پرەمەر-مينيستر اسقار مامين قازاقستاندىقتاردى ناۋرىز مەيرامىمەن قۇتتىقتادى،- دەپ حابارلايدى "ادىرنا" ۇلتتىق پورتالى. بۇل تۋرالى ۇكىمەتتىڭ رەسمي سايتى ءمالىم ەتتى.
«قىمباتتى قازاقستاندىقتار! سىزدەردى ناۋرىز مەيرامىمەن شىن جۇرەكتەن قۇتتىقتايمىن! بۇل كوكتەمگى مەرەكەنى حالقىمىز جاڭا جىلدىڭ باسى جانە تىرشىلىك اتاۋلىنىڭ تۇرلەنەتىن كەزى رەتىندە قاستەرلەيدى. ناۋرىز ادامداردىڭ بويىندا ەڭ جارقىن جانە يگى تىلەكتەرىنىڭ ورىندالۋىنا ءۇمىت ۇيالاتىپ، كەمەل كەلەشەككە باستايدى. ۇرپاقتان ۇرپاققا جالعاسىپ كەلە جاتقان ناۋرىزدىڭ ەجەلگى داستۇرلەرى ادامعا ەڭ جاقسى سەزىمدەردى سىيلاپ، اينالاسىنداعىلارعا مەيىرىمدىلىكپەن كوڭىل بولۋگە، قوناقجايلىلىق تانىتۋعا، ءوزارا كومەك كورسەتۋگە، تابيعاتپەن ۇيلەسىم تاۋىپ ءومىر سۇرۋگە جەتەلەيدى. كوكتەمنىڭ كەلۋىمەن ادامدار ءبىر-بىرىنە ەڭ ىزگى تىلەكتەرىن ارناپ، اعاش وتىرعىزادى، بۇلاقتاردىڭ كوزىن ارشىپ، قامقورلىق پەن قولداۋدى قاجەت ەتەتىن تىرشىلىك يەلەرىنە كومەكتەسەدى. تاۋەلسىزدىك العاننان بەرى ناۋرىز مەيرامىن تويلاۋ بەيبىتشىلىكتى نىعايتۋدا جانە ەلىمىزدىڭ كوپۇلتتى حالقىنىڭ بىرلىگىن قامتاماسىز ەتۋدە ەرەكشە ماڭىزعا يە بولدى. ول ۇلتىنا، ءتىلى مەن دىنىنە قاراماستان، قازاقستاندىقتاردىڭ ەڭ سۇيىكتى مەرەكەلەرىنىڭ بىرىنە اينالدى. بارلىق قازاقستاندىقتارعا جاقسىلىق، اماندىق-ساۋلىق پەن ءوسىپ-وركەندەۋ تىلەيمىن، ءار وتباسىندا قۋانىشتى جانە جارقىن كۇندەر كوپ بولسىن! ءاز ناۋرىز حالقىمىزعا بەرەكەلى ىرىسىن، شۋاق نۇرىن الا كەلسىن! ۇلىستىڭ ۇلى كۇنى قۇتتى بولسىن!»دەدى اسقار مامين.
"ادىرنا" ۇلتتىق پورتالى
