مۇنايلى ولكە اتىراۋدا بىلتىر 440 ميلليون تەڭگەگە جوندەۋدەن وتكەن مەكتەپتىڭ ەدەنىن مۇعالىمدەر وزدەرى جاماپ جاتىر، دەپ حابارلايدى "ادىرنا" ۇلتتىق پورتالى "ينفورمبيۋرو" جاڭالىقتار باعدارلاماسىنا سىلتەمە جاساپ.
قازىنانىڭ قارجىسى يگەرىلگەن. بىتكەن جۇمىستى جاۋاپتىلار قابىلداپ العان. الايدا ميلليونداپ قارجى بولىنسە دە ساپا سىن كوتەرمەيدى. ءبىلىم ورداسىنىڭ ەسىك-تەرەزەسى قاڭىراپ، ەدەنى شۇرىق-تەسىك كۇيىندە قالعان. اتىراۋ قالاسىنداعى ماقاش بەكمۇحانبەتوۆ اتىنداعى مەكتەپتىڭ ماسەلەسىن قىزمەتكەرىنىڭ ءبىرى الەۋمەتتىك جەلىگە سالعان.
ءتىپتى 440 ميلليون تەڭگەگە تولىقتاي كۇردەلى جوندەۋدەن وتكەن مەكتەپتىڭ ەدەنىنىڭ تەسىكتەرىن قىزمەتكەرلەر وزدەرى جاماپ جاتىر دەپ، ايتقانىنا دالەل بولاتىنداي سۋرەتتەردى دە جاريالاپتى. مۇنى مەكتەپتىڭ مۇعالىمدەرىنىڭ ءبىرى راستادى. ونىڭ سوزىنشە ميلليونداپ قارجى بولىنگەنىمەن ساپاسى سىن كوتەرمەيدى.
“ەرىكسىز ءماجبۇرلى تۇردە. سىرتتاعى بىتپەي قالعان جۇمىستىڭ بارلىعىن مۇعالىمدەر جاسادى. جەر-جەردە بوقتىق قالدى.سونىڭ بارلىعىن قىزمەتكەرلەر جاسادى. جىگىتتەر جاعىن شاقىرتىپ جاساتتى”، – دەيدى م.بەكمۇحانبەتوۆ اتىنداعى ورتا مەكتەپ مۇعالىمى رايسا جۋماباەۆا.
ال مەكتەپ ديرەكتورىنىڭ سوزىنشە جوندەۋ جۇمىسىن جاساۋعا مۇعالىمنىڭ ءوزى ۇسىنىس جاساپتى.
“دەنە شىنىقتىرۋ مۇعالىمى ۇسىنىس جاسادى. ەدەن كورىكتى بولۋى ءۇشىن، ودان ءارى جاقسارتۋ ماقساتىندا ءبىر-ەكى ساڭىلاۋ بولدى سونى اپاي بىتەپ تاستاساق قايتەدى دەپ ءوز ەرىكتەرىمەن 2-3 جەردى بىتەدى”، - دەيدى م.بەكمۇحانبەتوۆ اتىنداعى ورتا مەكتەپ ديرەكتورى اينۇر سالىقوۆا.
اتىراۋ وبلىستىق ءبىلىم بەرۋ باسقارماسى وكىلدەرىنىڭ سوزىنشە قازىر مەكتەپ ديرەكتورىنا تارتىپتىك شارا قولدانىلعان.
