پاۆلوداردا ەكى مەكتەپ ديرەكتورىنىڭ بۇرىن ءىستى بولعانى انىقتالدى. ەكەۋى دە جۇمىستان شىعارىلدى. بۇل تۋرالى سىبايلاس جەمقورولىققا قارسى ءىس-قيمىل اگەنتتىگىنىڭ وبلىستىق دەپارتامەنتىنىڭ باسشىسى مىندەتىن اتقارۋشى ارداق بالعوجين مالىمدەدى.
رەسمي مالىمەتكە سايكەس، ديرەكتوردىڭ بىرەۋى اققۇلى اۋدانىندا ب.ۋحاتوۆ اتىنداعى ورتا مەكتەپتى باسقارسا، ەكىنشىسى قىزىلتاڭ اۋدانداعى تەرەڭكول مەكتەبىنە جەتەكشىلىك ەتكەن.
ء"بىرىنشى ديرەكتور قازسسر قىلمىستىق كودەكسىنىڭ 93-بابى ("جابىرلەنۋشىنىڭ ولىمىنە اكەلىپ سوققان قاساقانا اۋىر جاراقات سالۋ نەمەسە قىلمىستى اۋىرلاتاتىن جاعدايدا جاسالعان ارەكەت") بويىنشا سوتتالعان بولاتىن. ال ەكىنشى مەكتەپ باسشىسى جەمقورىق قىلمىسى ءۇشىن ءىستى بولعان", - دەدى بالعوجين ايماقتىق كوممۋنيكاتسيالار قىزمەتىندە وتكەن بريفينگتە.
ونىڭ ايتۋىنشا، ەڭبەك كودەكسىنىڭ 26-بابى بويىنشا سوتتى بولعان جانە قىلمىستىق قۋدالاۋدا جۇرگەن ادامداردى ءبىلىم بەرۋ، كامەلەتتىك جاسقا تولماعانداردى تاربيەلەۋ مەن دامىتۋ ۇيىمدارىنا جۇمىسقا قابىلداۋعا تىيىم سالىنعان. ءدال وسى باپقا سايكەس، جەمقورلىق قىلمىسىن جاساعان تۇلاعالارعا دا ونداي مەكەمەلەردە قىزمەت ەتۋگە رۇقسات ەتىلمەيدى.
تالداۋ جۇمىستارىنىڭ ناتيجەسىندە ءبىلىم باسقارماسىنا ەكى لاۋازىمدى تۇلعاعا قاتىستى شارا قولدانۋعا ۇسىنىس جاسالدى. ەكەۋى دە جۇمىستان بوساتىلدى.
