Smartfondar áldeqashan siz ben bizdiń ómirimizdiń bir bóligine aınalyp ketkendigi belgili. Tutynýshynyń kóptigi óndirýshiler arasynda úlken básekelestik týdyratyndyǵy taǵy bar. Smartfondar men gadjetterdiń jańa modelderi jyl sanap emes, kún sanap artýda. Jańa úlgilerdiń kóptigi tutynýshylardyń basyn aınaldyryp jiberedi desek artyq aıtqandyǵymyz emes. Sol sebepti sizderge smartfon tańdaýda sál de bolsa paıdamyz tısin degen nıetpen bıylǵy jyldyń úzdik bıýdjettik úlgileriniń alǵashqy toptamasyn nazarlaryńyzǵa usynamyz. Qoljetimdi baǵadaǵy aqyldy telefondardyń úlgisin birge saralap kóreıik.
Honor 30i
OLED ekran qazirgi ýaqytta tek flagmandyq úlgilerde ǵana emes, qarapaıym qaltafondarda da kezdesýde. Bul ekrandarǵa suranystyń artýyna baılanysty Honor 30i qaltafony satyp alýshylar kózinen tasada qalyp qoımasy anyq. Onyń ústine dıspleıdiń pishiminiń 2400×1080 pıkselde bolýy tutynýshynyń talǵamyn tolyqtaı qanaǵattandyrady.
Budan bólek Honor 30i aqyldy telefony bizdi nemen tań qaldyra alady? Sándi dızaıny, korpýsynyń ashyq, jarqyn tústermen boıalýy, táýir sapadaǵy HiSilicon Kirin 710F júıelik platformasy, 4 Gb júıelik jady men 128 Gb-tan turatyn negizgi jady. Óz baǵasy úshin taptyrmas modelderdiń biri sanalatyn bul qaltafonnyń batareıasy 4000 mA bolsa, negizgi kamerasy 3 túrli modýlden turady. Smartfonnyń ortasha baǵasy-105 000 tg.
Xiaomi Poco M3 4/64GB
Bıylǵy jyldyń bıýdjettik brendine aınalǵan Poco M3 úlgisi qalyń kópshilikti óziniń kóptegen qyrlarymen baýrap aldy. Basty artyqshylyǵy, naryqtaǵy básekelesterine qaraǵanda baǵasynyń arzandyǵynda. Odan keıingi mańyzdy tustarynyń biri telefonnyń batareıasy 6000 mA-dy quraıdy, bul degenimiz, telefonnyń batareıasy sizge 24 saǵattan artyq qyzmet kórsete alady.
Ózge de artyqshylyqtaryna kóz salsaq, telefonnyń júıelik platformasy Qualcomm Snapdragon 662 chıpi bolsa, júıelik jady 4 Gb-ty quraıdy. Smartfonnyń ortasha baǵasy shamamen 75-80 000tg kóleminde.
Nokia 5.3 3/64GB Dual Sim
Nokııa telefonynyń ataýynyń ózi kópshiligimizdiń qulaǵymyzǵa jyly estileri aqıqat. Óz zamanynda ataǵynan at úrketin bul kompanııany smartfondar arasyndaǵy básekelestikke tótep bere almady dep jatady kópshilik. Biraq Nokıalyqtar olaı oılamaıtyn sekildi. Buǵan dálel sý jańa Nokia 5.3 smartfony.
Nokia 5.3 sońǵy ýaqyttardaǵy eń bir qyzyq modelderdiń biri retinde esepteledi. Dızaınyna qarasaq, eń aldymen ózgeshe ornalasqan negizgi kamerany kózimiz shalady. Anyqtap aıtar bolsaq, bul kvadrokamera qurylǵynyń qýatyna baılanysty óte sapaly ónimderdiń biri bolyp esepteledi.
Bul model tutynýshyny taǵy nemen qyzyqtyra alady? Mysalǵa, Google kómekshige arnalǵan arnaıy batyrma jáne buǵattaý batyrmasynyń janynda ornalasqan habarlamalar ındıkatoryn atap ótsek bolady.
Ekran pishimi asa úlken bolmasa da, júıelik platforamasy Nokia ónimderiniń ishindegi eń sapalylarynyń biri bolyp tabylady. Júıelik platforma Qualcomm Snapdragon 665 chıpi bolsa, júıelik jad 3Gb-ty quraıdy. Smartfonnyń ortasha baǵasy-79 000 tg.
realme C15 4/64GB
realme C15-sońǵy ýaqyttardaǵy batareıasy eń qýatty telefondardyń biri bolyp sanalady. Aldyn-ala jasalǵan sarapshylar synaǵynyń qorytyndysy boıynsha, bul model eń tez qýattalatyn, jáne eń shydamdy qaltafondardyń sanatyna endi.
8 ıadrodan turatyn MediaTek Helio G35 chıpi qurylǵynyń júıelik platformasy bolyp sanalady. Budan bólek telefonnyń basty artyqshylyqtarynyń biri-tórt modýldy negizgi kamera. «Endi kamera», «ýltra endi kamera», «portrettik» jáne «retro» dep atalatyn kamera modýlderi sizdiń sapaly sýretterińiz úshin qyzmet qylýǵa ázir. Naryqtaǵy ortasha baǵasy-70 000 tg.
ZTE Blade 20 Smart
«Ári arzan, ári sapaly» degen tirkes týra osy modelge arnap aıtylǵandaı. Smartfon sándi dızaında jasalǵan jáne ishki harakterıstıkalary da naryqtaǵy básekelesterinen kem túspeıdi.
MediaTek Helio P60 chıpi arqyly jumys isteıtin júıelik platforma, 4Gb-ty quraıtyn júıelik jad pen 128 Gb-tan turatyn negizgi jad kez-kelgen tutynýshyny qanaǵattandyrary anyq. Budan bólek sońǵy trendterdiń biri bolyp sanalatyn NFC tehnologııasy da atalǵan smartfonnan oryn tapqan. Smartfonnyń naryqtaǵy ortasha baǵasy 79 000 tg.
Búgingi keńesimiz sizderge sál de bolsa óz septigin tıgizetin bolsa, onda biz oqyrman aldyndaǵy úlken mıssııamyzdyń baspaldaqtaryn attaǵandaı kúı kesher edik. Smartfon tańdaý isine erekshe uqyptylyqpen, baıyptylyqpen qarańyzdar. Sebebi, joǵaryda aıtqanymyzdaı aqyldy telefondar - búgingi kúnde ómirimizdiń bir bólshegi. Baǵasy men sapasy dál kelisken qurylǵylardy tańdaı bileıik.
Kórgenov Qýandyq
