قاراعاندىدا كوروناۆيرۋسقا بايلانىستى شەكتەۋدىڭ كۇشەيۋىنە بايلانىستى بىرنەشە تۇرعىن سوتقا ازاماتتىق شاعىم ءتۇسىردى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
شاعىم يەلەرى وبلىستىڭ باس سانيتار دارىگەرى يۋري زالىگين قول قويعان كارانتيندى كۇشەيتۋ تۋرالى قاۋلىنىڭ كۇشىن جويۋدى جانە شەكتەۋ شارالارىن زاڭسىز دەپ تانۋدى سۇراپ وتىر. شاعىمدا شەكتەۋ شارالارى "قوعامدى شوشىتىپ", "پسيحولوگيالىق قىسىم رەتىندە باعالانىپ وتىر" دەپ كورسەتىلگەن.
— شەكتەۋ شارالارىنا قارسىمىن. قوعامداعى كوڭىل-كۇي وزگەرىپ، اسىرەسە ناۋرىز الدىندا ءبىزدىڭ ءبارىمىزدى جاۋىپ تاستاپ، جەكەلەگەن تۇلعالار پەن باستاما توپتارى پايدا بولعان شاقتا شاعىم ءتۇسىرۋ تۋرالى وي كەلدى. جاۋاپكەردىڭ مەكەنجايى بويىنشا سەگىز شاعىم ازىرلەندى. بەسەۋى سوتقا ءتۇسىرىلدى، تاعى تۇسىرەتىندەر بار، – دەدى ازاتتىققا شاعىمدانۋشىلاردىڭ ءبىرى، زاڭگەر يرينا فۋرسوۆا.
ونىڭ سوزىنە قاراعاندا، كارانتيندى كۇشەيتۋ تۋرالى قاۋلى ازاماتتاردىڭ ەركىن ءجۇرىپ-تۇرۋ قۇقىعى، تۇتىنۋشىنىڭ تۇتىنۋ قۇقىعى، ەڭبەك ەتۋ قۇقىعى، بالانىڭ ءبىلىم الۋ قۇقىعىن بۇزعان. سوتتار ونلاين-رەجيمدە وتكەندىكتەن ازاماتتاردىڭ سوتپەن قورعالۋ قۇقىعى دا شەكتەلگەن.
تۇرعىندار شاعىمدا شەكتەۋ شارالارى بۇل "بيلىكتىڭ ديۆەرسيا مەن ساتقىندىعىن بۇركەۋ ءۇشىن قازاقستان حالقى الدىندا قويعان سپەكتاكلى" دەپ جازعان. ولار ىندەتتىڭ كەلگەنىنە ءبىر جىلدان استام ۋاقىت وتسە دە جانە تۇرعىندار كارانتين تالاپتارىن قاتاڭ ساقتاپ، ۇيدە وتىرسا دا، دەنساۋلىق ساقتاۋ سالاسىنداعى شەنەۋنىكتەر ينفەكتسيانى تەجەي المادى، ادامداردىڭ قالىپتى ومىرگە ورالۋى ءۇشىن قاجەتتى دارەجەدە كۇرەسپەدى دەپ سانايدى.
ازاتتىق ءتىلشىسى قاراعاندى وبلىسىنىڭ سانيتارلىق-ەپيدەميولوگيالىق قاداعالاۋ دەپارتامەنتىنە حابارلاسىپ كوردى. بىراق ولار ء"اربىر ازاماتتىڭ شاعىم بەرۋگە قۇقىعى بار" دەپ تۇسىنىكتەمە بەرۋدەن باس تارتتى.
قازبەك اۋداندىق سوتى باس سانيتار دارىگەردىڭ قاۋلىسىن زاڭسىز دەپ تانۋدى تالاپ ەتكەن بەس شاعىمنىڭ تۇسكەنىن راستادى. بىرەۋى وندىرىسكە قابىلدانعان، بىرەۋى شاعىم يەسىنە قايتارىلعان، قالعاندارى قاراستىرىلىپ جاتىر.
ناۋرىز ايىندا قاراعاندى وبلىسى كوروناۆيرۋس بويىنشا "قىزىل ايماقتا" تۇرعان كەزدە وبلىس ورتىلىعى مەن بىرقاتار ەلدى مەكەندەردە شەكتەۋ شارالارى كۇشەيگەن. شەنەۋنىكتەر ناۋقاستاردىڭ كوبەيۋىن ناۋرىز مەرەكەسىن بىرىگىپ تويلاۋمەن بايلانىستىرعان.
ەلدە ىندەت باستالعالى بەرى 256 مىڭنان استام ادامنىڭ كوروناۆيرۋس تەستى وڭ شىققان. 3129 ادام كوروناۆيرۋستان قايتىس بولعان. كوپتەگەن ساراپشىلار ناۋقاستاردىڭ شىنايى سانى رەسمي كورسەتكىشتەن الدەقايدا كوپ دەپ سانايدى.
ەلدە تەز جۇعاتىن شتامدار تاراپ جاتقان شاقتا دەنساۋلىق ساقتاۋ مينيسترلىگى ءساۋىر ايىنىڭ باسىندا "رەاليستىك ستسەناري" بويىنشا الداعى ءۇش ايدا تاعى 250 مىڭ ناۋقاس تىركەلەدى، 127 مىڭى اۋرۋحاناعا جاتادى دەپ بولجاعان.
