ەرجان قازىحانوۆ پرەزيدەنتتىڭ ارنايى وكىلى بولىپ تاعايىندالدى

2910
Adyrna.kz Telegram

ەرجان قازىحانوۆ پرەزيدەنتتىڭ حالىقارالىق ىنتىماقتاستىق جونىندەگى ارنايى وكىلى بولىپ تاعايىندالدى، دەپ حابارلايدى "ادىرنا" ۇلتتىق پورتالى.

ول 2017 جىلدىڭ اقپان ايىنان بەرى اتقارعان قازاقستاننىڭ امەريكا قۇراما شتاتتارىنداعى توتەنشە جانە وكىلەتتى ەلشىسى قىزمەتىنەن بوساتىلدى.

سىرتقى ىستەر ءمينيسترىنىڭ ەكس-ورىنباسارى ەرجان اشىقباەۆتىڭ قازاقستاننىڭ اقش-تاعى جاڭا ەلشىسى بولعانىن دا اتاپ وتكەن ءجون.

بۇعان دەيىن قاسىم-جومارت توقاەۆ پرەزيدەنتتىڭ حالىقارالىق ىنتىماقتاستىق جونىندەگى ارنايى وكىلى تۋرالى ەرەجەنى بەكىتكەن بولاتىن. قۇجاتقا سايكەس ارنايى وكىلدى پرەزيدەنت اكىمشىلىگى باسشىسىنىڭ ۇسىنىسى بويىنشا پرەزيدەنت تاعايىندايدى جانە قىزمەتتەن بوساتادى. ەل پرەزيدەنتىنىڭ الدىندا ەسەپ بەرەدى.

ارنايى وكىلدىڭ نەگىزگى مىندەتتەرى: ساياسي، ەكونوميكالىق، گۋمانيتارلىق جانە ەكولوگيالىق سالالاردا حالىقارالىق قاتىناستار ورناتۋ; قازاقستان رەسپۋبليكاسى سىرتقى ساياساتىنىڭ جانە پرەزيدەنت باستامالارىنىڭ نەگىزگى باعىتتارىن ىلگەرىلەتۋدى قامتاماسىز ەتۋ.

ەرجان قازىحانوۆ 1964 جىلى 21 تامىزدا الماتىدا دۇنيەگە كەلگەن. لەنينگراد مەملەكەتتىك ۋنيۆەرسيتەتىنىڭ شىعىستانۋ فاكۋلتەتىن بىتىرگەن. تاريح عىلىمدارىنىڭ كانديداتى. ديپلوماتيالىق مانسابىن 1989 جىلى ەكىنشى حاتشى رەتىندە باستادى. ورتالىق اپپاراتتا ءتۇرلى قىزمەتتەر اتقاردى.

ول نيۋ-يوركتەگى بۇۇ جانىنداعى قازاقستاننىڭ تۇراقتى وكىلدىگىندە جۇمىس ىستەدى.  قازاقستاننىڭ اۆسترياداعى، ۇلىبريتانياداعى جانە سولتۇستىك يرلاندياداعى ەلشىسى، سونىمەن قاتار نيۋ-يوركتەگى بۇۇ جانىنداعى قازاقستاننىڭ تۇراقتى وكىلى جانە ۆەناداعى حالىقارالىق ۇيىمدارداعى قازاقستاننىڭ تۇراقتى وكىلى بولعان. ول ەكى رەت پرەزيدەنتتىڭ كومەكشىسى بولعان. 2007-2008, 2011 جىلدارى سىرتقى ىستەر ءمينيسترىنىڭ ورىنباسارى بولدى. 2011-2012 جىلدارى سىرتقى ىستەر مينيسترلىگىن باسقاردى.

"ادىرنا" ۇلتتىق پورتالى

پىكىرلەر