اراي وڭعارقىزى 6 جاسىنان قولىنا دومبىرا ۇستاعان. قارشاداي قىز ۇلكەن ساحناعا اياق باسقالى ەكى جىل عانا بولعانىمەن، ءداستۇرلى ورىنداۋشىلاردىڭ رەسپۋبليكالىق جانە حالىقارالىق بايقاۋلارىندا جۇلدە الىپ، حالىقتىڭ ىقىلاسىنا بولەنىپ ۇلگەردى دەپ جازادى "حابار" ارناسىنىڭ رەسمي سايتى.
شىناشاقتاي قىزدىڭ شەجىرەدەن سىر تارتقان سازدى جىردى توگىلتە ورىنداۋى ونىڭ وزىندىك ەرەكشەلىگى. سىر سۇلەيلەرىنىڭ سارا جولىن جالعاۋشى جاس تالانت تولعاۋ-تەرمەلەردى عانا ەمەس، ايگىلى كورۇعلى داستانىن دا كومەيىندە قۇيقىلجىتىپ ءجۇر. ارايدىڭ ۇستازى زاۋرە كارىباەۆا اۋىلداعى «تاسبەرگەن جىراۋ» ۇيىرمەسىنە جەتەكشىلىك جاسايدى. تىرناقتاي قىزدىڭ تالانتىن بايقاپ، قاناتىن قومداعان وسى كىسى.
زاۋرە كارىباەۆا، «تاسبەرگەن جىراۋ» ۇيىرمەسىنىڭ جەتەكشىسى
-رەسپۋبليكالىق «شوق جۇلدىز» بايقاۋىنا قاتىسىپ، باس جۇلدە الدىق. ودان كەيىن حالىقارالىق «بوزتورعاي» بايقاۋىنا بارىپ، ەكىنشى ورىن الدىق. ۇستىمىزدەگى جىلدىڭ ءساۋىر ايىندا قىتاي حالىق رەسپۋبليكاسىنىڭ ءۇرىمشى قالاسىنداعى «تالانت شوۋ» دەگەن ۇلكەن بايقاۋعا وسى قىزىلوردا وبلىسىنىڭ اتىنان كىشكەنتاي تەرمەشى رەتىندە اراي بارىپ قاتىستى. تۇركيا قالاسىنا جولدامامىز ناۋرىز ايىندا بولادى دەپ كۇتىلۋدە.
جۋىردا جاس جىرشى الاتاۋدىڭ باۋرايىنداعى اسەم قالادا ەلباسىنىڭ الدىندا ونەر كورسەتىپ، اقىن-جىراۋ ايدوس راحمەتوۆتىڭ «ەلىن سۇيگەن ەلباسى» تۋىندىسىن ورىندادى. تالابى تاۋداي ورەننىڭ ونەرىنە ريزا بولعان مەملەكەت باسشىسى باتاسىن بەرىپ، دومبىرا سىيعا تارتتى.
اراي وڭعارقىزى، جىرشى
-بۇل دومبىرا مەن ءۇشىن ۇلكەن سىيلىق. ەلباسىنىڭ سەنىمىن اقتايمىن. وسى دومبىرامەن ءارى قاراي جىرشىلىعىمدى جالعاستىرا بەرەمىن.
ىرىسبيكە ماسەنقىزى، اراي وڭعارقىزىنىڭ اجەسى
-قانشاما حالىقتىڭ الدىنا تايسالماي، ايدىك ساحنادا ارالدىڭ جىراۋى نۇرتۋعاننىڭ تەرمەسىن جاتقا ايتىپ بەرگەن، سونشاما شۋماقتىڭ ءبارىن. ءسويتىپ حالىقتىڭ بارلىعى دۇرسىلكىنىپ قۋانىپ، سودان بەرى اراي حالىقتىڭ دا اۋزىنان تۇسپەي ءجۇر، ساحنادان دا تۇسپەي ءجۇر.
ءجۇز شايىر شىققان تۇرماعامبەت اۋىلىندا تۋعان بالا جىرشىنىڭ دارا جىرشى بولارىنا ءداستۇرلى ونەردىڭ مايتالماندارى شەك كەلتىرمەيدى. وسىنداي تەكتى ۇرپاق باردا ۇلتتىق ونەر دە ومىرشەڭ.
نۇرلان جاقىپبەكوۆ،
khabar.kz
