نۇر-سۇلتان اكىمدىگى كوپبالالى انالارعا حالىقارالىق ايەلدەر كۇنىنە وراي 7293 تەڭگەدەن بەرەدى، دەپ حابارلايدى «ادىرنا» ءتىلشىسى zakon.kz-كە سىلتەمە جاساپ.
قازاقستاندىقتار بۇل جاڭالىقتى الەۋمەتتىك جەلىدە قىزۋ تالقىلاپ جاتىر.
بۇعان تۇسىنىكتەمە بەرگەن اكىمدىكتىڭ ءباسپاسوز قىزمەتىنىڭ جەتەكشىسى اقمارال ولجاباەۆا ءماسليحاتتىڭ بۇل شەشىمى 2017 جىلدىڭ سوڭىندا قابىلدانعانىن ايتتى.
«الەۋمەتتىك كومەك كورسەتۋ ەرەجەلەرىنە سايكەس، استانا قالاسى ءماسليحاتىنىڭ 2017 جىلدىڭ 12 جەلتوقسانداعى No221 / 25-VI بەكىتىلگەن شەشىمى بويىنشا نۇر-سۇلتان قالاسىنىڭ مۇقتاج ازاماتتارىنىڭ جەكەلەگەن ساناتتارىنىڭ مولشەرىن بەلگىلەۋ جانە ولاردىڭ ءتىزىمىن انىقتاپ، كوپ بالالى وتباسىلارعا، كوپ بالالى انالارعا، ونىڭ ىشىندە از قامتىلعان وتباسىلارعا 8 ناۋرىزعا (حالىقارالىق ايەلدەر كۇنىنە) دەيىن 2,5 اەك (7 293 تەڭگە) مولشەرىندە بىرجولعى الەۋمەتتىك كومەك تاعايىندالادى، - دەپ جازدى ول.
ونىڭ ايتۋىنشا، ايەلدەردىڭ تىزىمدەرىن "ازاماتتارعا ارنالعان ۇكىمەتتىڭ" نۇر-سۇلتان فيليالى ۇسىنادى.
«ادىرنا» ۇلتتىق پورتالى
