قاراعاندى وبلىسىنىڭ يۋۆەنالدى سوتىندا ساتباەۆ قالاسىنداعى جاپپاي تارتىپسىزدىككە قاتىسقان 55 ادامعا قاتىستى ۇكىم شىقتى. ولار ەكى قىلمىستىق باپ - «جاپپاي تارتىپسىزدىك» جانە «بيلىك وكىلىنە قاتىستى زورلىق-زومبىلىق» بويىنشا كىنالى دەپ تانىلدى دەپ حابارلادى azattyq-ruhy.kz.
سوتتالۋشىلار تاعىلعان ايىپتى مويىنداپ، پروكۋروردىڭ سوتتان سۇراعان جازاسىمەن كەلىستى. توعىز ادام ءۇش جىلعا باس بوستاندىعىنان ايىرىلسا، تاعى 44 سوتتالۋشى ءتورت جىلعا شارتتى تۇردە جازا الدى. قالعان ەكى ادامن ءبىر جارىم جىلعا شارتتى تۇردە باس بوستاندىعىنان ايىرىلدى.
سوتتا 49 ەر ادام مەن 6 ايەلگە قاتىستى ءىس قارالدى. سوتتالۋشىلاردىڭ ۇشەۋى جاپپاي تارتىپسىزدىك بولعان كەزدە 18 جاسقا تولماعان ەدى.
ەسكە سالايىق، ساتباەۆ قالاسىنداعى وقيعا بىلتىر 23 شىلدە تۇنگى ۋاقىتتا بولعان ەدى. الدىمەن جوعالىپ كەتكەن 5 جاسار قىزدى بۇكىل قالا بولىپ ىزدەگەن. كەيىن كىشكەنتاي قىز قالاداعى پاتەرلەردىڭ بىرىنەن تابىلدى. ونىڭ جانىندا ەرەسەك ەر ادام بولعان. كۇدىكتىنىڭ ۇستىنەن «ادام ۇرلاۋ» جانە «كىشكەنتاي بالانى زورلاۋ» بابىمەن قىلمىستىق ءىس قوزعالدى. ال قالا تۇرعىندارى بولسا پوليتسەيلەردەن كۇدىكتى ەر ادامدى بەرۋدى تالاپ ەتىپ، تارتىپسىزدىك جاسادى. سالدارىنان ءۇش اۆتوكولىك ورتەنىپ، بىرنەشەۋىنە زاقىم كەلگەن.
2020 جىلدىڭ 6 قازانىندا قاراعاندى قالاسىنىڭ تەرگەۋ يزولياتورىندا كۇدىكتىنىڭ ءولى دەنەسى تابىلدى. ول ءوز-وزىنە قول سالعان.
