سمارتفوندار الدەقاشان ءسىز بەن ءبىزدىڭ ءومىرىمىزدىڭ ءبىر بولىگىنە اينالىپ كەتكەندىگى بەلگىلى. تۇتىنۋشىنىڭ كوپتىگى وندىرۋشىلەر اراسىندا ۇلكەن باسەكەلەستىك تۋدىراتىندىعى تاعى بار. سمارتفوندار مەن گادجەتتەردىڭ جاڭا مودەلدەرى جىل ساناپ ەمەس، كۇن ساناپ ارتۋدا. جاڭا ۇلگىلەردىڭ كوپتىگى تۇتىنۋشىلاردىڭ باسىن اينالدىرىپ جىبەرەدى دەسەك ارتىق ايتقاندىعىمىز ەمەس. سول سەبەپتى سىزدەرگە سمارتفون تاڭداۋدا ءسال دە بولسا پايدامىز ءتيسىن دەگەن نيەتپەن بيىلعى جىلدىڭ ۇزدىك بيۋدجەتتىك ۇلگىلەرىنىڭ العاشقى توپتاماسىن نازارلارىڭىزعا ۇسىنامىز. قولجەتىمدى باعاداعى اقىلدى تەلەفونداردىڭ ۇلگىسىن بىرگە سارالاپ كورەيىك.
Honor 30i
OLED ەكران قازىرگى ۋاقىتتا تەك فلاگماندىق ۇلگىلەردە عانا ەمەس، قاراپايىم قالتافونداردا دا كەزدەسۋدە. بۇل ەكراندارعا سۇرانىستىڭ ارتۋىنا بايلانىستى Honor 30i قالتافونى ساتىپ الۋشىلار كوزىنەن تاسادا قالىپ قويماسى انىق. ونىڭ ۇستىنە ديسپلەيدىڭ ءپىشىمىنىڭ 2400×1080 پيكسەلدە بولۋى تۇتىنۋشىنىڭ تالعامىن تولىقتاي قاناعاتتاندىرادى.
بۇدان بولەك Honor 30i اقىلدى تەلەفونى ءبىزدى نەمەن تاڭ قالدىرا الادى؟ ءساندى ديزاينى، كورپۋسىنىڭ اشىق، جارقىن تۇستەرمەن بويالۋى، ءتاۋىر ساپاداعى HiSilicon Kirin 710F جۇيەلىك پلاتفورماسى، 4 گب جۇيەلىك جادى مەن 128 گب-تان تۇراتىن نەگىزگى جادى. ءوز باعاسى ءۇشىن تاپتىرماس مودەلدەردىڭ ءبىرى سانالاتىن بۇل قالتافوننىڭ باتارەياسى 4000 ما بولسا، نەگىزگى كامەراسى 3 ءتۇرلى مودۋلدەن تۇرادى. سمارتفوننىڭ ورتاشا باعاسى-105 000 تگ.
Xiaomi Poco M3 4/64GB
بيىلعى جىلدىڭ بيۋدجەتتىك برەندىنە اينالعان Poco M3 ۇلگىسى قالىڭ كوپشىلىكتى ءوزىنىڭ كوپتەگەن قىرلارىمەن باۋراپ الدى. باستى ارتىقشىلىعى، نارىقتاعى باسەكەلەستەرىنە قاراعاندا باعاسىنىڭ ارزاندىعىندا. ودان كەيىنگى ماڭىزدى تۇستارىنىڭ ءبىرى تەلەفوننىڭ باتارەياسى 6000 ما-دى قۇرايدى، بۇل دەگەنىمىز، تەلەفوننىڭ باتارەياسى سىزگە 24 ساعاتتان ارتىق قىزمەت كورسەتە الادى.
وزگە دە ارتىقشىلىقتارىنا كوز سالساق، تەلەفوننىڭ جۇيەلىك پلاتفورماسى Qualcomm Snapdragon 662 ءچيپى بولسا، جۇيەلىك جادى 4 گب-تى قۇرايدى. سمارتفوننىڭ ورتاشا باعاسى شامامەن 75-80 000تگ كولەمىندە.
Nokia 5.3 3/64GB Dual Sim
نوكيا تەلەفونىنىڭ اتاۋىنىڭ ءوزى كوپشىلىگىمىزدىڭ قۇلاعىمىزعا جىلى ەستىلەرى اقيقات. ءوز زامانىندا اتاعىنان ات ۇركەتىن بۇل كومپانيانى سمارتفوندار اراسىنداعى باسەكەلەستىككە توتەپ بەرە المادى دەپ جاتادى كوپشىلىك. بىراق نوكيالىقتار ولاي ويلامايتىن سەكىلدى. بۇعان دالەل سۋ جاڭا Nokia 5.3 سمارتفونى.
Nokia 5.3 سوڭعى ۋاقىتتارداعى ەڭ ءبىر قىزىق مودەلدەردىڭ ءبىرى رەتىندە ەسەپتەلەدى. ديزاينىنا قاراساق، ەڭ الدىمەن وزگەشە ورنالاسقان نەگىزگى كامەرانى كوزىمىز شالادى. انىقتاپ ايتار بولساق، بۇل كۆادروكامەرا قۇرىلعىنىڭ قۋاتىنا بايلانىستى وتە ساپالى ونىمدەردىڭ ءبىرى بولىپ ەسەپتەلەدى.
بۇل مودەل تۇتىنۋشىنى تاعى نەمەن قىزىقتىرا الادى؟ مىسالعا، Google كومەكشىگە ارنالعان ارنايى باتىرما جانە بۇعاتتاۋ باتىرماسىنىڭ جانىندا ورنالاسقان حابارلامالار ينديكاتورىن اتاپ وتسەك بولادى.
ەكران ءپىشىمى اسا ۇلكەن بولماسا دا، جۇيەلىك پلاتفوراماسى Nokia ونىمدەرىنىڭ ىشىندەگى ەڭ ساپالىلارىنىڭ ءبىرى بولىپ تابىلادى. جۇيەلىك پلاتفورما Qualcomm Snapdragon 665 ءچيپى بولسا، جۇيەلىك جاد 3گب-تى قۇرايدى. سمارتفوننىڭ ورتاشا باعاسى-79 000 تگ.
realme C15 4/64GB
realme C15-سوڭعى ۋاقىتتارداعى باتارەياسى ەڭ قۋاتتى تەلەفونداردىڭ ءبىرى بولىپ سانالادى. الدىن-الا جاسالعان ساراپشىلار سىناعىنىڭ قورىتىندىسى بويىنشا، بۇل مودەل ەڭ تەز قۋاتتالاتىن، جانە ەڭ شىدامدى قالتافونداردىڭ ساناتىنا ەندى.
8 يادرودان تۇراتىن MediaTek Helio G35 ءچيپى قۇرىلعىنىڭ جۇيەلىك پلاتفورماسى بولىپ سانالادى. بۇدان بولەك تەلەفوننىڭ باستى ارتىقشىلىقتارىنىڭ ءبىرى-ءتورت مودۋلدى نەگىزگى كامەرا. «ەندى كامەرا»، «ۋلترا ەندى كامەرا»، «پورترەتتىك» جانە «رەترو» دەپ اتالاتىن كامەرا مودۋلدەرى ءسىزدىڭ ساپالى سۋرەتتەرىڭىز ءۇشىن قىزمەت قىلۋعا ءازىر. نارىقتاعى ورتاشا باعاسى-70 000 تگ.
ZTE Blade 20 Smart
«ءارى ارزان، ءارى ساپالى» دەگەن تىركەس تۋرا وسى مودەلگە ارناپ ايتىلعانداي. سمارتفون ءساندى ديزايندا جاسالعان جانە ىشكى حاراكتەريستيكالارى دا نارىقتاعى باسەكەلەستەرىنەن كەم تۇسپەيدى.
MediaTek Helio P60 ءچيپى ارقىلى جۇمىس ىستەيتىن جۇيەلىك پلاتفورما، 4گب-تى قۇرايتىن جۇيەلىك جاد پەن 128 گب-تان تۇراتىن نەگىزگى جاد كەز-كەلگەن تۇتىنۋشىنى قاناعاتتاندىرارى انىق. بۇدان بولەك سوڭعى ترەندتەردىڭ ءبىرى بولىپ سانالاتىن NFC تەحنولوگياسى دا اتالعان سمارتفوننان ورىن تاپقان. سمارتفوننىڭ نارىقتاعى ورتاشا باعاسى 79 000 تگ.
بۇگىنگى كەڭەسىمىز سىزدەرگە ءسال دە بولسا ءوز سەپتىگىن تيگىزەتىن بولسا، وندا ءبىز وقىرمان الدىنداعى ۇلكەن ميسسيامىزدىڭ باسپالداقتارىن اتتاعانداي كۇي كەشەر ەدىك. سمارتفون تاڭداۋ ىسىنە ەرەكشە ۇقىپتىلىقپەن، بايىپتىلىقپەن قاراڭىزدار. سەبەبى، جوعارىدا ايتقانىمىزداي اقىلدى تەلەفوندار - بۇگىنگى كۇندە ءومىرىمىزدىڭ ءبىر بولشەگى. باعاسى مەن ساپاسى ءدال كەلىسكەن قۇرىلعىلاردى تاڭداي بىلەيىك.
كورگەنوۆ قۋاندىق
