نۇر-سۇلتان قالاسىنىڭ اكىمى التاي كولگىنوۆ قالا تۇرعىندارىنا ۇندەۋ جاسادى، دەپ حابارلايدى «ادىرنا» ءتىلشىسى. ول كوپشىلىكتى سىرقاتتانعان ادامداردىڭ ستاتيستيكاسىنا بەي-جاي قاراماۋعا شاقىردى.
«قۇرمەتتى ەلوردا تۇرعىندارى مەن قوناقتارى! ءبىز ءالى دە «قىزىل ايماقتامىز». كۇندەلىكتى COVID-19 ينفەكتسياسىنىڭ 250-300 جاعدايى انىقتالادى. ءبىر جاعىنان بۇل پتر-تەستىلەرىنىڭ سانىن كوبەيتۋ ارقىلى، ەكىنشى جاعىنان وقشاۋلاۋ مەن سانيتارلىق نورمالاردىڭ بۇزىلۋىنان بولىپ وتىر. قالا تۇرعىندارىن سىرقاتتانعان ادامداردىڭ ستاتيستيكاسىنا بەي-جاي قاراماۋعا شاقىرامىن. ءاربىر ساننىڭ ارتىندا ءبىر ادامنىڭ ءومىرى، ولاردىڭ وتباسىلارىنىڭ تاعدىرى تۇر. مەديتسينالىق رۇقساتى جوق جانە ءالى ۆاكتسيناتسيالانباعان ادامدار وتپەن ويناپ جۇرگەنىن بىلمەيدى: ولار ەرتە مە، كەش پە جەڭىلەدى. بۇل رەتتە ءوز دەنساۋلىعىن عانا ەمەس، تۋىستارىنا، جاقىندارىنا جانە قورشاعان ورتاعا قاۋىپ توندىرەدى»،– دەدى كولگىنوۆ.
سونداي-اق قالا باسشىسى جاڭا وقۋ جىلى قاشىقتان وقىتۋ فورماتىندا بولاتىنىن اتاپ ءوتتى.
«كۇزدە جاڭا وقۋ جىلى باستالادى. بىراق بالالارىمىز ءۇشىن مەكتەپتەردى قايتا اشا المايمىز»،– دەپ جازدى ول.
«ادىرنا» ۇلتتىق پورتالى
