قازاقستان پرەزيدەنتى ەلەكتر ەنەرگەتيكاسىن دامىتۋ بويىنشا كەڭەس وتكىزدى. وندا ول ەلەكتر ەنەرگياسىنىڭ تاريفتەرىن قالىپتاستىرۋ ماسەلەسىنە توقتالدى، دەپ حابارلايدى "ادىرنا" ۇلتتىق پورتالى.
قاسىم-جومارت توقاەۆ تاريفتەردىڭ ادىلدىگى مەن قولجەتىمدىلىگىن ماڭىزدى ەكونوميكالىق جانە الەۋمەتتىك ماسەلە دەپ سانايدى. پاندەميانىڭ كەرى اسەرىن تومەندەتۋ ماقساتىندا وسى جىلدىڭ 1-توقسانىنىڭ سوڭىنا دەيىن بارلىق تاريف تۇرلەرى كەيىنگە شەگەرىلدى. سونىمەن قاتار تاريفتەردى ۇنەمى ءبىر دەڭگەيدە ۇستاپ تۇرۋ مۇمكىن ەمەس. تاريفتەر دايەكتى شىعىنداردى جابۋعا جانە سالانىڭ دامۋىنا مۇمكىندىك تۋعىزۋى ءتيىس، دەپ حابارلادى اقوردا سايتى.
"ادەتتە تاريفتەردى قىمباتتاتۋ ماسەلەسى باستاپقىدا بيزنەس پەن بيۋدجەتتىك ۇيىمدارعا جۇكتەلەتىنى جاسىرىن ەمەس. جەكەلەگەن ايماقتاردا ونىڭ ايىرماشىلىعى 400 پايىزعا جەتەدى. مۇنىڭ نارىقتىڭ دامۋىنا كەسىرى ءتيىپ قانا قويمايدى، ەنەرگيانى ۇنەمدەپ تۇتىنۋعا دا ەش پايداسىن تيگىزبەيدى. ەنەرگيانى ءتيىمدى پايدالانۋ جانە ونى كوپ تۇتىنۋدى تومەندەتۋ مىندەتى ورىندالماي وتىر. ەگەر ەلەكتر قۋاتى بوسقا ىسىراپ بولسا، وندا وتە قىمبات ەنەرگيالىق ءتيىمدى ماتەريالدار مەن قۇرال-جابدىقتاردى پايدالانۋدىڭ نە قاجەتى بار. سونىمەن قاتار اتاۋلى الەۋمەتتىك كومەك كورسەتۋدىڭ باستى قاعيداتى ساقتالماۋدا. وسىنداي كەلەڭسىزدىكتىڭ ناتيجەسىندە، شىن مانىندە، كومەككە مۇقتاج ساناتىنا جاتاتىن ازاماتتار قاجەتتى كولەمدە جەڭىلدىك المايدى", – دەدى پرەزيدەنت.
ول ءارى قاراي جەتكىزىلىمنىڭ تۇراقتىلىعى، تاريفتەردىڭ قول جەتىمدىلىگى ۇلتتىق باسەكەگە قابىلەتتىلىكتىڭ نەگىزگى كومپونەنتتەرى ەكەنىن اتاپ ءوتتى.
"تۇراقتى جابدىقتاۋ، تاريفتەردىڭ قولجەتىمدىلىگى – ۇلتتىق باسەكەگە قابىلەتتىلىكتىڭ باستى كومپونەنتتەرى. سوندىقتان ەلەكتر ەنەرگياسىنىڭ قۇنىن ادىلەتتى نارىق قۇنىنا نەگىزدەۋ ماڭىزدى بولىپ وتىر. بۇگىندە ەلەكتر قۋاتىنىڭ كوتەرمە نارىعىندا ءۇش-اق كومپانيا وزىق تۇر. ولار نارىقتىڭ 70 پايىزىن قامتيدى. مۇنى سونشالىقتى دۇرىس دەۋگە كەلمەيدى. ەلەكتر قۋاتىنىڭ كوتەرمە ساۋداسىنداعى ەكىجاقتى شارتتار جاڭادان اشىلعان ساتىپ الۋشى كومپانيالارعا كەدەرگى كەلتىرىپ، ەلەكترمەن قامتۋدىڭ بولشەك ساۋدا نارىعىنداعى باسەكەنىڭ دامۋىنا توسقاۋىل بولىپ وتىر. بۇل تۇتىنۋشىلار ءۇشىن باعانىڭ قىمباتتاۋىنا الىپ كەلەدى", – دەپ اتاپ ءوتتى پرەزيدەنت.
ەنەرگەتيكا مينيسترلىگىنە باسەكەلەستىكتى قورعاۋ اگەنتتىگىمەن بىرگە بۇل ماسەلەنى مۇقيات زەردەلەۋ تاپسىرىلدى.
"ادىرنا" ۇلتتىق پورتالى
