كەنتاۋدا وزگە ۇلتتان 18 بالانى باۋىرىنا باسقان انا تۇرادى، دەپ حابارلايدى «ادىرنا» ءتىلشىسى حابار 24-كە سىلتەمە جاساپ.
تۇيمەكۇل ەرگەشقىزى جاس كەزىندە باۋىرلارىن جەتىلدىرەمىن دەپ ءجۇرىپ، ءوزى تۇرمىس قۇرماي قالعان. كەيىن بالالى بولۋدى ارمانداپ، ءتۇرلى ۇلتتىڭ 18 بالاسىن اسىراپ الىپ، باۋىرىنا باسقان. بۇگىندە ۇلكەن بەس پەرزەنتى ءوز الدىنا وتاۋ قۇرسا، كەنجەسى نەبارى ەكى جاستا. كەنتاۋلىق كاسىپكەر تۇيمەگۇل ەرگەشقىزى 33 جاسىندا العاشقى قىزىن اسىراپ الىپتى. ءتىپتى وزگە ۇلتتىڭ 18 بالاسىن اسىراپ الامىن دەگەن وي ءۇش ۇيىقتاسام تۇسىمە كىرمەگەن دەيدى. بارلىعى اللانىڭ قالاۋىمەن بولعانىن ايتادى. قازىر پەرزەنتتەرىنىڭ الدى اياقتانىپ، ءۇيلى بولعان. ۇلكەن ءۇش قىزىن ۇزاتىپ، ەكى ۇلىن ۇيلەندىرگەن. ولاردان ءتورت نەمەرە ءسۇيىپ وتىر.
«تاۋەكەل دەپ وسى جولدى تاڭدادىم. قۇدايعا شۇكىر. باقىتتىمىن. ات باسىنداي التىن بەرسە دە، ايىرباستامايمىن ەشكىمگە. بالالارىمنىڭ ىشىندە ۇلتى باسقا بالالار دا بار. قازاعى بار، وزبەگى بار، ورىسى بار، كارىسى بار دەگەندەي. ءبارى قازىر قازاق، قازاقشا سويلەيدى»،–دەيدى ول.
ءوزى دە كوپبالالى وتباسىندا وسكەن انا بالا باعىپ، تاربيەلەۋدىڭ وڭاي ەمەستىگىن جاسىرمايدى. قينالعان ساتتەرىمدى بالالارىما كورسەتپەۋگە تىرىسامىن دەيدى. باستاپقىدا اناسى كومەكتەسسە، قازىر ۇلكەندەرى كىشىلەرگە قامقورشى بولادى. ءبىرى ساباعىن وقىتسا، ەندى ءبىرى ءۇيدىڭ جۇمىسىنا قولقانات.
«باۋىرلارىمنىڭ كوپ بولعانى جاقسى ەكەن. اعام اقىل ايتادى. اپكەم دۇرىس جولدى كورسەتەدى. ىنىلەرىممەن وينايمىز، قارىنداستارىما كومەكتەسەمىن»،–دەيدى تۇيمەگۇل ەرگەشقىزىنىڭ ۇلى ەراسىل بەلياەۆ.
جاستايىنان كاسىپكەرلىكپەن اينالىسىپ، تاباندىلىق، قاجىرلىلىقپەن تابىسقا قول جەتكىزگەن انا پەرزەنتتەرىن دە ەڭبەككە باۋلىپ ءجۇر. ۇلدارىنا كولىك جوندەۋ مەن دانەكەرلەۋدىڭ قىر-سىرىن ۇيرەتەدى. ۇيدەگى قۇرىلىس جۇمىستارىن دا بىرلەسىپ ىستەي بەرەدى. ال قىزدارى دۇكەن مەن ءدامحانانىڭ جۇمىسىن جۇرگىزۋگە كومەكتەسەدى.
«ادىرنا» ۇلتتىق پورتالى
