ازىق-تۇلىك قىمباتتاپ كەتتى دەپ حالىقتىڭ شىرىلداپ جۇرگەنىنە التى ايدان اسسا دا، ۇكىمەتتەگىلەر باعانى ءالى ءبىر رەتكە كەلتىرە الماي وتىر، دەپ حابارلايدى “ادىرنا” ۇلتتىق پورتالى 31 ارناعا سىلتەمە جاساپ.
ويتكەنى، باعاعا جاۋاپتىلار ءتيىستى جۇمىستاردى ورىنداماعان. ساۋدا ءمينيسترى باقىت سۇلتانوۆ اۋىلشارۋاشىلىعى مينيسترلىگىندەگى ارىپتەستەرىنىڭ 9 ءتۇرلى شارانى اتقارماعانىن ايتتى.
وزدەرىنىڭ دە جارىتىپ جۇمىس ىستەگەنى شامالى ەكەن. اكىمدەر ءتىپتى مۇمكىندىكتى قۇر جىبەرىپ، باعانى اسپانداتىپ الدى، دەيدى.
جاعدايدى ءوز كوزىمەن كورۋى ءۇشىن قر پارلامەنتى ءماجىلىسىنىڭ دەپۋتاتى ەرلان سايىروۆ بازار شارلاپ قايتتى.
31-ارنانىڭ ءجۋرناليستى ايبار ءتولجانۇلى باۋىرىممەن بازارداعى ازىق-تۇلىك، ەتتىڭ باعاسىن باعدارلاپ قايتتىق. ءبىر سوزبەن ايتساق، ەتكە باعا "كۇيىپ" تۇر! اسىرەسە، قوي ەتىنىڭ باعاسى اسپانعا شارىقتاپ كەتكەن... قوي ەتى كيلوگرامى 3-مىڭ تەڭگەگە جەتكەن! ء"بىر توقتى 60-مىڭ تەڭگەدەن اسادى" دەيدى ساۋداگەرلەر. مەنىڭ ويىمشا، مينيسترلەر كابينەتتەرىنەن شىعىپ، حالىقتىڭ الەۋمەتتىك جاي-كۇيىن، باعانى باعدارلاپ، ناقتى شارالار قولدانۋى كەرەك! بۇگىندە، حالىق جاپپاي تۇتىناتىن تاۋارلاردىڭ (ەت، ازىق-تۇلىك) باعاسىنا مەملەكەتتىك رەتتەۋ قاجەت!، - دەپ جازدى ول.
دەپۋتات قارا بازارداعى باعا قاراپايىم حالىق ءۇشىن قىمبات ەكەنىن ايتتى.
كارتوپتىڭ باعاسى 450, ءسابىزدىڭ باعاسى 400-دەن اسقان. ال سارىمساق 150-دەن اسىپ وتىر. ەندى مىنا پرودۋكتوۆىي نابوردىڭ ءوزى 960 تەڭگە ءبىر كيلوگراممنان العان كەزدە. قارا بازارداعى باعا ارينە حالىق ءۇشىن قىمبات، - دەدى دەپۋتات.
ايتا كەتەيىك، اۋىلشارۋاشىلىق ءمينيسترى ساپارحان وماروۆ كارتوپ باعاسىن الىپساتارلار ءوسىرىپ وتىرعانىن مالىمدەگەن بولاتىن.
