MEDIA CLUB QAZAQSTAN پلاتفورماسىندا مەكتەپ تۇلەكتەرىنە ارنالعان تىكەلەي ەفير ءوتتى. ەفير بارىسىندا، ءبىلىم سالاسىنداعى ساراپشىلار جوعارى وقۋ ورنى مەن ماماندىقتى دۇرىس تاڭداۋ ماسەلەسىن تالقىلاپ، مەكتەپ بىتىرۋشىلەرگە اقىل-كەڭەس بەردى.
م.س. نارىكباەۆ اتىنداعى كازگيۋ ۋنيۆەرسيتەتى باسقارما توراعاسىنىڭ ورىنباسارى ەربولات مۇحامەدجان ۇبت سەرتيفيكاتىن 2 جىلعا جارامدى قىلۋ كەرەك دەگەن ۇسىنىس ايتتى. ونىڭ سەبەبىن بىلاي تۇسىندىرەدى.
«بيىل قازاقستاندا 150 مىڭعا جۋىق وقۋشى مەكتەپ ءبىتىردى. قازىرگى تاڭدا ءار تۇلەكتىڭ الدىندا ماماندىعىنا سايكەس ۋنيۆەرسيتەت تاڭداۋ مىندەتى تۇر. ولاردىڭ كوبى «گرانت بولسا، بولدى» دەپ، ارمانداعان ماماندىعىندا وقىماي، قاتەلەسۋى دە مۇمكىن. ويتكەنى ءبىزدىڭ ەلدە «جوو-عا مىندەتتى تۇردە مەكتەپ بىتىرگەن جىلدان قالماي ءتۇسۋ كەرەك» دەگەن ستەرەوتيپ بار. سوندىقتان ۇبت-نىڭ سەرتيفيكاتىن 2 جىلعا جارامدى قىلۋ كەرەك. وسى ۋاقىت ىشىندە تۇلەك ءوزىنىڭ قاي سالادا وقىعىسى كەلەتىنىن انىقتاپ، ماماندىعىن تاڭداپ، ماقساتىن ايقىنداي الادى»,- دەگەن ۇسىنىس ءبىلدىردى.
ەربولات مۇحامەدجاننىڭ يدەياسىن BTS Education كومپانياسىنىڭ باس ديرەكتورى ساياسات نۇربەك قولداپ، 11 سىنىپتان كەيىن ءۇزىلىس الۋ شەتەلدە قالىپتى جاعداي ەكەنىن ايتتى.
«مەكتەپتى بىتىرگەن جىلى ۋنيۆەرسيتەتكە تۇسپەسەڭ ءومىرىڭ ءبىتتى دەگەن كەڭەس ۇكىمەتىنەن قالعان تۇسىنىك بار. دامىعان ەلدەردە ءوز-ءوزىڭدى تولىعىراق تانۋعا كومەكتەسەتىن Gap Year ۇعىمى بار. وكىنىشكە وراي، قازىر اتا-انا مەن وقۋشى ۇبت تاپسىرۋعا 1-2 اپتا قالعاندا ماماندىق تاڭدايدى. اتى ادەمى ەستىلەدى دەپ ءوزىم «حالىقارالىق قۇقىق» ماماندىعىندا وقىدىم. ەنەرگياعا تولى 5 جىل جاستىق شاعىم بوسقا ءوتتى. بۇل سالادا قىزمەت ەتپەدىم. ادامنىڭ الداعى 50 جىلدىق ءومىرى تاڭداعان ماماندىعىمەن بايلانىستى. ماماندىق تاڭداماس بۇرىن تۇلعا رەتىندە قالىپتاسىپ، ىشكى قالاۋىڭدى ايقىنداپ ال. كوپ اداممەن اقىلداسىپ، بىراق شەشىمدى ءوزىڭ شىعار»,- دەپ ساياسات نۇربەك تۇلەكتەرگە كەڭەس بەردى.
MEDIA CLUB QAZAQSTAN
70-30-42
