ورتالىق كوممۋنيكاتسيالار قىزمەتىنىڭ بريفينگىندە قر ءبىلىم جانە عىلىم ۆيتسە-ءمينيسترى شولپان كارينوۆا بيىلعى جىلعى مەكتەپ تۇلەكتەرى جايلى سۇراقتارعا جاۋاپ بەردى، دەپ حابارلايدى "ادىرنا" ۇلتتىق پورتالى. بۇل تۋرالى zakon.kz سايتى مالىمدەدءى.
"9-11 سىنىپ وقۋشىلارىن ءۇشىنشى توقساننان باستاپ وففلاين رەجيمدە وقىتۋ تۋرالى شەشىم، قورىتىندى ەمتيحاننىڭ تاپسىرىلۋىنا تىكەلەي بايلانىستى بولدى. 9-سىنىپ جانە 11-سىنىپ وقۋىشىلارى ءۇشىن بۇل ماڭىزدى. قازىرگى تاڭدا ءبىز دە، مەكتەپتەر دە، مەكتەپتەگى تۇلەكتەر دە ۇلتتىق بىرىڭعاي تەستىلەۋگە جانە قورىتىندى اتتەستاتسيالاۋ ەمتيحانىنا دايىندىق ۇستىندە. بۇل ەمتيحان نەگىزگى جانە ورتا مەكتەپتى بىتىرگەندىگى تۋرالى كۋالىكتى راستاۋ ءۇشىن قاجەتتى ەمتيحان بولىپ سانالادى. سوندىقتان، بۇگىن قر ءبىلىم جانە عىلىم مينيسترلىگىنىڭ بۇيرىعى دايىندالۋدا جانە قورىتىندى اتتەستاتتاۋ بيىل وتەدى دەپ پايىمداپ وتىرمىز»، - دەدى كارينوۆا.
ونىڭ ايتۋىنشا، 9-سىنىپتار ەمتيحاندى ءۇش ءپان بويىنشا: ماتەماتيكا، قازاق جانە ورىس تىلدەرىندە وقىتۋ تىلىنە نەگىزدەلگەن ەمتيحان تاپسىرادى. ال 11-سىنىپ وقۋشىلارى 4 ەمتيحان تاپسىرادى. تولىق اقپارات ءمينيستردىڭ بۇيرىعىندا كورسەتىلگەن.
ء"بىتىرۋشى تۇلەكتەر ەمتيحان تاپسىرادى دەپ شەشىلدى. بىراق تاعى ءبىر ايتا كەتەتىن جايت، قازىر ءبىز تەك ءتورتىنشى توقساننىڭ باستالۋى جايلى ايتىپ وتىرمىز. سانيتارلىق-ەپيدەميولوگيالىق جاعدايعا بايلانىستى بولەك شەشىمدەر قابىلدانادى", - دەپ ءتۇسىندىردى دەپارتامەنت وكىلى.
ەسكە سالا كەتەيىك، 2020 جىلى توتەنشە جاعدايدىڭ ورىن الۋىنا جانە ءبىلىم بەرۋ جۇيەسىنىڭ قاشىقتان وقىتىلۋىنا بايلانىستى تۇلەكتەر قورىتىندى اتتەستاتسيالاۋ ەمتيحانى مەن مەملەكەتتىك ەمتيحاننان بوساتىلعان بولاتىن.
"ادىرنا" ۇلتتىق پورتالى
