Kentauda özge ūlttan 18 balany bauyryna basqan ana tūrady, dep habarlaidy «Adyrna» tılşısı Habar 24-ke sılteme jasap.
Tüimekül Ergeşqyzy jas kezınde bauyrlaryn jetıldıremın dep jürıp, özı tūrmys qūrmai qalǧan. Keiın balaly boludy armandap, türlı ūlttyŋ 18 balasyn asyrap alyp, bauyryna basqan. Bügınde ülken bes perzentı öz aldyna otau qūrsa, kenjesı nebärı ekı jasta. Kentaulyq käsıpker Tüimegül Ergeşqyzy 33 jasynda alǧaşqy qyzyn asyrap alypty. Tıptı özge ūlttyŋ 18 balasyn asyrap alamyn degen oi üş ūiyqtasam tüsıme kırmegen deidı. Barlyǧy Allanyŋ qalauymen bolǧanyn aitady. Qazır perzentterınıŋ aldy aiaqtanyp, üilı bolǧan. Ülken üş qyzyn ūzatyp, ekı ūlyn üilendırgen. Olardan tört nemere süiıp otyr.
«Täuekel dep osy joldy taŋdadym. Qūdaiǧa şükır. Baqyttymyn. At basyndai altyn berse de, aiyrbastamaimyn eşkımge. Balalarymnyŋ ışınde ūlty basqa balalar da bar. Qazaǧy bar, özbegı bar, orysy bar, kärısı bar degendei. Bärı qazır qazaq, qazaqşa söileidı»,–deidı ol.Özı de köpbalaly otbasynda ösken ana bala baǧyp, tärbieleudıŋ oŋai emestıgın jasyrmaidy. Qinalǧan sätterımdı balalaryma körsetpeuge tyrysamyn deidı. Bastapqyda anasy kömektesse, qazır ülkenderı kışılerge qamqorşy bolady. Bırı sabaǧyn oqytsa, endı bırı üidıŋ jūmysyna qolqanat.
«Bauyrlarymnyŋ köp bolǧany jaqsy eken. Aǧam aqyl aitady. Äpkem dūrys joldy körsetedı. Inılerımmen oinaimyz, qaryndastaryma kömektesemın»,–deidı Tüimegül Ergeşqyzynyŋ ūly Erasyl Beliaev.Jastaiynan käsıpkerlıkpen ainalysyp, tabandylyq, qajyrlylyqpen tabysqa qol jetkızgen ana perzentterın de eŋbekke baulyp jür. Ūldaryna kölık jöndeu men dänekerleudıŋ qyr-syryn üiretedı. Üidegı qūrylys jūmystaryn da bırlesıp ıstei beredı. Al qyzdary düken men dämhananyŋ jūmysyn jürgızuge kömektesedı.
«Adyrna» ūlttyq portaly
Ūqsas jaŋalyqtar
