كەڭسەدە بولعان.

"عيماراتتا وپپوزيتسيا جاقتاستارى پوليتسياعا قارسىلىق كورسەتپەدى. تۇندە مەليانىڭ ءوزى ولارعا وسىنداي ءوتىنىش جاساعان. الايدا كىرەبەرىستەر مەن كەڭسەگە كىرەتىن ەسىكتەر جيھازبەن جابىلعان. عيماراتقا كىرگەن پوليتسيا جاساعى كەڭسەدەگى جيھازدىڭ كوپ بولىگىن سىندىرىپ، كەڭسەدە بولعان بەلسەندىلەردى شىعارىپ الدى", - دەپ جازادى باسىلىم.
ۆيدەو كادرلارىنان ارنايى جاساق عيماراتقا سىرتىنان جانە ىشىنەن شابۋىل جاساعانىن كورۋگە بولادى. ولاردىڭ بىرىنە مەديتسينالىق كومەك كورسەتىلدى. "سونىمەن قاتار، نىساندا كوزدەن جاس اعىزاتىن گاز قولدانىلدى. ءىىم قىزمەتكەرلەرى عيماراتقا گاز باللوندارىن لاقتىرىپ، "قۇلدار!", "ۇيات!" دەپ ايعايلاعان", - دەپ تۇيىندەيدى باسىلىم.

سونداي-اق، مەليا نە ءۇشىن ۇستالعانى حابارلاندى. ول 2019 جىلعى 20 ماۋسىمداعى تارتىپسىزدىكتەردىڭ ۇيىمداستىرۋشىسى بولعان. نارازىلىقتار گرۋزياعا رەسەي فەدەراتسياسى مەملەكەتتىك دۋماسىنىڭ دەپۋتاتى سەرگەي گاۆريلوۆ كەلگەننەن كەيىن باستالدى. ول پراۆوسلاۆيە پارلامەنتتىك اسسامبلەياسىنا قاتىسىپ، ەل پارلامەنتىنىڭ ءماجىلىس زالىندا توراعا بولدى. كەشكە پارلامەنت عيماراتى جانىنداعى نارازىلىق اكتسياسىنا 15 مىڭعا جۋىق ادام جينالدى. ميتينگ پوليتسيامەن قاقتىعىسقا ۇلاستى.

18 اقپاندا گرۋزيا پرەمەر-ءمينيسترى گەورگي گاحاريا وتستاۆكاعا كەتتى. ول وتستاۆكاعا كەتۋىنىڭ سەبەبى نيك مەليانى قاماۋعا الۋ تۋرالى سوت شەشىمىنىڭ ورىندالۋىنا قاتىستى بيلەۋشى پارتيامەن كەلىسپەۋشىلىكتەن ەكەنىن ايتتى.
22 اقپاندا پارلامەنت جاڭا پرەمەر-ءمينيستردى تاعايىندادى، ول - بۇرىنعى قورعانىس ءمينيسترى يراكلي گاريباشۆيلي.

پىكىرلەر