Sätbaev qalasyndaǧy jappai tärtıpsızdıkke qatysqan 55 adamǧa sot ükımı şyqty

Qaraǧandy oblysynyŋ iuvenaldy sotynda Sätbaev qalasyndaǧy jappai tärtıpsızdıkke qatysqan 55 adamǧa qatysty ükım şyqty. Olar ekı qylmystyq bap - «jappai tärtıpsızdık» jäne «bilık ökılıne qatysty zorlyq-zombylyq» boiynşa kınälı dep tanyldy dep habarlady azattyq-ruhy.kz. Sottaluşylar taǧylǧan aiypty moiyndap, prokurordyŋ sottan sūraǧan jazasymen kelıstı. Toǧyz adam üş jylǧa bas bostandyǧynan aiyrylsa, taǧy 44 sottaluşy tört jylǧa şartty türde jaza aldy. Qalǧan ekı adamn bır jarym jylǧa şartty türde bas bostandyǧynan aiyryldy. Sotta 49 er adam men 6 äielge qatysty ıs qaraldy. Sottaluşylardyŋ üşeuı jappai tärtıpsızdık bolǧan kezde 18 jasqa tolmaǧan edı. Eske salaiyq, Sätbaev qalasyndaǧy oqiǧa byltyr 23 şılde tüngı uaqytta bolǧan edı. Aldymen joǧalyp ketken 5 jasar qyzdy bükıl qala bolyp ızdegen. Keiın kışkentai qyz qaladaǧy päterlerdıŋ bırınen tabyldy. Onyŋ janynda eresek er adam bolǧan. Küdıktınıŋ üstınen «adam ūrlau» jäne «kışkentai balany zorlau» babymen qylmystyq ıs qozǧaldy. Al qala tūrǧyndary bolsa poliseilerden küdıktı er adamdy berudı talap etıp, tärtıpsızdık jasady. Saldarynan üş avtokölık örtenıp, bırneşeuıne zaqym kelgen. 2020 jyldyŋ 6 qazanynda Qaraǧandy qalasynyŋ tergeu izoliatorynda küdıktınıŋ ölı denesı tabyldy. Ol öz-özıne qol salǧan.