ءماجىلىس دەپۋتاتى ەدىل جاڭبىرشين قۋاڭشىلىقتان زارداپ شەككەن وڭىرلەردە توتەنشە جاعداي ەنگىزۋدى ۇسىندى، دەپ حابارلايدى "ادىرنا" ۇلتتىق پورتالى Sputnik قازاقستان سايتىنا سىلتەمە جاساپ.
"تەڭىزدەر مەن وزەندەردىڭ تارتىلۋى، جاۋىن-شاشىننىڭ نورمادان از ءتۇسۋى كوپتەگەن ايماقتىڭ، سونىڭ ىشىندە اتىراۋ، اقتوبە، قىزىلوردا، ماڭعىستاۋ جانە تۇركىستان وبلىستارىنىڭ شارۋالارىنا قيىندىق تۋعىزۋدا. اسىرەسە، ماڭعىستاۋ مەن قىزىلوردا وبلىستارىندا اتا-بابامىزدان قالعان اسىل مۇرانىڭ ءبىرى – ءتورت تۇلىك مالدى ۇستاپ وتىرعان شارۋاشىلىقتار مەن تۇرعىندار اسا اۋىر جاعدايدا", - دەدى جاڭبىرشين ءماجىلىستىڭ جالپى وتىرىسىندا.
دەپۋتاتتىڭ ايتۋىنشا، سۋ تاپشىلىعى مەن قۋاڭشىلىق سالدارىنان جايلىمدىق جەرلەردىڭ جاعدايى مۇشكىل. مالدىڭ شىعىنى كوبەيىپ كەتتى. رەسمي مالىمەتكە سايكەس، وتكەن جىلى ماڭعىستاۋ وبلىسىندا 4 883 مال باسىنىڭ ءولىمى تىركەلسە، بيىل ءۇش ايدىڭ ىشىندە عانا 1 332 باس مال ولگەن.
"بۇل مالىمەت تەك سىرعالانعان، تىركەلگەن مال شىعىنى بويىنشا عانا، ال قالىڭ بۇقارانىڭ قانشا مالى قىرىلعانى بەلگىسىز. مۇنداي جاعداي قىزىلوردا وبلىسىندا دا تىركەلىپ، 481 باس مال ولگەن. بۇل جاعداي مال ازىعىنىڭ باعاسىن ەسەلەپ كوتەرىپ جىبەردى. ماڭعىستاۋدا ءبىر تۇك ءشوپتىڭ باعاسى 17 مىڭ تەڭگە بولسا، ءبىر كەلى ارپانىڭ باعاسى 95 تەڭگەگە جەتتى. ال كورشىلەس اقتوبە وبلىسىندا سول ءبىر تۇك ءشوپ 4 مىڭ تەڭگە تۇرادى", - دەپ اتاپ كورسەتتى جاڭبىرشين.
قازىرگى كەزدە اۋىل شارۋاشىلىعى مينيسترلىگى جانە جەرگىلىكتى اتقارۋشى ورگاندارى جەم-ءشوپ جەتكىزۋ بويىنشا جۇمىستى قولعا الدى. الايدا ول كومەك بارىنە بىردەي جەتىپ وتىرعان جوق. بۇنىڭ بارلىعى ءاربىر ءوڭىردىڭ ەرەكشەلىكتەرىن ەسكەرە وتىرىپ، عىلىمي زەرتتەۋلەرگە نەگىزدەلگەن ەلىمىزدىڭ مال شارۋاشىلىعىن دامىتۋعا جانە ونىڭ ازىعىن دايىنداۋعا ارنالعان جۇيەلى جانە جوسپارلى جۇمىستىڭ جوقتىعىن ايقىن كورسەتىپ وتىر.
"XXI عاسىردا كوسموستى يگەرىپ، اۆستراليا مەن كانادان اسىل تۇقىمدى مال الدىرىپ، دۇنيەنىڭ ءبارىن تسيفرلاندىرىپ جاتقاندا، مالعا ازىق تاۋىپ بەرە الماي جاتقانىمىز وتە ۇيات! قازاق اتىمىزعا سىن ەمەس پە؟", - دەيدى جاڭبىرشين.
ماجىلىسمەن ۇكىمەتكە دەپۋتاتتىق ساۋال جولداپ، جۇت جايلاعان ناقتى اۋداندار مەن ايماقتاردا شۇعىل تۇردە جەرگىلىكتى دارەجەدەگى توتەنشە جاعداي جاريالاۋدى ۇسىندى. سونىڭ اياسىندا شارۋالارعا ماتەريالدىق قورلاردان ناقتى كومەك بەرىلۋى كەرەك. بۇدان بولەك، كورشى وبلىستاردان تاسىمالداناتىن مال ازىعىنىڭ جول شىعىندارىن سۋبسيديالاپ، تەز ارادا مال جايۋعا جانە مال ازىعىن دايىنداۋعا جەر تەلىمدەرى ۋاقىتشا پايدالانۋعا بەرىلۋى قاجەت.
