قاسىم-جومارت توقاەۆ پەن ۆلاديمير پۋتين بۇگىن، 9 قاراشادا قوستانايدا وتكەن قازاقستان مەن رەسەيدىڭ XIX وڭىرارالىق ىنتىماقتاستىق فورۋمىنا بەينەبايلانىس رەجيمىندە قاتىستى. ءىس-شارا بارىسىندا ەكى ەل باسشىلارى قازاقستان مەن رەسەيدىڭ ساۋدا اينالىمىن ەكى ءتۇرلى جاريالادى.
رەسەي باسشىسى «ايماقتىق ىنتىماقتاستىقتىڭ اسەرلى شارتتىق-قۇقىقتىق بازاسى ۇنەمى دامىپ، كەڭەيىپ جاتقانىنا، ونىڭ ىشىندە ەكى ەلدىڭ وڭىرلىك ۇكىمەتتەرى اراسىنداعى 60-تان استام كەلىسىمگە» نازار اۋداردى.
مەنىڭ بىلۋىمشە، وسى فورۋم ناتيجەسىندە قول قويۋعا جاڭا كەلىسىمدەر مەن مەموراندۋمداردىڭ، سونداي-اق جالپى سوماسى 100 ميلليون دوللارعا جۋىق كوممەرتسيالىق كەلىسىمشارتتاردىڭ تۇتاس سەرياسى دايىندالدى، - دەدى پۋتين.
ونىڭ ايتۋىنشا، «بۇل رەسەيلىك-قازاقستاندىق ەكونوميكالىق بايلانىستاردىڭ قانشالىقتى تابىستى دامىپ كەلە جاتقانىن ايقىن كورسەتەدى».
وسىعان وراي، وڭىرلەردىڭ تىكەلەي بەلسەندى قاتىسۋىمەن 2022 جىلى قازاقستانمەن ءوزارا تاۋار اينالىمى 10 پايىزدان استامعا ارتقانىن ەرەكشە اتاپ وتكىم كەلەدى.
ءبىزدىڭ ستاتيستيكامىز – 28,2 ميلليارد دوللار. بيىلعى جىلدىڭ قاڭتار-تامىز ايلارىندا كونترساۋدا تاعى جەتى پايىزعا ءوستى. سونىمەن بىرگە ەكسپورت-يمپورت وپەراتسيالارىندا ۇلتتىق ۆاليۋتالاردى پايدالانۋ ايتارلىقتاي كەڭەيدى، دەدى پۋتين.
ال قاسىم-جومارت توقاەۆ تاۋار اينالىمىن رەسەيدەن 1,2 ميلليارد كەم ايتتى.
رەسەي قازاقستاننىڭ ءىرى ساۋدا-ەكونوميكالىق سەرىكتەسى مارتەبەسىن سەنىمدى تۇردە ساقتاپ كەلەدى. سوڭعى ءۇش جىلدا ەلدەرىمىز اراسىنداعى ءوزارا ساۋدا كولەمى 30 پايىزدان استام ءوستى. بىلتىر تاۋار اينالىمى، قازاقستان ستاتيستيكاسى بويىنشا، 27 ميلليارد دوللاردى قۇرادى. بۇل – رەكوردتىق كورسەتكىش. بيىل دا وڭ ديناميكا ساقتالىپ وتىر. سەگىز ايدىڭ قورىتىندىسى بويىنشا ساۋدا-ساتتىق كولەمى 17 ميلليارد دوللارعا جەتتى. جالپى، ءوزارا تاۋار اينالىمىن ودان ءارى ارتتىرۋ ءۇشىن زور مۇمكىندىك بار. وسى ورايدا ەكى ەلدىڭ ىسكەر توپتارى اراسىنداعى بايلانىستاردىڭ ايتارلىقتاي جاندانعانى بايقالادى. رەسەيلىك كومپانيالار قازاقستان ەكونوميكاسىنداعى جەتەكشى ينۆەستورلاردىڭ بەستىگىنە كىرەدى. ولار جالپى 20 ميلليارد دوللاردان استام ينۆەستيتسيا سالدى. وسى جىلدىڭ ءبىرىنشى جارتىجىلدىعىندا عانا قازاقستان ەكونوميكاسىنا تارتىلعان رەسەيلىك ينۆەستيتسيا كولەمى ءبىر ميلليارد دوللاردان استى. بۇل وتكەن جىلعى دەڭگەيدەن 20 پايىزعا كوپ. ءوز كەزەگىندە قازاقستاننىڭ رەسەيگە سالعان ينۆەستيتسياسىنىڭ كولەمى 6 ميلليارد دوللارعا جەتتى. بۇل ەكىجاقتى پروتسەسس ەكەنى قۋانتادى»، – دەدى مەملەكەت باسشىسى.
ءپۋتيننىڭ سوزىندە فورۋم ءوتىپ جاتقان قوستانايدا ەكى ەلدىڭ 30-دان استام ءوڭىرىنىڭ وكىلدەرى جينالىپ، كۇندەلىكتى تاجىريبەلىك اسپەكتىلەرمەن اينالىساتىنى ايتىلدى.
سونداي-اق، رەسەي پرەزيدەنتى «قازىرگى تاڭدا رەسەي فەدەراتسياسىنىڭ 76 وبلىسى قازاقستاندىق وبلىستارمەن تىكەلەي ارىپتەستىك بايلانىس ورناتقانىن» اتاپ ءوتتى.
