بەلگىلى ءانشى قاراقات ءابىلدينا ەكس-مينيستر ەلجان ءبىرتانوۆتى ايىپتاۋعا قارسى ەكەندىگى تۋرالى Instagram جەلىسىندەگى پاراقشاسىندا جازدى، دەپ حابارلايدى «ادىرنا» ۇلتتىق پورتالى.
«جاۋ الىستان كەلمەيدى دەگەن ءسوز بار قازاقتا. كەي جاعدايدى كورىپ ءىشىڭ كۇيگەندە بۇل سوزبەن كەلىسپەسكە امالىڭ قالمايدى. قولىنان ءىس كەلەتىن ازاماتتى اياقتان شالۋ، جالا جاۋىپ، كۇيە جاعۋ - قازاقتىڭ قانىنا ءسىڭىپ كەتكەن باياعى قاسيەتى. اششى دا بولسا شىندىق. مۇندايعا ەتىمىز دە ۇيرەنىپ كەتتى مە، شىمىرىكپەي جالانى جاۋىپ كەلىپ وتىرا بەرەتىن جۇرتقا اينالدىق. بۇگىندە، قازاقتىڭ ءبىر ازاماتى، بىلىكتى مامان يەسى ەلجان امانتايۇلى ءبىرتانوۆ «جاپتىم جالا، جاقتىم كۇيە» دەگەنگە كەتىپ وتىر.
ءوزىن تانيمىز. ادالدىعىن، ازاماتتىعىن بىلەمىز. اكەسى دە دەنساۋلىق سالاسىنا ەڭبەگى سىڭگەن قۇرمەتتى ادام. سونداي اكەنىڭ اسا قاتال، قاتاڭ، مىقتى تاربيەسىمەن وسكەن ۇلدىڭ ونداي ارەكەتكە باراتىنىنا سەنبەيمىز. ءبىرتانوۆتاي ازاماتتىڭ «كىم جۇمىس جاسايدى، سونىڭ اياعىنان شالاتىن ادەيى قاستاندىقتىڭ» جەمتىگى بولىپ كەتپەسە ەكەن دەگەن تىلەك. ايدى ەتەگىڭمەن جاسىرا المايسىڭ، ءوز اتىن جابۋ ءۇشىن ءبىر جاقسىنى قۇربان ەتەتىن سۇمىراي ساياسات بار ەلىمىزدە. سول سۇرقيا ساياساتتىڭ كەزەكتى قۇربانى رەتىندە ءبىرتانوۆتى كوزدەپ وتىرعانىن كوپ قازاق ءىشى سەزىپ، ءبىلىپ تە وتىر! ءۇنسىز قالۋعا بولمايدى! ۇلىڭدى قورعا، قولدا قازاق ەلى! مەن ەلجان ءبىرتانوۆتى ايىپتاۋعا قارسىمىن!» - دەپ جازدى قاراقات ءابىلدينا.
"ادىرنا" ۇلتتىق پورتالى
(فوتو وinet.kz سايتىنان)
